¹ Ma vurte ci kaal balik iyelai ke, oot Mosesi ki Aaron ngati Varo iztek ne, "Gi ci anneket Maanyi Tamutadden ci Israilo icu, azine: 'Anyik ol cigani koot, kar koot kanyait kwor cinani baazia.''' ² Azi Varo ne ngene ceen Maanyi? Okko zooz ci niyo kar kizik muluk ci Maany kar kanyk olli Israilo koot? Irong anna kagga Maanyi; kar vodok irong kanyik olli Israilo koot.'' ³ Azi nege ne, "Karumona ki Tamutadden ci olli Iburu. Ivita kanyait eroni ci inya iyyo koo balala kar koo kapaktek Maanyi wawac ka ci irong enne edezet agit morizowe icima illanyai.'' ⁴ Annek abarik alani ci Masiro nogo ne, "Ovvoyu inna Mosesi ki Aaron ol linglingonte cineng nga? Imirte oot linglingonte cinong.'' ⁵ Annek nogo ne izeto olli Iburu meele looce cinang ko, anyiku niga nogo kibilet tiice cineng.'' ⁶ Iiwe neci elle, anyik Varo ol wak agam linglingon ki ol wak iyelik ol tiic zooz ci ovvo nege anu. Izek ne, ⁷ Ma ngan anyiku ol neko keen cik yayau ki baliye kidimante tuub. Anyik nogo koot kulutta maciggia. ⁸ Anycik abarik nogo kurukta tuub cik aduwo ki balike. Ma elemnanu tuub cikidik eeci nege egin gurrwa. Gi ci azi nege ne inyet kottia kar kotodongteya wawac Tamutadden,' ⁹ Otortek nogo tiic kar kaanyik nogo kilinglinget kerehek zooz ci alute ol nogo volonga.'' ¹⁰ Oot ol wak agam linglingon ki ol iyelik ol tiic uduktak ol. Izetek ne, "Gi ci aduwaket Maanyi icu: "Irongan anna kanyung iget keen cik yayau. ¹¹ Oot niga maciggia orongta ngati arubanu. Irong abarik tiici cinong oboda ki vurut.''' ¹² Azantozik oll looc ci Masiro koot kuluta varany cik yayau. ¹³ Annek ol wak ebek nogo linglingonta ne, Edecca tiic cinong ki baling anyahakung ol keen cik yayau ke.'' ¹⁴ Abic ol wak Varo agam linglingon ol wak Israilo ebek ol tiica, ol nek anyik nege kagamit ol wa alinglingi. Emenna ol wak agam linglingo ajin nogo annek ne, "Nya mang irong aruwanu tuub cik orong ol ngatinong ko, baluwaz ki wanycu, ki baligon mang ogonu niga baliye ke? ¹⁵ Ivita ol wak ebek Israilo tiica utuluzek Varo izetek ne, "Nya mang ogonet niko ko? ¹⁶ Irongan ol anyik ducak cugunek yaya, anneket abarik nege ne 'urukta tuub!' Arukkiet ol agit ducak cugunek, abacit ol cugunek.'' ¹⁷ Annek abarik Varo nogo ne "Eginu niga gurrwa! gurrwa! Anu niga ne, inyet agit kootia kotodngtozia Maanyi.' ¹⁸ Imirte oot tiica. Irongan ol anyahakung keen wak yayau, oot niga urukta tuub cik aduwo ki balike.'' ¹⁹ Agac ol wak ebek ol tiica Israilo mang avuto nege pirnata baling aduwak ol nogo, "Ma obodanu tuub nek aruwanu ko kize idice.'' ²⁰ Oot nege urumto ki Moses ki Aaron, balik abille cee ci alano boica ke, baling iyokta nege ngati Varo. ²¹ Annek nege Moses ki Aaron ne, "Anya Maanyi kicinung kar kedezung igeta, eeci anyetu niga agit kedezewa ngume ci Varo ki ducak ciginnek. Utugu ki ci ariku niga nogo nyatubanya azzin kuruktet agita.'' ²² Uuk Mosesi uduwak Maanyi izek ne, "Maanyi, nya ming anyii ol kipirta ko? Itona arak inna anit owa nya? ²³ Baligon mang koko anna ngati Varo ke koko kaduwak nono zooz ci obod ki inneta, anyik zooz neci kokoye anna ngatine ke pirnanet ol, kar inna nganie anyik ol cugunek kartai.''