¹ Bali ming icinet ol Moses avu umuc biya taddena, ivita nege ulutozik Arun kar kizetek nono ne, ''Ija, kar dimaniket agit tamutadden ci lootu ci atin oko owe cinang. Marit ming een niko Muses, eet wa anyahanet agit looce ci Masiro, irong naga kagaya zoz ci alam nono.'' ² Kar Aruni kuduwak nogo anek ne, ''Idimtak zurtenen nek mantik ko tu inne cik ngai cigok' ki inne cik logoz cigok, ki doli wagwok ngayek kar anyaktahang annita.'' ³ Okta ol dook zurtene balik inne cigek ke kar kanyaktak Arun. ⁴ Agama enne zurtenen ngatineng, itur nono, kar kidiman kutugu ki molti ci amadai. Izeto zin ol ne, ''Israil, tamutadden necinong anyahanung looce ci masiro ke icu.'' ⁵ Bali ming icin Aruni niko, eteny enne itele owe ci molto kar kuwahek; anek enne ne, "Een loza iten ci kwor ci kongoline Manyi.'' ⁶ Itingta ol ngeretin ci reng kar kanyakta muci wak atuze kar bodok kanyakta muci wak arumzene. Kar zin nege kavuto loota kadait kar kude, kar kitingta jena katararit, kawalwalit baita talninta zara. ⁷ Kar zin Manyi ozozek Muses anek ne, ''Bit ataman, ole ole cigunek, wak anyaha inna looce ci Masiro, ongotanit eleti. ⁸ Utungtek nege gol bali kodolaha Anna nogo ke ataman. Amadiak nege eleti cigek molet kar kalac nono kar bodok kazacek wawac. Izeto nege ne, 'Israil tamutadden cinong icuwo wa anyahanung iget looce ci Masiro.''' ¹¹ Izek zin Manyi Muses ne, ''Kicina anna ol ciko. Cino, een nege ol cik etez zoz avte ngatirir. ¹⁰ Iyoko zin, matimani biliza annita. Atuze atin moxinet cinani kabur ngaten nogo, iyoko atin anna kazani nogo. Kar atin Anna kidiman orok ci adikire ngatinong.'' ⁹ Eci zin Musesi atiman kalalizan Manyi Tamutadden cine. Ize enne ne, ''Manyi, inya mozinet cune ming atuze ole cigunek ko, wak anyaha Inna looce ci Masiro doize wa okomi kar atie wa okomi ko? ¹³ Inyaa zin oli Masiro ming azi ne, 'Uwe enne nogo gerzet ibatine, kar kuruk nogo biyene kar bodok kazan nogo ngume ci lootu? Boda mozinte cune atuze kar bodok bil dezinte cu ole cigunek. ¹² Tuweka annit Aburaham, Aisak ki Israil, ducak wagunek, balik uduwa inna ellia kar ize ne, 'Kanyik atin Anna doli wak aragizung iget kize mele kiwagon munyunya tamutaddena, kar atin kanyik doli wak aragizung iget looc cu dook wa kuduwa Anna. Aragiz atin nege nono udut.''' ¹⁴ Kar zin Manyi kibiliz dezinet bali enne azi ne inak ol ciginek ke. ¹⁶ Utuhuwe zin Musesi kar uluce uk biya vurta, atik ki biyen ramma cik ganono odollai azine ciginek. Eherie baliye biyena loloknyai cigek dook, abanyoi velek nguma ki eci boico. ¹⁵ Een baliye biyena neke linglingon ci Tamutaddeno ellia, kar bofok teherinet een ci Tamutaddeno, ci ehedie biyene. ¹⁷ Bali ming izik Joswa gernyi ci olu ngati awalwale, izek enne Muses ne, "Anyak walwali ci joro orgewa wa aragine ol." ¹⁸ Eci zin Musesi ize ne, "Irong een muluk ci eet ci azan modo, kar bodok irong een muluk ci eet ci ol cik aznit modo, eci een muluk ci beninto ci kaziny Anna." ¹⁹ Baling uk Musesi orge wa aragine ol, icin enne molet ki ol ming arugumi. Udunya enne zinin. Ujuka enne biyen wak eheronik lotinowa azine kar kilib nogo biya orgena. ²⁰ Idima enne molet bali idimanit ol ke, utuz nono, erek kize ovwo, kar kudutek nono maam. Kar anyik ol cik Israilo kudet nono. ²¹ Kar Musesi izek Arun ne, "Utuguzei ete ol neko innet nyaa, ci anyahau nogo munyen cik melek nokou?' ²² ' Ize Aruni ne, ''Madunya zinin orot, dikiriot cinani. Aga inna ol ciko, ngati ogone kaal cik gerzek. ²³ Aneka nege annit ne, 'Dimaniket agit tamutadden wa dici lotu ci atin oko owe cinang. Marit ming een Muses, eet wa anyahanet agit looce ci Masiro, irong naga kagaya gi ci alam nono.' ²⁴ Kar anna kizek nogo ne, 'Eeti ci anyak zurtenit imma, anyik kokolik tu. Anyca nege annait zurtenen kar anna kokolik gwo, kar kidimak molet cu tu.''' ²⁵ Bali ming icin Musesi iviret ol gerzet, iyoko Aruni utungaet nogo laminta, ki dacinet modene cigek. ²⁶ Kar zin Musesi kibil arane ci orok wa raginto kar kize ne, ''Eeti ave lolokte ci Manyi ijaka annita.'' Ulutai ol cik een Levait velek uburuwet nono. ²⁷ Izek enne nogo ne, ''Manyi, Tamutadden wa Israilo, ci azi noki: 'Anyik ol cik macik kiyikte nyatubatnya abanyoi cigek kar kimirte kar bodok kiyikte kote aranite cik orok wa raginto dook, kar kuruk gotoni, ngaa cine icima maac, ki lecari cine.''' ²⁸ Utuguzo ol cik een Levait zoz ci odola Musesi. Iten neci adaito ol cik macik een moten omoto lak moten omoto lak iyoo. ²⁹ Izek Musesi ol cik een levait, ''Artoziu niga linglingon ci Manyi wanycu, iyoko niga utuguzu ngengene gerzet ngati gotononi, iyoko zin Manyi anyung mayuwenet wanycu.'' ³⁰ Iten imma uduwak Musesi ol anek ne, ''Utuguzu niga munyen cik malek orot. Iyoko atin anna koko rok Manyi. Icima woye anna kadimani munyen cigok.'' ³¹ Imire Musesi uk ngati Manyi kar kize ne, ''wuk, utuguzo ol ciko munyen cik gerzek orot kar nege eletine kalac zurtenit kize tamutadden cineng. ³² Eci zin iyoko, laliye munyen cigek; eci zin ming irong inna orongi, dimak zar ciganik tu buwe bali eheri Inna.'' ³³ Uduwak Manyi Muses anek ne, eet ci utuguweya annit munyen, kadimak atin anna eet neci tu buwe cinani. ³⁴ Iyoko zin bito, bite ol ciganik ngibali kuwahi Anna innet ke. Cino, oko atin tonaiti cinani owe cinong. Eci zin iten neci Anna kedezi nogo, kedezi atin Anna nogo munyene cigek.'' ³⁵ Kar zin Manyi itonek dezinet ol marit ming idimanit nege molet, bali adimana Aruni.