¹ Nígbàtí Jésù ti mọ̀ pé àwọn Farisí ti gbọ́ pé òun ńṣe ìtẹ̀bọmi ọ̀pọ̀lọpọ ọmọ ẹ̀yìn tí ó ju ti Jòhánù lọ ² Bí ó ti lẹ̀ jẹ́ pé Jésù funrarẹ̀ kò ṣe ìtẹ̀bọmi, ṣùgbọ́n àwọn ọmọ ẹ̀yìn rẹ ni ó ńti àwọn ènìyàn bọmi ³ O kúrò ní Jùdíà, ó sì padà sí Gálílì. ⁴ Ó ṣe dandan fun láti gba Samáríà kọjá. ⁵ Nítorínáà ó wá sí ìlú kan ní Samáríà, tì à ńpè ní Sííkà, lẹ́bàá ilẹ̀ tí Jákọ́bù fi fún Jósẹ́fù ọmọ rẹ̀. ⁶ Kànga Jákọ́bù wà níbẹ̀, ó rẹ Jésù fún ìrìn àjò tí ó ti rìn, O jókòó lẹ́gbẹ̀ ẹ kànga níwọ̀n wákàtí kẹfà ọjọ́. ⁷ Obìnrin aráa Samáríà si dé láti pọn omi, Jésù sọ fún un pé, " Fún mi ní omi mu!" ⁸ Nítorí pé àwọn ọmọ ẹ̀yìn Rẹ̀ ti lọ sí ìlú láti ra oúnnjẹ. ⁹ Obìnrin náà sọ fún un wípé, ó yà mí lẹ́nu tí ìwọ Júù lè máa bèrè omi mímu lọ́wọ́ èmi aráa Samáríà. ¹⁰ Jésù dáa lóhùn, ó sì sọ fún un wípé, tí ìwọ bá mọ ẹ̀bùn Ọlọ́run, àti ẹni tí ó ńbá ọ sọ̀rọ̀, wípé fún mi ní oun mímu, ìwọ kì báa béèrè lọ́wọ́ọ̀ mi oun mímu, èmi ìbá fún ọ ní omi ìyè. ¹¹ Obìnrin náà sọ fún un wípé, Ọ̀gbẹ́ni, ìwọ kò ní ìfami tí ìwọ ó fi fa omi ¹² Ìwọ́ a ga ju bàbá wa Jákọ́bù, lọ bí? tí ó fún wa ní kànga yí, tí òun fúnra rẹ̀ mu nínu rẹ̀ àti ọmọ rẹ̀ pẹ̀lú àwọn ẹran ọ̀sìn rẹ̀. ¹³ Jésù dáa lóhùn, ó sì wí fún un pé, ẹnikẹ́ni tí ó bá mú nínú omi yìí, òǹgbẹ yóò gbẹ́ẹ́. ¹⁴ Ṣùgbọ́n ẹnikẹ́ni tí ó bá mu nínú omi tí èmi yóò fi fún un, òǹgbẹ kì yóò gbẹ́ẹ́ mọ́, omi tí èmi ó fi fún un yóò di orísun omi nínú rẹ̀, tí ó ńsun ìyè àìnípẹ̀kun. ¹⁵ Obìnrin náà sọ fún un wípé "Ọ̀gbẹ́ni, fún mí ní omi yíí, kí òǹgbẹ má baà gbẹ mí mọ́, kí èmi má baà wá fa omi yìí mọ́" ¹⁶ Jésù sọ fun un wípé, "Lọ, pe ọkọ ọ̀ rẹ , kí o sì padà wá." ¹⁷ Obìnrin náà dáa lóhùn, ó sì wípé, "èmi kò ní ọkọ". Jésu dáhùn wípé, ìwọ tọ̀nà tí o wípé ìwọ kò ní ọkọ. ¹⁸ Nítorípé o ti ní ọkọ máàrún tẹ́lẹ̀, èyí tí o wà lọ́dọ̀ ọ rẹ̀ báyìí, kìí ṣe ọkọ ọ̀ rẹ. Òtítọ́ ni ohun tí o sọ. ¹⁹ Obìnrin náà sọ fún un wípé, "Ọ̀gbẹ́ni mo mọ̀ wípé wòIíì ni ìwọ ńse." ²⁰ Àwọn bàbá wa sìn ní orí òkè yìí, ṣùgbọ́n ìwọ́ wìpé Jerúsálémù ni ibi ti àwọn ènìyàn ti le jọ́sìn. ²¹ Jésù sọ fún un pé, "Gbà mí gbọ́, obìnrin yìí, àkókò ńbọ̀, nígbàtí ìwọ yóò sìn Baba, kìí se ní orí òkè yìí, tàbí Jerúsálémù. ²² Ìwọ́ sìn ohun tí ìwọ kò mọ̀, àwá sìn ohun tí àwá mọ̀, nítorí ìgbàlà wá láti ọ̀dọ̀ àwọn Júù. ²³ Ṣùgbọ́n, àkókó ńbọ, ó sì ti dé nísinsìnyí, nígbàtí àwọn olùjọ́sín tòótọ́ yóò máa sìn Baba ní Ẹ̀mí àti ní òtítọ́, nítorí irú àwọn olùjọ́sìn bẹ́ẹ̀ ni Baba ńwá, kí o máa sìn òun. ²⁴ Ẹ̀mí ni Ọlọ́run, àwọn tí ó ńsìn ín yóò maa sìn ní Ẹ̀mí àti ní òtítọ́. ²⁵ Obìnrin náà sọ fún un wípé, "Mo mọ̀ pé, Mèsáyà ńbọ̀, ẹnití a pè ní Krístǐ. Nígbàtí ó bá dé, yoo fi òye ohun gbogbo yé wa. ²⁶ Jésù wí fun pe, "Èmi ni ẹnití ó ńbá ọ sọ̀rọ́." ²⁷ Ní àkókò náà, àwọn ọmọ ẹ́yìn rẹ̀ dé, ó yà wọ́n lẹ́nu, ìdí tí ó ńfi bá obiǹrin sọ̀rọ̀, ṣùgbón kò sí ẹni tí o sọ̀rọ̀ pe "Kíni ìwọ ńfẹ́, tàbí kíni ìdí tí ò ńfi ńbaa sọ̀rọ̀." ²⁸ Obìnrin naa fi ìfami rẹ̀ sílẹ̀, ó padà lọ sí ìgboro, ó sì sọ fún àwọn ènìyàn. ²⁹ Ẹ wá, wo arákùnrin tí ó sọ gbogbo ohun tí mo ti se fún mi. Òún ha ńṣe Krístì náà, ǹjẹ́ ó lè rí bẹ́ẹ̀?. ³⁰ Wọ́n fi ìgboro sílẹ̀, wọ́n sì wá sọ́dọ̀ Rẹ. ³¹ Ní àsìkò diẹ, àwọn ọmọ ẹ̀yìn ńkan lójú pé "Olùkọ́ni, jẹun" ³² Sùgbọ́n ó sọ fun wọn pé, "Mo ní oúnjẹ láti jẹ, tí ẹ̀yin kò mọ̀ nípa a rẹ̀." ³³ Àwọn ọmọ ẹ̀yìn in rẹ̀ sọ fún un ara wọn pé, kò sí ẹnikẹ́ni tí ó gbe oúnjẹ wá fún, à bi?. ³⁴ Jésù sọ fún wọn pé, oúnjẹ ẹ̀ mi ni láti ṣe ìfẹ́ ẹni tí ó rán mi, àti làti parí isẹ́ rẹ̀. ³⁵ Ẹ̀yin kò ha sọ pé, àkókò ìkórè ku oṣù mẹ́rin? Èmí sọ fún un yìn, ẹ wòké, ẹ wo oko tí ó ti pọ́n fun ìkórè!. ³⁶ Ẹnití ó ńkórè gba owó iṣẹ́, ó sì kó èso jọ fún ìyè àìnípẹ̀kun, kí ẹnití ńfúnrúgbìn àti ẹnití ńkórè le yọ̀ papọ̀. ³⁷ Nítorí a sọ èyí pé, ènìyàn kan gbìn, ẹlòmíràn ńkórè, òtítọ́ ni. ³⁸ Mo rán an yín láti kórè ohun tí ẹ kò ṣiṣẹ́ fún. Àwọn mìíràn ti ṣiṣẹ́, ìwọ sì ti wọnú ìkórè e wọn. ³⁹ Ọ̀pọ̀lọpọ̀ àwọn ará a Samáríà gbàgbọ́ nínú ẹ̀rí obìnrin yi, pé ó sọ ohun gbogbo tí mo ṣe. ⁴⁰ Nígbàtí àwọn ará a Samáríà wá, wọ́n bèèrè lọ́wọ́ ọ rẹ̀ kí ó dúró sí ọ̀dọ̀ ọ wọn, ó dúró fún ọjọ́ méjì. ⁴¹ Ọ̀pọ̀lọpọ̀ gbàgbọ́ síi, nítorí ọ̀rọ̀ ọ rẹ̀. ⁴² Wọ́n sọ fún obìnrin nàá pé, kìí se pé a gbàgbọ́ nìtorí ọ̀rọ̀ rẹ nìkan, ṣùgbọ́n nítorí àwa náà ti gbọ́, a sì ti mọ̀ nítòótọ́ pe, òun ni Olùgbàlà aráyé. ⁴³ Lẹ́híìn ọjọ́ méjì, ó kúrò níbẹ̀ lọ sí Gálílì. ⁴⁴ Jésù fúnraarẹ̀ sọ pé wòlíì ki ílọ́lá ní ìlú u rẹ̀. ⁴⁵ Nígbàtí ó dé Gálílì, àwọn ará ìlú Gálílì kíi káàbọ, wọ́n ti rí ohun gbogbo tí ó ti ṣe ní Jerúsálẹ́mù ní àkókò àjọ̀dún, nítorí àwọn pẹ̀lú ti lọ sí àjọ̀dún. ⁴⁶ Nísinsìnyí, ó wá sí Kánà ti Gálílì, níbití ó ti sọ omi di ọtí wáìnì. Ara ọmọ ìjóyè ọlọ́là kan kò yá. ⁴⁷ Nígbàtí ó gbọ́ pé Jésù dé láti Jùdíà sí Gálílì, ó lọ bá Jésù, ó sì bẹ̀ẹ́ kí ó wá láti wo ọmọ rẹ̀ tí ó ń kú lọ sàn. ⁴⁸ Jésù dàa lóhùn pé, "Bí ẹ̀yin kò bá rí isẹ́ àmìn àti ìyanu, ẹ̀yin kò ní gbàgbọ́. ⁴⁹ Ìjòyè náà sọ fún un pé, " Ọ̀gbẹ́ni, sọ̀kalẹ̀ wá kí ọmọ ọ mi tó ó kú. ⁵⁰ Jésú dáa lóhùn, "Lọ, ọmọ ọ̀ rẹ yè," Ọkùnrin náà gbaa ọ̀rọ̀ tí Jésù sọ fún un gbọ́, ó sì lọ. ⁵¹ Nígbàtí ó ńlọ, ọmọ ọ̀dọ̀ ọ̀ rẹ̀ pàdé e rẹ̀, ó sì sọ fún un pé ọmọ ọ rẹ́ ye. ⁵² Ó bèèrè àsìkò tí èyí ṣẹlẹ̀. Ó sì dá a lóhùn wípé, "Ní àná ní wákàtí keje ni àrùn ibà náà fi sílẹ̀." ⁵³ Nígbà náà ni bàbá ọmọ náà kíyèsi wípé ní wákàtí tí Jésù sọ pé "Ọmọ ọ̀ rẹ́ yè." Nítorí ìdí èyí, òhun àti gbogbo ilé e rẹ̀ gbàgbọ́. ⁵⁴ Èyì ni iṣẹ ìyanu kejì tí Jésù ṣe nígbàtí ó wá sí Jùdíà, ti Gálílì.