¹ Otozo ol ngati een Elim, kar zin kolle ci ol cik Israilo do̱o̱k i̱vi̱ta̱k balal ci nginti een Sin, ci orgene ci Elim ki Sinai, wazin wa een o̱mo̱to̱ ki tu̱r nye̱lo̱we̱ wa een ram ngati utungtehe lo̱o̱c ci Masiru lo̱o̱c. ² U̱tu̱lu̱ze̱k ol cik Israilo do̱o̱k Moses ki Aaron balala. ³ Izetek Israili nogo ne, "Wo̱ye̱ da ku̱ru̱kte̱ a̱tte̱ ci Manyi kadait lo̱o̱ce̱ ci Masiru baling kavte i̱jjo̱nya̱ne̱ cik i̱di̱nga̱k kar zin kadait umunet katanyarit ke. Anyahait zin inna aget balal cu kar ru̱we̱t kolle do̱o̱k magiza kadakta." ⁴ Izek zin Manyi Moses ne, "ka̱ddu̱ta̱ umunet ta̱mu̱-kenga ki wagon ta̱mu̱ ci atile. Ovvo atigon ol aluta odohize ci elenno ki dainet ci wazin neci kar zin anna kitiman ming abure icima anu lo̱ti̱nno̱k waganik. ⁵ Wazine wa een torkonom, aluta atin nege lak ram ci a̱pu̱e̱ kommog bali gon da u̱lu̱ta̱ odohize, kar zin kait ci anyaha orog." ⁶ Izettek Musa ki Aaron ol wak Israilo ne, "Agayu atigon yo̱mo̱na̱ ming een Manyi ci anyahanung lo̱o̱ce̱ ci Masiru. ⁷ Acinu atigon nge̱rre̱t a̱pi̱nze̱t ci Manyi ngati azikne enne ngunnguni cinong oyoku nonno. E̱e̱gi̱na̱ naga ciko ngene kar u̱tu̱lu̱ze̱tu̱ ageta?" ⁸ Ize zin bo̱do̱ko̱ Musa ne, "Agayu atin ming aanyung Manyi i̱di̱ng yo̱mo̱na̱ kar zin umunet nge̱rre̱t atanyarit- ma̱rri̱t enne ming u̱tu̱lu̱zu̱ ngati ozozu nonno gerzet. Keginna anna ki Aaron nya̱a̱? Irong ogoi cinong oyoket ageta; oyok abarik Manyi." ⁹ Izek Musa Aaron ne, "Izek kolle ci olli Israilo ko do̱o̱k ne,'I̱vvi̱ta̱ izet ojone ngu̱me̱ ci Manyi, ma̱rri̱t enne ming izik ogoi cinong.'" ¹⁰ I̱ki̱ya̱ zin, baling okko Aaroni ozozik kolle ci zu̱we̱ ci Israilo do̱o̱k, icinet o̱to̱n ci okko ki balal, wu̱i̱, icinet zin a̱pi̱nze̱t ci Manyi ming i̱ye̱lla̱i̱ di̱i̱zo̱ca̱. ¹¹ Kar zin Manyi kozozik Moses izek ne, ¹² " Kiziya anna u̱lu̱wa̱ ci olli Israilo. Zo̱zi̱k nogo izek ne, 'adaku atigon yo̱mo̱na̱ i̱di̱ng, okko nge̱rre̱t adaku umunet. Kar zin aggac ming keeni anna Manyi, Ta̱mu̱ta̱dde̱n wannong.'" ¹³ I̱vvi̱ta̱ ngati okko ki yo̱mo̱n kaala cik e̱e̱gi̱n quild kozorotte nginati arirek nege ti̱te̱t ke̱. Ma̱i̱je̱ nge̱rre̱t aburuk zizi ngineci ti̱te̱tu̱ ke̱. ¹⁴ Baling u̱tu̱ru̱rte̱ zizi, icinet di, u̱mu̱dda̱i̱ lo̱o̱ta̱ balala kaala ugak cik idik lo̱bo̱nyi̱k erere kiwagon teltelena wak ta̱mwa̱k amadonik lo̱o̱c. ¹⁵ Baling icinet ol wak Israilo, izetto ne, "Nya̱a̱ necu?" Ngen zin nege kagac nya̱a̱ da neci. Izek Musa nogo ne, "Umunet cik aanyung Manyi iget adait. ¹⁷ Zoz zin ci odola Manyi icu azi ne: 'U̱lu̱ta̱, ngen ngene ngatinong, ci elenno wo̱ye̱ kadak, i̱ya̱bta̱ ci a̱bbi̱ze̱ gi̱i̱ ci een omer ci e̱e̱t ci o̱de̱ olle cik ce̱e̱z cunne. U̱lu̱ta̱ gole cu: U̱lu̱ta̱ ci adak ol wak abaak te̱te̱ cunne ka̱ta̱nya̱ri̱t. ¹⁶ U̱tu̱gu̱zo̱ ol cik Israilo ki i̱yo̱ko̱ ming a̱du̱ya̱i̱ ke̱. U̱lu̱ta̱ ol ugak cik me̱e̱le̱k, u̱lu̱ta̱ ol ugak cik idik. ¹⁸ Baling ovvo i̱ya̱b ya̱bzi̱nte̱ ci een omer, a̱vu̱to̱ ol balik u̱lu̱ta̱ ci a̱pu̱we̱ ke̱ o̱lli̱n, ma̱i̱je̱ bali̱k u̱lu̱ta̱ ci dici ke̱ irong amacce. U̱lu̱ta̱ ngen ngenne ci elnno ki nogo. ²⁰ Kar zin Musa izek nogo ne,"Irong e̱e̱ti̱ imma anyikza imma kize ci nge̱rre̱ti̱nu̱." ¹⁹ Abarik zin, Irong ngen aziye Musa. I̱nyi̱kta̱ ol ugag imma katangu ro̱k ngi̱rre̱t, utuhuwe zin abarik ize u̱lu̱t kar zin ku̱mu̱. Omoze zin Musa ngati neng. ²¹ U̱lu̱tta̱ zin gon nge̱rre̱t ki nge̱rre̱t. Uluta ngen ngenne ci adak ke̱le̱zzo̱ wazin neci. Baling a̱bu̱r kor, eletane. ²² Ma bali wazine wa een torkonom, u̱lu̱ta̱ umunet lak rama, ngen ngenne omernya i̱ya̱bzi̱ne̱t ram. I̱vi̱ta̱ zin lo̱ddi̱ki̱rie̱ cik kolle wa Israilo u̱du̱kta̱k Musa zoz necu. ²³ Izek enne nogo ne, "Ize Manyi ne, 'Een lo̱za̱ u̱yu̱bi̱, Sabbaz ci o̱ngo̱li̱ne̱ ol Manyi. uppuranet kaal cik ette irong niga appuranu, kar zin aait kaal cik ette irong aakku. Nek atin a̱nyi̱kza̱i̱ ke̱ do̱o̱k, i̱ta̱ngte̱k e̱le̱ti̱ kizeto cik ne̱ge̱rre̱ti̱na̱k'" ²⁴ I̱ya̱ngi̱t zin ro̱k nge̱rre̱t, ki baling u̱du̱wa̱k Musa ke̱. I̱ro̱ng ngen amuza icima anyak u̱lu̱t. ²⁵ Ize Musa ne,"Adait ahat neci wazin cu, ngiwa wazini cu a̱ra̱bke̱ kizi Sabbaz ci ko̱ngo̱li̱nne Manyi. Irong niga wazin cu amudanu manene. ²⁶ Alutanu atin wazinowe wak e̱e̱gi̱n torkonom,ma̱i̱je̱ turgerema wazin wa yu̱bze̱nto̱ een Sabbaz. A̱zze̱e̱ atin manna Sabbaza to̱. ²⁷ O̱o̱t da ol ugag wazinne wa een turgerem u̱lu̱ta̱ manna, irong zin ngen amuda ro̱k imma bu̱k. ²⁸ Izek zin Manyi Mu̱sa̱ ne, "A̱bu̱ri̱ atin enne irong a̱zzu̱ne̱ dolanet cikgannik ki lo̱ti̱no̱k ro̱k ati nga̱a̱? ²⁹ Cino, anita, Manyi ci ka̱nyu̱ng Sabbaz. Kar zin wazin wa een torkonom ka̱nyu̱ng umunet cik wazinok rama. Ngen ngenne ka̱vu̱ ngatine; irong imma okko ngatinne ngamani wazin wa een torgerem." ³⁰ u̱yu̱be̱t zin ol wazin wa een turgerem. ³¹ U̱tu̱we̱t olli Israilo ahat neci kize "manna." Voor da ki bu̱ra̱co̱c ci een coriander, ma̱i̱je̱ tarninet cinne ogon ki wafer ci adimnai le̱te̱ca̱. ³² Ize zin Mu̱sa̱ ne, "Gi̱i̱ ci odola Manyi necu: 'A̱nyi̱k ya̱bzi̱ne̱t wa een omer ci o̱de̱ manna ki̱ta̱nge̱ bu̱lo̱k ki bu̱lo̱k kolle cinong kar kicinet dooli wak a̱rgi̱zu̱ng igeta umunet balik kadaizung balala ke̱ ngati ka̱nya̱ha̱nu̱ng lo̱o̱ce̱ ci Masiru." ³³ Izek Mu̱sa̱ Aaron ne, "I̱ya̱ba̱ manna omere ci o̱de̱ kar zin arik i̱jjo̱. I̱ta̱ng kize ci Manyoni bu̱lo̱k do̱o̱k. ³⁴ Ki i̱yo̱ko̱ ming odolak Manyi Mu̱sa̱, i̱ta̱ng Aaron kojongoz olom bali odollai ngati een ark. ³⁵ Adait ol cik Israilo manna e̱rki̱tnya̱ moton we̱c zee ki̱vi̱ta̱k lo̱o̱c ci abahe ol. Adait zee ki̱vi̱ta̱k lo̱ko̱re̱t cik lo̱o̱c ci ol cik e̱e̱gi̱n kanaan. ³⁶ I̱yo̱ko̱ omer i̱ya̱bzo̱ni̱ko̱ eva lak omoto.