5 ¹ И исы́с бари́ ґо́дла машки́р манушэ́ндэ и джювле́ндэ пэ пшалэ́ндэ пэ́скирэндэ иудее́ндэ. ² И исы́с ада́савэ, савэ́ раки́рнас: “Чявэ́н амарэ́н и чяе́н амарэ́н – амэ́н бу́т. И амэ́ дорэса́с маро́, ха́с и джива́с!” ³ И исы́с ада́савэ савэ́ ракирэ́нас: “Маля́ амарэ́, и виноґра́дники амарэ́, и кхэра́ амарэ́ амэ́ зачива́с до банґипэ́н, со́б амэ́нґэ тэˍла́с маро́ сы́р нанэ́ со тэˍха́с”. ⁴ И исы́с мануша́ савэ́ ракирэ́нас: “Амэ́ лыя́м ру́п тэˍпокина́с нало́ґо царё́скэ, па́л амарэ́ маля́ и виноґра́дники амарэ́. ⁵ И амэ́ ада́савэ – сы́р амарэ́ пшала́, и чявэ́ амарэ́ – ада́савэ сы́р и лэ́нґирэ чявэ́. И ґэ́на амэ́ отда́с амарэ́н чявэ́н и чяе́н амарэ́н до бутярнэ́, и исы́н чяя́ савэ́н залынэ́, и нанэ́ со́са тэˍпокина́с, и амарэ́ маля́, и виноґра́дники амарэ́ кэ ёнэ́”. ⁶ И мэ дрыва́н росхоля́сыём, сы́р шундё́м ґо́дла и лава́ адалэ́. ⁷ И захачи́я ило́ миро́ дэ ма́ндэ, и мэ выпхэндё́м барэ́ манушэ́нґэ, и шэралэ́нґэ, ада́савэ лава́: “Тумэ́ лэ́н пэ́скирэндыр пшалэ́ндыр процэ́нты!” И мэ скэдыё́м пэ лэ́ндэ бутэ́н манушэ́н. ⁸ И лыё́м тэˍракира́в: “Амэ́ выкина́сас кицы́к исы́с зо́р, амарэ́н пшалэ́н, иудее́н, савэ́ исы́с бикиндэ́ авирэ́нґэ манушэ́нґэ. А кана́ тумэ́ бикнэ́н тумарэ́н пшалэ́н, и ёнэ́ бикнэ́нпэ амэ́нґэ?” И ёнэ́ исы́с шты́л, и наˍпопэрэ́нас ни савэ́ лава́. ⁹ И мэ пхэндё́м: “Нанэ́ ку́ч тумэ́ кэрэ́н адава́. Чи нанэ́ дэ бари́ да́р Дэвлэ́ски тумэ́ трэ́би тэˍдживэ́н, со́б тэˍна́ˍсанпэ тумэ́ндыр амарэ́ вра́ґи? ¹⁰ Мэ и мирэ́ пшала́, и бутярнэ́ мирэ́ да́с до банґипэ́н лэ́нґэ ру́п и маро́. Манґа́в тумэ́н, наˍґинэ́н банґипэ́н лэ́нґиро! ¹¹ Манґа́в тумэ́н рискирэ́н дэ адава́ дэвэ́с маля́ лэ́нґирэ, виноґра́дники лэ́нґирэ, оли́вкова са́ды лэ́нґирэ, и кхэра́ лэ́нґирэ, и ру́п и маро́, и ви́но, и кси́л савэ́ тумэ́ лэ́нас лэ́ндыр”. ¹² И пхэндэ́ ёнэ́: “Амэ́ отда́са, и наˍла́са тэˍманґа́с лэ́ндыр. Амэ́ кэра́са адя́кэ сы́р ту ракирэ́с”. И мэ кхардё́м рашае́н, и пхэндё́м мэ́к солаха́н, со ёнэ́ кэрэ́на саро́ со пхэндэ́. ¹³ И тэ́нче мэ чюрдыё́м пра́хо и пхэндё́м: “Дя́кэ мэ́к Дэвэ́л розчюрдэ́л прахо́са одолэ́с манушэ́с, саво́ наˍзрикирэ́ла адава́ ла́в, и лэ́скиро кхэ́р и лэ́скири буты́ джя́ла саро́ прахо́са”. И пхэндэ́ сарэ́ мануша́: “Ами́нь”. И прославиндэ́ Я́хвэ. И кэрдэ́ мануша́ адава́ со пхэндэ́. ¹⁴ И одолэ́стыр дэвэсэ́стыр, сы́р чивдэ́ ма́н шэралэ́са пи́р саро́ фо́ро Иуда́ско, биштонэ́ бэршэ́стыр и ко тря́нда ду́йто бэ́рш сы́р исы́с ца́рё Артаксе́рксо, дэшуду́й бэрша́ мэ и мирэ́ пшала́ наˍханэ́ маро́ шэралэ́ско адалэ́ форо́ско. ¹⁵ А шэралэ́ савэ́ исы́с анґи́л ма́ндэ, рикирэ́нас манушэ́н до пхарипэ́н, и лэ́нас лэ́ндыр маро́ и ви́но и сара́нда рупунэ́ ловэ́. И шэралэ́нґирэ бутярнэ́ исы́с хулае́нса пэ манушэ́ндэ, а мэ наˍкэра́вас адя́кэ, па́л одова́ со дара́вас анґи́л Дэвлэ́стэ. ¹⁶ И адя́кэж буты́ пэ сте́на мэ подрикира́вас сарэ́стыр илэ́стыр. И маля́ амэ́ наˍкина́сас. И сарэ́ бутярнэ́ мирэ́ скэдэ́наспэ пэ буты́. ¹⁷ И иудее́н и шэралэ́н па́л миро́ сками́нт исы́с шэ́л пандждэша́ манушэ́н авэ́нас одолэ́нса манушэ́нса, савэ́ дживэ́нас пашы́л амэ́ндэ. ¹⁸ И ґэ́на со подэ́нас пэ е́кх дэвэ́с: е́кх ґуру́в, выкэдымэ́ шо́в бакрэ́, и пти́ца ва́ш ма́нґэ, па́л дэ́ш дэвэ́с бу́т ви́но. И маро́ ко шэрало́ форо́скиро мэ наˍманґа́вас па́л одова́, со пхари́ буты́ исы́с ко мануша́ адалэ́. ¹⁹ Зри́пир ма́нґэ, Дэвэ́л миро́, пэ лачипэ́н, саро́ мэ кэрдё́м ва́ш адалэ́нґэ манушэ́нґэ.