3 ¹ И пхэндя́ ла́кэ Ноеми́нь ла́ки свекру́ха: “Чя́й мири́ чи наˍла́ва мэ тэродэ́ ту́кэ ка́й тэˍдживэ́с, со́б ту́кэ тэˍявэ́л ку́ч? ² А кана́, Воо́зо чи нанэ́ амэ́нґэ пэ́скиро, – служанкэ́нса савэ́нса ту исы́с? Ґэ́на, ёв дэ адая́ ра́т пирэкэдэ́л до анґа́ро зёрно́. ³ Умо́рпэ и пома́кхпэ, ури́ пэ пэ́стэ ґо́жо и́дя пэ́скири, и джя́ до анґа́ро. Наˍсыка́впэ лэ́скэ, кэ одова́, сы́р ёв наˍха́ла и наˍпье́ла. ⁴ Сы́р жэ ёв пасё́ла тэˍсовэ́, ту уджи́н лэ́ско штэ́то ка́й ёв пасё́л, тэ́нче явэ́са откэрэ́са лэ́стэ до гэра́ и пасё́са, а ёв пхэнэ́ла ту́кэ, со тэˍкэрэ́”. ⁵ Ру́фь тэ́нче пхэндя́ ла́кэ: “Саро́, со ту ракирэ́с, мэ кэра́ва”. ⁶ Ёй ґия́ до анґа́ро и кэрдя́ саро́ адя́кэ, сы́р пхэндя́ ла́кэ свекру́ха. ⁷ И выхая́пэ Воо́зо и выпия́пэ и полоша́лыя лэ́скиро ило́. Ёв явья́ и пасия́ пэ кра́ё ски́рда дэ пхуса́. Ёй тихэ́с подґия́, откэрдя́ и пасия́ па́ш лэ́скирэ гэра́. ⁸ И исы́с: до па́ш ра́т здара́ндыя одова́ ману́ш и пирискирдя́пэ, и ґэ́на, дыкхэ́л, манушны́ пашлы́ лэ́стэ до гэра́. ⁹ И пучья́ ёв: “Ко́н ту?” И пхэндя́ ёй: “Мэ Ру́фь, тыри́ бутярны́. Откэ́р пэ́скиро ва́ст пэ тэрья́тэ бутярня́тэ, па́л одова́ ка́й ту пэ́скиро ма́нґэ – ка́й ма́н выкинэ́са”. ¹⁰ И пхэндя́ ёв: “Бахталы́ ту Дэвлэ́стыр, мири́ чя́й! Ку́ч, со кана́ ту кэрдя́н, хвэды́р первонэ́ моло́стыр, со ту кэрдя́н, па́л одова́ ка́й ту наˍґия́н па́л тэрнэ́ндэ: ни па́л чорорэ́ндэ, ни па́л барвалэ́ндэ. ¹¹ А кана́, чя́й мири́, на́дарпэ: саро́, со ту пхэндя́н, мэ кэра́ва ту́кэ, па́л одова́ ка́й джинэ́н сарэ́ мануша́ дэ кхэ́р миро́, со ту лачи́ манушны́. ¹² А кана́, чячё́, со мэ ту́кэ пэ́скиро ману́ш саво́ ту́т выкинэ́ла, нэ адя́кэж исы́н ави́р ману́ш пэ́скиро, савэ́стэ исы́н зо́р тэˍвыкинэ́л, ту́кэ ёв пашыды́р ма́ндыр. ¹³ Ра́ткир адая́ ра́т ада́й, а утро́са: сы́р ёв выкинэ́ла ту́т, то ку́ч, мэ́к выкинэ́л, а сы́р наˍзакамэ́ла тэˍвыкинэ́ ту́т, то мэ выкина́ва ту́т. Джидо́ Дэвэ́л! Со́в кэ у́тро”. ¹⁴ Ёй сутя́ дэ лэ́скирэ гэра́ ко у́тро и вштыя́ кэ одова́, сы́р ману́ш удыкхья́ авирэ́с манушэ́с. И пхэндя́ ёв: “Мэ́к наˍджинэ́н, со явэ́лас ада́ манушны́ до анґа́ро”. ¹⁵ И пхэндя́ ёв: “Подэ́ упратуны́ и́дя, сави́ пэ ту́тэ, и пори́кир ла”. Ёй рикирэ́лас ла, а ёв откэдыя́ шо́в ме́ры зёрно́, чюдя́ пэ ла́тэ и ґия́ дэ фо́ро. ¹⁶ И явья́ ёй кэ пэ́скири свекру́ха. И одоя́ пхэндя́: “Ко́н ту, мири́ чя́й?” И роспхэндя́ ёй ла́кэ па́л саро́, со кэрдя́ ла́кэ одова́ ману́ш. ¹⁷ И пхэндя́: “Адалэ́ шо́в ме́ры зёрно́ ёв дыя́ ма́нґэ, па́л одова́ со ёв пхэндя́: “Наˍджя́ би нисо́ско кэ пэ́скири свекруха́””. ¹⁸ И пхэндя́ ёй: “Побэ́ш, чя́й мири́, чи наˍуджинэ́са, со явэ́ла дурэды́р. Па́л одова́ ка́й адава́ ману́ш наˍулэ́лапэ, сы́р ёв наˍкэрэ́ла адава́ саро́ дадэвэ́с”.