4
1
И сы́р шундя́ Санавалла́то, со амэ́ гада́с форы́тко сте́на тэ́нче росхоля́сыя ёв, розґия́пэ дрыва́н, и са́ласпэ иудее́ндыр,
2
и ракирэ́лас анґи́л сарэ́ндэ шэралэ́ндэ и рае́ндэ дэ Сама́рия и пхэндя́: “Со кэрэ́н адалэ́ бизорья́кирэ иуде́и? Ко́н лэ́нґэ дэ́ла тэˍдокэрэ́н адалэ́ сте́ны? Чи ёнэ́ лэ́на тэˍянэ́н жэ́ртвы? Чи дадэвэ́с ёнэ́ докэрэ́на адая́ буты́? Чи бара́ кокорэ́ вштэ́на савэ́ розмардэ́ и схачкирдэ́ яґа́са?”
3
И аммонитя́нино Тови́я исы́с пашы́л лэ́стэ и ракирэ́лас: “Адая́ сте́на сави́ ёнэ́ кэрэ́н адалэ́ндыр барэ́ндыр, – роспэ́рлапэ по котыра́ сы́р заджя́ла пэ ла́тэ лиси́ца!”
4
Дэвэ́л амаро́ пошу́н амэ́н, ёнэ́ са́нпэ амэ́ндыр, кэ́р адя́кэ, со́б лэ́нґиро сабэ́н тэˍобрисё́л пэ лэ́нґиро шэро́ и лэ́нґирэ вра́ґи тэˍзалэ́н лэ́н до пле́но!
5
И на́ˍзакэр якха́ пэ банґипэ́н лэ́нґиро, и бэзэха́ лэ́нґирэ мэ́к авэ́на анґи́л Ту́тэ, па́л одова́, со ави́р мануша́ холясо́н пэ манушэ́ндэ савэ́ ґадэ́н сте́ны!
6
И амэ́ гада́сас сте́на дурэды́р, и ґадыя́м сари́ кэ па́ш, и манушэ́нґирэ илэ́ хачё́нас тэˍкэрэ́н дурэды́р.
7
И сы́р шундэ́ Санавала́то, и Тови́я, и аравитя́ни, и аммонитя́ни, и азотя́ни, со ґадэ́нпэ сте́ны до Иерусали́мо, саро́ со исы́с розмардо́ ёнэ́ скэрэ́н, адава́ лэ́н дрыва́н розхолякирдя́,
8
и зракирдэ́пэ сарэ́ ёнэ́ тэˍджя́н тэˍмарэ́нпэ пэ Иерусали́мо и тэˍрозмарэ́н лэ́с.
9
И амэ́ манґа́саспэ амарэ́ Дэвлэ́скэ, и чивава́с манушэ́н тэˍракхэ́н амэ́н дэвэ́с и ра́т лэ́ндыр.
10
И пхэндя́ Иу́да: “Нанэ́ зо́р ко мануша́ савэ́ подлыджя́н бара́, а пра́хо бу́т, и амэ́ наˍдокэра́са сте́на”.
11
И пхэндэ́ амарэ́ вра́ґи: “Наˍуджинэ́на ёнэ́ и наˍудыкхэ́на, сы́р амэ́ ава́са машки́р лэ́ндэ и умара́са лэ́н, и тэрдякира́са сари́ буты́”.
12
И сы́р явнэ́ иуде́и, савэ́ дживэ́нас пашы́л лэ́ндэ, то ракирэ́нас амэ́нґэ дэ́ш мо́лы: “Дэ сарэ́ штэ́ты ка́й тумэ́ наˍдэ́напэ, ёнэ́ лэ́на тэˍджя́н пэ тумэ́ндэ”.
13
И мэ чивдё́м пэ тэлунэ́ штэ́ты па́л сте́на, и дэ откэрдэ́ штэ́ты, манушэ́н родэ́ндыр, мече́нса, копье́нса, и лукэ́нса.
14
Сы́р мэ саро́ обдыкхьё́м, скэдыё́м барэ́н и шэралэ́н и авирэ́н манушэ́н и пхэндё́м лэ́нґэ: “Надарэ́н лэ́ндыр! Зрипирэ́н Дэвлэ́с, саво́ исы́н баро́ и зорало́! И марэ́нпэ па́л пшалэ́ндэ, па́л чявэ́ндэ и чяе́ндэ тумарэ́ндэ, па́л ромне́ндэ и тумарэ́ кхэра́!”
15
И сы́р шундэ́ амарэ́ вра́ґи, со амэ́ саро́ уджиндя́м, и Дэвэ́л розмардя́ саро́, со ёнэ́ камнэ́ тэˍкэрэ́н, и амэ́ рисия́м кэ сте́на кэ пэ́скири буты́.
16
И одолэ́стыр дэвэсэ́стыр: па́ш амарэ́ тэрнэ́ мануша́ кэрэ́нас буты́, а па́ш лэ́ндыр рикирэ́нас ко́пья, щи́ты, лу́ки, и доспе́хи. И шэралэ́ дыкхэ́нас па́л саро́ кхэ́р Иуда́ско.
17
18
Сарэ́ ко́н кэрэ́лас сте́на и пхари́ буты́: екхэ́са вастэ́са кэрэ́лас пэ́скири буты́, а ави́р ва́ст рикирэ́лас ме́чё. Кэ сарэ́ ко́н кэрэ́лас буты́ исы́с припхандо́ ме́чё пэ лэ́стэ, и адя́кэ ёнэ́ кэрэ́нас. И ману́ш саво́ башавэ́л дэ бакры́тко ро́ґо исы́с па́ш ма́ндэ.
19
И мэ пхэндё́м барэ́ манушэ́нґэ, и шэралэ́нґэ, и сарэ́нґэ манушэ́нґэ: “Буты́ дрыва́н бари́, и амэ́ розчюрдымэ́ пи́р сари́ сте́на ду́р екхˉекхэ́стыр.
20
Дэ саво́ штэ́то, шунэ́на сы́р забашавэ́ла бакры́тко ро́ґо, одо́рик зджя́нпэ сарэ́ кэ амэ́. Дэвэ́л амаро́ лэ́ла тэˍмарэ́лпэ па́л амэ́ндэ”.
21
И амэ́ кэра́сас адая́ буты́, и па́ш мануша́ рикирэ́нас пэ́скирэ ме́чи сы́р вштэ́л кха́м и кэ черґэня́.
22
Адя́кэж мэ пхэндё́м манушэ́нґэ: “Сарэ́ пэ́скирэ слуґэ́нса авэ́на тэˍраткирэ́н машки́р Иерусали́мо, лэ́на ёнэ́ ратя́кэс тэˍракхэ́н, а дэвэсэ́ тэˍкэрэ́н буты́”.
23
И ни мэ, ни пшала́ мирэ́, ни слу́ґи мирэ́, ни мануша́ савэ́ ракхэ́нас, ни савэ́ па́л ма́ндэ, – амэ́ нико́н наˍзлыя́м амари́ и́дя и ме́чё, сы́р исы́с пашы́л паны́.