1 Uduwak Manyi Muses anek ne, ''Eted lotabokwa ramma cik biyenu ki lotabokwana balik otonu ke. Keherek atin Anna zooz bali eherie lotabokwane ibalik oou ke, lotabokwa ciko. 2 Rewo loza ngeriet kar todak bee ci Sinai, kar yelika ele cune Annit nginati biya taddena. 3 Iloi eet imma ci otoda tadden imma ineta. Manyik eet imma do kiyelai ngamani biya taddena. Iloi eeza icima tin cik ege owe ci biyo.'' 4 Eted zin Musesi lotabokwa nek een ramma ke ki gonokja balik otinu, kar enne kitinga ngeriet ingani kuk biye ci Sinai, ki bali ming uduwak Manyi nono. Odong Musesi lotabokwa cik biyenu atie cine. 5 Ulucai Manyi looc diizoca kar kibilet ki Muses nginati, kar Enne kutu zar ''Manyi.'' 6 Uk Manyi owe cine kar kutu, ''Manyi, Manyi, alaniket Tamutadden munyen cigac kar kubunaeta, irong adunya zinin ataman, kar kize apwa ganona tuwenta ki gawinet wa enne dede, 7 odowa ganon tuwenta ci bulok cik melek giir atin aritai, alalnei bacinok, ki munyen. Eci zin atin enne ladu adita ol cik munyenu. Anyaha atin enne dezinet ci betik dolinu munyenu anyahak doli cigek ki doli cik doli cigek, zii rok kuzuca bulok iyoo ki wec cik arigizung.'' 8 Ulucek Musesi oo cine looc ataman kar kalawo. 9 Kar enne kize ne, ''Ming kuruba anna iyokonokou lali otone cune, Manyi wanani, iyoko zin ko ki agita, eci ol ciko aminyminyi. Tung nono bacinok cigak ki munyen, kar bitet agit karagizti inneta.'' 10 Ize Manyi ne, ''Icinto, kize Anna ojon kidiman gano. Ngume ci ol cigok velek, kogoni atin Anna vulanet ci da ngen kutuguwe loota dook icima orgemani. Acin atin ol cik avtu imma iget dook kaal cik kogoni anna, eci een gi ci onglie ol neci kogonikung Anna iget ke. 11 Nu zooz ci kodolaki Anna innet wanycu. Kize Anna ojon kutungekung iget Amorats, Cananait, Hittites, Perizzaits, Hivaits, ki Jebusaits. 12 Avuto jurum ma aganonu ki ol nek abak looce neci okoye inna ke, icima atin nege egin lovidit ngatinong. 13 Abarik, niga ladu udultek itelenya cigek looc, azanit lolanya cigek ngin wak adingdingan nege een biyen, kar etedek lolanya wak een Asherah looc. 14 Iyoko zin niga ladu ma alayu tamutadden imma do, kize cinani, Manyi, wa irong zara 'Atalne,' keni anna Tamutadden ci irong katalne. 15 Igenyit maganonu ki ol cik abak looce neci, ming ogon nege aliyakzet ci tamutatsddenet cigek eletine cigek kar kazacek wawac tamutaddenet cigek, kar eeti imma kuwung iget kar niga adait wawac cine. 16 Ma ladu anyiku logoz ugok kitiyet doli cigek ngayek, kar doli cigek kutuguzek aliyakzet ci eleti cigek tamutaddenet cigek, kar nege kanycik logoz ugok kutuguzek aliyakzet ci eleti cigek tamutaddenet cigek. 17 Ma adimanaku eleti cigok tamutaddenet cik urtai een ibolen. 19 Een abunya velek ciganik, rok abunya cik tinu macik, elenya dook ki azza. 20 Utuya ladu bodok abu ci zigiro nyone ci azzeto, ming irong utanu de, udulet zin ladu niga inyati cigek. Utuya ladu bodok niga abunya cigok macik velek. Iloi woye eet imma ci iyelsi ngume cinani azine olin. 21 Alinglingnyu woye niga inya torkonom, maje iten ci een turgerem niga ladu iyebezit. Rok inyawe cik evintak ki cik tedintak, ladu iyebezit. 22 Adia ladu niga kwor ci inya wak een turgerem een ooti tedintak, kar bodok ladu odoya kwor ci dainet wak alutai vurte ci erkito icima ming edecai erkit. 23 Anycik ol cigok macik dook ladu kiyeltai ngume cinani, Manyi, Tamutadden wa Israilo lak iyoo erkiyai dook. 24 Iyoko atin anna kotoi orogjok owe cinong kar kizahe lokoret cigok. Iloi atin eet imma ci orong kito looc cinong ibatine kar kuwe nono ming niga ovoyu rok kar iyeltai ngume cinani, Manyi, Tamutadden wanong, lak iyoo erkinyai dook. 25 Ma ladu niga adimanu biye cik wawac cinani cik arumze ki ubula, icima iding imma wawace ci kwor ci lugezo kutungozik kize ci ngerietino. 26 Anyakta ladu niga oyau wak azize abire owa manene cigok anyaktak ceez cinani. Ma ladu niga aku eez ci dici ngen oroit irra cik yatine.'' 27 Uduwak Manyi Muses izek ne, ''Teherik zozok ciko looc, eci Anna kodolaha elecinan zozok cik balik kozoza ko, kar bali anna kutugu gano imma iget ki Israil.'' 28 Avte baliye Musesi ki Manyi nginati wazinok moten wec ki balinok moten wec; irong baliye enne adak ahat imma icima aud maam uge. Eherek enne lotabokwa zozok cik ganono, lotinok wak een omoto. 29 Bali ming ulucai Musesi biye ci Sinai ki lotabokwa cik een rama ganono odolta azine ciginek, irong baliye enne aga rucenit ci ngum cine ming atarane ngati ozozone ki Tamutadden. 30 Bali ming icinet Aruni ki oli Israilo Muses, bali ming atarane ngum cine, kar bali nege otongolte kivitak nono ojonun. 31 Eci zin Musesi utu nogo, ki Arun ki dikiriok cik boriou dook kivita rok nono. Kar zin Musesi kozozo ki nogo. 32 Bali vurta, ivitak ol cik Israilo dook Muses, kar enne kuduwak nogo kaal balik odolak Manyi nono biye ci Sinai ke velek. 33 Bali ming edeca Musesi zoz ki nogo, ubung enne ngum cine. 34 Atigon ming uk Musesi owe ci Manyi kar kozozo ki nono, ara enne rum wa abilek ngum. Kar zin enne kitimek rum de ming iyowa tita. Iyowa enne tita kar kuduwak oli Israilo zoz ci aduwak nono Tamutadden. 35 Icinet oli Israilo ngum ci Musesi ming atarane. Eci zin atin enne abilek rum ngum cine de zii kimire kot kozozo ki Manyi.