¹ Ozozik Manyi Muses anek ne, ''Bit ngatu, inna ki ol balik anyaha inna looce ci Masiro ke. Bit looce bali kuturaha Anna Aburaham, Aisak ki Jakob, ngati Anna kuduwa kize ne, 'Kanyik atin Anna doli wak aragizung igeta.' ² Kitoni atin Anna tonait owe cinong, kar bodok atin Anna kamadani ol cik een Kananait, Amoait, Hitites, Perizait, Hivait, ki Jebusait. ³ Bit looce neci, abize irana ki letec ke, eci atin anna irong kovo ki igeta, marit ming eginu niga ol cik aminyminyu. Gere ming kazanung gola.'' ⁴ Bali ming iziyet ol zozok cik auce ko, utuluzo nege, kar kizii rok eet ci aim rok diditac. ⁵ Uduwak Manyi Muses anek ne, ''Duwak oli Israilo izek ne, 'Eginu niga ol cik aminyminyu. Ming kot anna ki iget doyoit, kadita woye Anna igeta. Iyoko zin, arta didita kar Anna kinon zoz ci kogonikung igeta.''' ⁶ Kar oli Israilo irongen didita biye ci Herobi udut. ⁷ Idima Musesi ceez wa een titi kar kitivicek nono renun ci orok wa aragine ol, rena orge ci raginto. Au enne nono kize titi ci rumonto. Ot ol dook wak ijinet Manyi gima rena tite wa rumonto, renne ci orok wa aragine ol. ⁸ Ming oko Musesi renna tita, abile ol dook jena titete cigek aranite kar kicinet Muses zii kuk cato. ⁹ Odoize ming izo Musesi titi, aku diiz ci adikire akunak looc kar kibil arane ci tito, kar Manyi kozozit ki Muses. ¹⁰ Ming icinet ol diiz ci adikire ming abile arane tito, ingazi nege jena kar kalayo, ol cik macik dook ngengene arane ci titi cine. ¹¹ Ozozik Manyi Muses ngati acinone ngumti, koyoko eeti ci diri ming ozo goni. Kar gon Musesi kimire kuk orge wa raginto, eci zin ducsiti waine Joswa ngerti Nuni, logut wa dici ave tita. ¹² Izek Musesi Manyi ne, ''Cino, aneka baliye Anna annit ne, 'Bite ol ciko eroninte cineng,' eci zin inna ngen duwaka annit kaga eet ci itonet inna ki annita. Azi inna ne, 'kagayi Anna innet zare, kar bodok inna muda lali otone cinani.' ¹³ Iyoko ming da anna kumuda lali otone cune, yelika annit golok ugunek kar anna abuna ming kagayi inneta kar bodok atigon kuruba lali otone cune udut. Ga zi niko een orogi cu ol ugunek.'' ¹⁴ Abarizek Manyi, ''Korkor atin anna ki inneta, kar atin kanyi yebezi.'' ¹⁵ Uduwak Musesi nono anek ne, ''Ming irong inna kovo ki agita, ma odongnyet agit ngatu. ¹⁶ Iyoko zin, agaye wuca enne ku azi ne kuruba anna lali otone cune, Anna ki ol cigunek? Irong wuca stin een ming kovo naga ki Innet kar anna ki ol cigunek kongoroktowa ole wa avte loota?'' ¹⁷ Uduwak Manyi Muses izek ne, "Kogoni bodok atin gi ci bali ala inna ke, iyoko inna uruba lali otone cinani, kar Anna kagayi inna zare.'' ¹⁸ Ize Musesi ne, "Iyoko yelika annit dingdinganinet cune.'' ¹⁹ Ize Manyi ne, ''Kanyik atin Anna bunat cinani kuk owe cunong, kar atin Anna kutu zar ciganik een 'Manyi' owe cinong. Kalalnek atin Anna ol cik atin Anna kalaliya, kar bodok atin kiyela lali ci kalanei munyen ole wak atin kiyela Anna lali ci munyenu.'' ²⁰ Eci zin Manyi azi ne, ''Irong woye niga acinu ngum cinani, iyoko iloi wuca eet ci acina annit kar kuruk.'' ²³ Ize Manyi ne, ''Icinto, icu nginima ngatinani ko; abilu atin niga biye cu. ²² Maje ngatu doizi cinani oko, karikung atin Anna iget lorohoc ci luduci uni biyo kar kubungung atie cinani zii kozoro Anna. ²¹ Kar atin Anna kidimak azit cinani tu, kar atin niga icinet boic cinani, eci zin atin ngum cinanie irong iyelyai.''