¹ Nísinsìnyí kí àsè àjọ ìrékọjá tó dé. Jésù mọ̀ wípé àkókò rẹ titó láti fi ayé yìí sílẹ̀ kí ó sì kọjá lọ sí ọ̀dọ̀ Baba. Bí Ó ṣe fẹ́ àwọn tirẹ̀ tí ó wà nínú ayé, Ó fẹ́ wọn títí dé òpin, ² Nísinsìnyí èsù ti fi sí ọkàn Júdásì Ìskárọ́tù ọmọ Símónì, láti fi Jésù hàn. ³ Ò mọ̀ pé Baba ti fi ohun gbogbo sí ìkáwọ́ Òun àti wípé bí Ó ti wá láti ọ̀dọ̀ Ọlọ́run tí Ó sì ń padà lọ sí ọ̀dọ̀ Ọlọ́run. ⁴ Ó dìde nínú oúnjẹ alẹ́ Ó sì bọ́ asọ ìwọ̀lékè Rẹ̀. Nígbà náà ni Ó mú aṣọ ìnura kan, ó dàá bo ara rẹ̀. ⁵ Nígbà náà ni Ó da omi sínú agbada Ó sì bẹ̀rẹ̀ síí wẹ̀ ẹsẹ̀ àwọn ọmọẹ̀yìn náà Ó sì nùn ún pẹ̀lú asọ ìnura tó dà bo ara rẹ̀. ⁶ Ò wá sọ́dọ̀ Símónì Pétérù, Pétérù sì sọ fún un pé, "Olúwa, ṣé ìwọ yóò wẹ ẹsẹ̀ mi nù?" ⁷ Jésù dáhùn, Ó sì wí fùn un pé, "Ohun tí Èmi ń se kò yé ọ nísinsìyí, ṣùgbọ́n èyí yóò yé ọ tó bá yá." ⁸ Pétérù sọ fún un pé, "O kò ní wẹ ẹsẹ̀ mi láí. "Jésù dáa lóhùn pe, "Tí Èmi kò bá wẹ̀ ọ́, ìwọ kò ní ìpín pẹ̀lúù Mi." ⁹ Símọ́nì Pétéru sọ fún Un pé, "Olúwa, máse wẹ ẹsẹ̀ mi nìkan, ṣùgbọ́n àti ọwọ́ àti orí ì mi pẹ̀lú." ¹⁰ Jésù sọ fun pé, "Ẹni tí a ti wẹ̀ kò nílò àtúwẹ̀, bíkòse pé kí á wẹ ẹsẹ̀ rẹ̀; ṣùgbọ́n ó mọ́ pátápátá; ìwọ mọ́, ṣùgbọ́n kì í ṣe gbogbo ènìyàn." ¹¹ (Nítorí tí Jésù mọ ẹni tí yóò fi í hàn, ìdí nì yí tí ó fi wípé, "Kì í ṣe gbogbo yín ni ó mọ́.") ¹² Nígbàtí Jésù ti wẹ ẹsẹ̀ wọn, tí ó sì ti mú ẹ̀wù Rẹ̀, tí Ó sì tún jókò, Ó wí fún wọn pé, "Ǹjẹ́ ẹ̀yin mọ ohun tí mo ti ṣe fún un yín? ¹³ Ẹ pè mí ní 'Olùkóni' àti 'Olúwa,' bí ó ti rí ni ẹ̀yín ń wí, nítorí pé bẹ́ẹ̀ni Èmi jẹ́. ¹⁴ Bí Èmi tí Ó jẹ́, Olúwa náà àti Olùkóni náà, bá ti wẹ ẹsẹ̀ yín, kí ẹ̀yin pẹ̀lú wẹ ẹsẹ̀ ara yín. ¹⁵ Nítorí tí mo ti fún un yín ní àpẹrẹ, kí ẹ̀yín pẹ̀lú náà le ṣe gẹ́gẹ́ bí mo ti ṣe fún un yín. ¹⁶ Lootọ, lootọ, ni mo wí fun yín, ọmọ ọ̀dọ̀ kò ju ọ̀gá rẹ̀ lọ; bákan náà ni ẹni tí a rán níṣẹ́ kò ju ẹni tí ó rán an lọ. ¹⁷ Tí ẹ̀yin bá mọ nǹkan wọ̀nyí; alábùnkúnfún ni yín, tí ẹ̀yin bá ṣe wọ́n. ¹⁸ Èmi kò wí nípa gbogbo yín; mo mọ àwọn tí mo ti yàn - ṣùgbọ́n èyí ri bẹ́ẹ̀, láti le mú Ìwé Mímọ́ ṣẹ: 'Ẹnití ń bá mi jẹun pọ̀, gbé gìgísẹ̀ rẹ̀ sókè lòdì sí mi. ¹⁹ Mo sọ èyí fun yín nísinsìnyi kí ó tó ṣẹlẹ̀ pé tí ó bá ṣẹlẹ̀, ẹ ó le è gbàgbọ́ wípé Èmi ni. ²⁰ Lótìítọ́, lótìítọ́, ni mo wí fun yín, ẹni tí ó bá gba ẹniyòówù tí mo rán, ó gbà mí; àti ẹni tó bá gbà mi, gba ẹni tó rán mi. ²¹ Nígbà tí Jésù wí èyí, ọkàn Rẹ̀ dàrú. Ó jẹri si, Ó sì wípé; "Lotìítọ́, lotìítọ́, ni Mo wí fun yín pé ẹnìkan nínú yín yóò dàmí." ²² Àwọn ọmọẹ̀yìn wo ara wọn, ó yà wọ́n lẹ́nu ẹni tí ó ń wí nípa rẹ̀. ²³ Ọ̀kan nínú àwọn ọmọ ẹ̀yìn, ẹnití Jésù fẹràn, fi ara tì ni ẹ̀bá tábìlì tó dojúkọ Jésù. ²⁴ Símọ́nì Pétérù fi ara sọ̀rọ̀ fún ọmọ ẹ̀yìn yí wípé, "Béèrè lọ́wọ́ Rẹ̀ ẹnití ó ń sọ̀rọ̀ nípa rẹ̀." ²⁵ Nígbà náà ni ó fẹ̀hìn ti ẹ̀gbẹ́ Jésù padà ó sí wí fún un pé, "Olúwa, tani í se?" ²⁶ Nígbà náà ni Jésù dáhùn, " Òun ni ẹniti Èmi yóò bu búrẹ́dì fun tí N ó sì fi fún un." Nígbàtí Ó ti bu búrẹ́dì náà, Ó fi fún Júdásì ọmọ Símónì Ìsìkárọ́tù. ²⁷ Lẹ́yìn jíjẹ búrẹ́dì; Èṣù wọnú rẹ̀. Nígbà náà ni Jésù sọ fún un pé, "Ohun tí ìwọ ń ṣe, ṣeé kánkáń." ²⁸ Nísinsìnyí kò sí ẹnìkan tó fara ti tábìlì tí ó mọ ìdí tí Ó fi sọ èyí sí i. ²⁹ Àwọn kan rò wípé, nítorí ti Júdásì jẹ́ akápo, Jésù sọ fún un pé, "Ra ohun tí a nílò fun àpèjẹ náà," tàbí kí ó le fi nǹkan fún àwọn tálákà. ³⁰ Lẹ́yìn tí Júdásì gba búrẹ́dì, ó jáde lọ lẹ́sẹ̀kẹsẹ̀. Alẹ́ ti lẹ́. ³¹ Nígbà tí Júdásì ti lọ, Jésù wípé, "Nísinsìnyí a yin Ọmọ Ènìyàn náà lógo, àti wípé Ọlọ́run di àyìnlógo nínú rẹ̀. ³² Ọlọ́run yóò ṣeé lógo nínú ara Rẹ́, àti wípé, yóò sì ṣeé lógo lẹ́sẹ̀kẹsẹ̀. ³³ Ẹ̀yin ọmọdé, Èmi wà pẹ̀lú u yín síbẹ̀ fún àkókò díẹ̀. Ẹ ó wá mí, àti wípé, bí mo ti sọ fún àwọn Júù náà pe, 'Níbi tí mo ń lọ, ẹ̀yin kò le wá.' Nísinsìnyí mo tún sọ èyí fún yín. ³⁴ "Òfin titun ni mo ń fi fún yín, wípé kí ẹ fẹ́ràn ara yín; bí Mo ti fẹ́ràn yín, bẹ́ẹ̀ pẹ̀lú ni kí ẹ se fẹ́ràn ara yin. ³⁵ Nípa èyi gbogbo ènìyàn yóò mọ̀ pé ọmọlẹ́yìn mi ni ẹ̀yin ń ṣe, tí ẹ̀yin bá ní ìfẹ́ sí ara yín." ³⁶ Símónì Pétérù sọ fun pé, "Olúwa, níbo ni ìwọ ń lọ?" Jésù dáhùn, "Níbi tí èmi ń lọ, ìwọ kò le tẹ̀lé mi lọ nísinsìnyí, ṣùgbọ́n ìwọ ó tẹ̀lé mi lọ nígbà tó bá yá." ³⁷ Pétérù sọ fún un pé, "Olúwa, kíló dé tí èmi kò le tẹ̀lé ọ nísinsìnyi? Èmi yó fi ẹ̀mí mi lélẹ̀ fún ọ." ³⁸ Jésù dáhùn, "Sé ìwọ yóò fi ẹ̀mí rẹ lélẹ̀ fún mi? Lótìítọ́, lótìítọ́, ni mo sọ fún ọ, àkùkọ kò ní tí ì kọ, kí ìwọ tó ṣẹ́ mi lẹ́ẹ̀mẹta.