2 ¹ Кэ Ноеми́нь исы́с пэ́скиро ману́ш пи́рэ ромэ́стэ, лэ́с кхарэ́н Воо́зо, ёв исы́с баро́ ману́ш и исы́с Елимеле́хоскирэ семья́тыр. ² И пхэндя́ Ру́фь моавитя́нка Ноеминя́кэ “Джя́ва мэ пэ маля́ и ла́ва тэˍподкэда́в маро́ долэ́стэ, ко́н ма́н наˍтрадэ́ла” Ёй пхэндя́ ла́кэ: “Джя́, чя́й мири́!” ³ Ёй ґия́, явья́ дэ маля́ и тэˍподкэдэ́л, со ачя́пэ долэ́ндэ ко́н скэдэ́лас маро́. И выґия́ адя́кэ, со адая́ пху́в исы́с Воозоскири́ саво́ Елимеле́хоскирэ семья́тыр. ⁴ И ґэ́на, явья́ Воо́зо Вифлеемо́стыр и пхэндя́ одолэ́нґэ, ко́н скэдэ́лас маро́: Тэˍявэ́н бахталэ́ Дэвлэ́стыр! А ёнэ́ пхэндэ́ лэ́скэ: Тэˍавэ́с и ту бахтало́ Дэвлэ́стыр! ⁵ И пхэндя́ Воо́зо пэ́скирэ бутярнэ́скэ, савэ́с чивдя́ пхурэдырэ́са кэ мануша́, савэ́ скэдэ́н маро́: “Конэ́скири ада́ тэрны́ чя́й?”. ⁶ И пхэнэ́л бутярно́ Воозо́ско: “Ада́ тэрны́ чя́й моавитя́нка, сави́ рисия́ Ноеминя́са сави́ дживэ́лас пэ пху́в Моаво́скири. ⁷ Ёй пхэндя́: “Мэ ла́ва тэˍподкэда́в пала́л маро́ ка́й ачя́пэ одолэ́ндэ ко́н укэдэ́л маро́. Ёй явья́ ра́нэс и кэрэ́л буты́ ада́й кэ адава́ чя́со. И на́бутка побэстя́ дэ ша́тра”. ⁸ И пхэндя́ Воо́зо Руфа́кэ: “Пошу́н ма́н, чя́й мири́! Наˍджя́ пэ ави́р маля́ тэˍподкэдэ́с маро́, и наˍуджя́ ада́цыр, а яв ада́й па́ш мирэ́ндэ бутярнэ́ндэ. ⁹ Дыкх пэ ма́л, пэ саво́ ёнэ́ укэдэ́н, и пхир па́л лэ́ндэ. Чи мэ наˍприпхэндё́м бутярнэ́нґэ, со́б ёнэ́ тэˍнаˍподжя́н кэ ту? Сы́р закамэ́са тэˍпье́, то поджя́ кэ вэ́дра пане́са и пи паны́ саво́ яндэ́ бутярнэ́”. ¹⁰ Ёй пэя́ лэ́скэ до гэра́ и пхэнэ́л: “Со мэ кэрдё́м да́саво дэ тырэ́ якха́, со ту сыкавэ́с ма́нґэ пэ́скиро лачипэ́н, па́л одова́, со мэ нанэ́ тумарэ́ манушэ́ндыр?” ¹¹ Воо́зо пхэнэ́л ла́кэ: “Роспхэндэ́ ма́нґэ саро́, со ту кэрдя́н пэ́скирэ свекруха́кэ, сы́р мэя́ тыро́ ро́м, ка́й ту ачядя́н дадэ́с тэрэ́с и да пэ́скирья, и пху́в ка́й ту бия́ндыян и явья́н кэ мануша́, савэ́н ту кэ адава́ наˍджиндя́н. ¹² Па́л адава́ со ту кэрдя́н, мэ́к Дэвэ́л дэ́ла ту́кэ ба́х и тыри́ ба́х авэ́ла дэ саро́ Дэвлэ́стыр, Дэвэ́л Израилё́скиро, кэ Саво́ ту явья́н, тэˍзаракхэ́л ту́т пэ́скирэ вастэ́са!” ¹³ И пхэндя́ ёй: “Мэ́к мэ попэра́ва ми́лость дэ тырэ́ якха́, миро́ ра́й, па́л адава́ со ту подрикирдя́н ма́н и пхэндя́н лава́ савэ́ заґинэ́ ма́нґэ до ило́ тырэ́ бутярня́кэ, нэ мэ нанэ́ тыри́ бутярны́”. ¹⁴ И пхэндя́ ла́кэ Воо́зо, сы́р ёнэ́ ха́нас: “Поджя́ ада́рик, лэ маро́ и ки́нкир тыро́ коты́р до уксусо́ и ха”. Ёй бэстя́ па́ш бутярнэ́ндэ, и ёв дыя́ ла́кэ мариклы́. Ёй хая́ и чялыя́, и ла́тэ ачя́пэ маро́. ¹⁵ Ёй вштыя́, со́б тэˍподкэдэ́л, Воо́зо припхэндя́ пэ́скирэнґэ бутярнэ́нґэ: “Мэ́к ёй подкэдэ́л и па́ш сно́пы, и на́ˍґодлэн пэ ла́тэ. ¹⁶ И отчюрдэ́н ла́кэ снопэнды́р и ачявэ́н, со́б ёй тэˍподкэдэ́л, и на́ˍґодлэн пэ ла́тэ”. ¹⁷ Адя́кэ ёй подкэдэ́лас пэ маля́ кэ бэвэ́ль и змардя́ одова́, со подкэдыя́, и исы́с варика́й па́ш ґоно́ маро́. ¹⁸ И лыджия́ ёй адава́ дэ фо́ро, и удыкхья́ ла свекру́ха, и со ёй скэдыя́. И доростя́ ёй и дыя́ ла́кэ мариклы́ сави́ ачядя́, сы́р ёй выхая́пэ. ¹⁹ И пхэндя́ ла́кэ свекру́ха ла́ки: “Ка́й ту исы́с дадэвэ́с и кэ ко́н кэрэ́сас буты́? Мэ́к авэ́ла бахтало́ одова́ ману́ш саво́ подрикирдя́ ту́т”. И роспхэндя́ ёй пэ́скирэ свекруха́кэ, кэ ко́н ёй кэрэ́лас буты́, и пхэндя́: “Манушэ́c адалэ́с кэ саво́ мэ кэра́вас буты́ кхарэ́н Воо́зо”. ²⁰ И пхэндя́ Ноеми́нь пэ́скирэ борья́кэ: “Бахтало́ ёв Дэвлэ́стыр – одова́ ко́н рикирэ́л до ило́ джидэ́н и мулэ́н!” И пхэндя́ ла́кэ Ноеми́нь: “Пэ́скиро амэ́нґэ адава́ ману́ш. Ёв екхэнды́р амарэ́ родо́стыр, савэ́стэ исы́н зо́р тэˍвыкинэ́л”. ²¹ И пхэндя́ Ру́фь моавитя́нка: “И ёв ма́нґэ пхэндя́: “Ри́кирпэ па́ш мирэ́ндэ бутярнэ́ндэ, скицы́к ёнэ́ лэ́на тэˍскэдэ́н миро́ маро́””. ²² И пхэндя́ Ноеми́нь Руфа́кэ, пэ́скирэ борья́кэ: “Ку́ч, чя́й мири́, со́б ту тэˍвыджя́с лэскирэ́нса бутярнэ́нса, и пэ ту́тэ наˍлэ́на нисо́ тэˍракирэ́н пэ ави́р маля́”. ²³ И ёй рикирэ́ласпэ па́ш бутярнэ́ндэ Воозоскирэ́ндэ и подкэдэ́лас маро́ кэ одова́, сы́р укэдынэ́ саро́ маро́, и дживэ́лас пескирья́са свекруха́са.