¹ Izek Maanyi Moses ne, "Bit ngati Varo, Kanyia anna nono ki ducak cigine kodoit zinineti kak. ² Kogoni anna niko kar kiyelak dowiz cinani nogo. Kogoni anna buk kaal neko ko abuna mang niga ki dool cik dooli cigog aduwaku dooli gi ci kogonei anna olli Masiro, gi ci kiyelei nogo gi ci iyela dowiz cinani. Goole necu ovo niga agayang mang keeni Maanyi.'' ³ Oot Mosesi ki Aaron izetek Varo ne, "Azi Maanyi Tamutadden wa olli Hiburu ne: 'Rok icca atin inin mang irong inna ongoilinan? Kaneki ne anyik ol ciganik koot abunna mang ovvo nege adingdingana anita. ⁴ Ming irong inna nyik ol ciganik koot, ziyo, loza koko kanyahak giroc looc cunne. ⁵ Okko giroc atin abung looc ci irong acinu rok looc. Ovvo nege edecak kaal balik anyikza ngooti ke ki keen balik anyikzai ke. Ki labi balik alina manene vurte ci ngotu ke. ⁶ Okko goroc abizze zeezi cigog ki cik ducak wagog, ki cik olli Masiro -gi ci inna tamwa ngan rok batune ki jijitune kicinet, ngan ol kicinet gi ci ogon ki iyoko ke bali reena.''' Utungek Mosesi Varo. ⁷ Annek ducaha Varo ne, Eecet icca atin eeti necu rok inin? "Anyik olli Israilo koot kar koot kidingdinganit Tamutadden cineng. Aga iyye nunun mang ilibe Maseri?'' ⁸ Anyakta ol Moses ki Aaron nginti Varo de, ci annek nogo ne, '' Oot idingdinganit Tamutadden wanong. Avvuek atin ol nya?'' ⁹ Annek Mosesi ne, "Kovoya atin naga ki nyazorok ki wak idikireta, ki logoz ki wak ngayek. Kovoya atin naga buk eeza cigag ki tiin, kar kotia kanyakta kwor ci Maanyi.'' ¹⁰ Izek Varo nogo ne, Anyik Maanyi kaavu ngaten igeta, ming kanyung iget ki dooli cigog ooto. Izinet anyaku niga inoni ci loriento otine cigog. I ¹¹ Iloki! ooto, ol nek avte ngatinong ki dingdingon ci Maanyi, gi ci orongiu niga.'' Kar ol kanycik Mosesi ki Aaron kiyoit koot. ¹² Izek Maanyi Moses ne, "Ruk looc Masiro igangozik giroc, kedeca arte ki keen ki kaal velek balik anyikza ngoti ke.'' ¹³ Utugu Mosesi ki mang aduwak Maanyi ke uruk looc ci Masiro coole cinne, anyaha zin Maanyi ngot ci aku eeci jeeni kiciyak looc baal. Baling okko aala looci, avuwana ngoti ci jeeni ki giroc. ¹⁵ Ito giroc looc ci Masiro velek. Akunak giroc ci nganie ol kicinet bali inna tamwa ci irong atin vodok oboda. ¹⁵ Abung giroc looc kize looci olla. Adak giroc keen, oyau cik keenu balik ungnek ngooti ke kizec rok gi ci alinna icima ci aruge manene cik Masiro. ¹⁶ Ma niko uutu Varo Moses ki Aaron anne ne, ''Kutugu munyen ngati ci Maanyi Tamutadden wanong ki ngatinong. ¹⁷ Iyoko zin, alaleyang munyene ciganik iiwe necu, kar alaac Maanyi Tamutadden cinong kenyek daiz cu ngatinani.'' ¹⁸ Utungek Mosesi Varo uuk alaa Maanyi. ¹⁹ Anyaa Maanyi ngoot ci adikire ci avuan giroc kuwe rok liil wa yayau; izigiroc ci ungnonik looc ci Masiro. ²⁰ Nganie abarik Maanyi Varo kodok zinin kujurak olli Israilo gool ci ovoye. ²¹ Izek Maanyi Moses ne, "Uuv tamu-keng, kar kiciya balini kubung looc ci Masiro, abunna balini akunak ol kuumet nogo buk. ²² Utugu Mosesi ki mang aduwak Maanyi uuv tamu-keng, iciya balini ci attite looce ci Masiro inya iyo. ²³ Irong eeti imma acin goni; azzie eeti imma ci ungnek ceez cinne inya iyo. Ulla olli Israilo anyak voriten ingatik abahe nege ke. ²⁴ Utuwa Varo Moses kar kizek ne, Oot idingdinganit Maanyi. Rok ol wagog avtu ceezine, ci irong een eeza ki tiin.'' ²⁵ Annek abarik Mosesi ne, anyet inna agit zong buk kottia ki eeza ki tiin abunna ming ovvo naga kapaheka Maanyi wawac ki muci wa atuzze kapaheka Tamutadden wanang. ²⁶ Kovoya naga buk eeza ki tiin cigag; ci irong ungnonik imma vurut, eeci kovvo naga kadingdingana Maanyi wa een Tamutadden wanang. Irong naga kagaya gi ci kovvo naga kadingdinga Maanyi zee kuzuca naga ngineci.'' ²⁷ Nganie Maanyi anyike zinin ci Varo kodok ci irong anyike nogo koot. ²⁸ Izek Varo Moses ne inyekte ngatinani! Abuna mang acinnu zoz cu jurum, irong ngan niga acinang anit vodok, mang icintu ngum cinani, ovvo niga adaknu. ²⁹ Izek Mosesi ne, "Ozozu inna. Irong ngan anna kacini ngum cunne vodok''