3 ¹ И вштыя́ Елияшы́во, Раша́й баро́, и лэ́скирэ пшала́ рашая́, и лынэ́ тэˍкэрэ́н Бакранэ́ вуда́ра – ёнэ́ свэнтсындэ́ лэ́н и чивдэ́ вуда́ра по штэ́то и кэ ба́шня Мэ́а свэнтсындэ́ лэ́н, кэ ба́шня Ханане́ла. ² И пашы́л лэ́ндэ кэрэ́нас мануша́ Иерихоно́стыр, а пашы́л лэ́ндэ кэрэ́лас Закху́ро, чяво́ Имриё́ско. ³ А вуда́ра Мачи́тка кэрэ́нас чявэ́ Сенаё́скирэ, ёнэ́ обмардэ́ лэ́н пхале́нса и чивдэ́ вуда́ра лэ́нґирэ, чивдэ́ клыдына́ и засо́вы. ⁴ И пашы́л лэ́ндэ кэрэ́лас Меремо́фо, чяво́ Уриё́ско, Чявэ́ско Ґаккоцо́ско. А пашы́л лэ́ндэ кэрэ́лас Мешулла́мо, чяво́ Берехиё́ско, чявэ́ско Мешызабела́ско. И пашы́л лэ́стэ кэрэ́лас Садо́ко, чяво́ Баано́ско. ⁵ Пашы́л лэ́ндэ кэрэ́лас фэкойцэ́ндыр. Нэ барэ́ мануша́ наˍпорискирдэ́ пэ́скири мэ́н, со́б тэˍкэрэ́н буты́ шэралэ́нса пэ́скирэнса. ⁶ А вуда́ра Пуранэ́ кэрэ́нас Иоаи́до, чяво́ Пасеахаё́ско, и Мешулла́мо, чяво́ Бесодиё́ско. Ёнэ́ обмардэ́ лэ́н пхале́нса и чивдэ́ пэ вуда́ра клыдына́ и засо́вы. ⁷ И пашы́л лэ́ндэ кэрэ́нас ґаваонитя́нино Мелати́ё и меронофия́нино Иадо́но, мануша́ Ґаваоно́скирэ и Ми́цфаскирэ, ко кхэра́ шэралэ́нґирэ савэ́ па́л рэ́ка. ⁸ Пашы́л лэ́стэ кэрэ́лас Уззии́ло, чяво́ Харґа́иё ёв исы́с ювили́ро. И пашы́л лэ́стэ кэрэ́лас Хана́ниё, чяво́ парфюмеро́ско. И ёнэ́ кэрэ́нас до Иерусали́мо кэ буґлы́ сте́на. ⁹ И пашы́л лэ́ндэ кэрэ́лас Рефаи́ё, чяво́ Ора́ско, ёв исы́с шэрало́ по па́ш Иерусали́мо. ¹⁰ И пашы́л лэ́ндэ кэрэ́лас и дживэ́лас Иеда́иё, чяво́ Харумафо́ско, а пашы́л лэ́стэ кэрэ́лас Хатту́шо, чяво́ Хашавниё́ско. ¹¹ Пэ ави́р штэ́то кэрэ́нас Малхи́ё, чяво́ Харимо́скиро, и Хашшу́во, чяво́ ПахавˉМоаво́скиро, ба́шня Бовы́тко. ¹² И пашы́л лэ́стэ кэрэ́лас Шаллу́мо, чяво́ Ґаллхешо́ско, и лэ́скирэ чяя́, ёв исы́с шэралэ́са пэ па́ш Иерусали́мо. ¹³ Вуда́ра Долина́кирэ кэрэ́нас Хану́но и мануша́ Заноахо́стыр – ёнэ́ кэрдэ́ лэ́н, клыдынэ́нса и засовэ́нса и чивдэ́ по штэ́то и адя́кэж кэрдэ́ сте́на варика́й панджшэ́л ме́тры – ко Наво́зна вуда́ра. ¹⁴ А Наво́зна вуда́ра кэрэ́лас Малхи́ё, чяво́ Рехаво́ско, шэрало́ дэ БефˉКаре́мо. Ёв кэрдя́ лэ́н и чивдя́ по штэ́то и чивдя́ клыдына́ и засо́вы лэ́нґирэ. ¹⁵ А вуда́ра Источнико́стыр кэрэ́лас Шаллу́мо, чяво́ Колхозеё́ско, шэрало́ дэ Ми́цфа – ёв кэрдя́ лэ́н обмардя́ и чивдя́ клыдына́ и засо́вы – адя́кэж сте́на пашы́л ста́вко Села́хо, ка́й са́до царё́ско и кэ ступе́ньки, савэ́ лыджя́н форо́стыр Давидо́скирэстыр. ¹⁶ Па́л лэ́стэ кэрэ́лас Нееми́я, чяво́ Азбуко́ско, ёв шэрало́ исы́с дэ БефˉЦу́ро, ко фо́ро ка́й ґарадо́ Дави́до, и ко ста́вко саво́ кэрдэ́ зоралэ́ мануша́. ¹⁷ Па́л лэ́стэ кэрэ́нас леви́ты: Реху́мо, чяво́ Ваниё́ско, а пашы́л лэ́стэ кэрэ́лас Хашави́ё, ёв исы́с шэрало́ дэ па́ш фо́ро Кеи́ло. ¹⁸ Па́л лэ́стэ кэрэ́нас пшала́ лэ́нґирэ: Бавва́ё, чяво́ Хенададо́ско, ёв исы́с шэрало́ пэ ави́р па́ш бо́ко Кеи́ло. ¹⁹ Пашы́л лэ́стэ кэрэ́лас Езе́ро, чяво́ Иисусо́ско, шэрало́ дэ Ми́цфо – пэ ави́р штэ́то, сы́р тэˍґадэ́пэ упрэ́ ка́й ґаравэ́нас сарэ́ чюрья́ савэ́нса марэ́наспэ и ко у́ґло. ²⁰ Па́л лэ́стэ кэрэ́лас Вару́хо, чяво́ Забваё́ско, пэ ави́р штэ́то уґло́стыр и ко кхэ́р Елияшыво́ско, барэ́ рашае́ско. ²¹ Па́л лэ́стэ кэрэ́лас Меремо́фо, чяво́ Уриё́ско, чявэ́ско Ґаккоцо́ско ёв кэрэ́лас пэ ави́р штэ́то пи́р саро́ кхэ́р Елияшыво́ско. ²² А па́л лэ́стэ кэрэ́нас рашая́, савэ́ дживэ́нас пашы́л Иерусали́мо. ²³ Па́л лэ́ндэ кэрэ́нас Вениами́но и Хашшу́во анґи́л пэ́скиро кхэ́р. Па́л лэ́ндэ кэрэ́лас Аза́риё, чяво́ Маасеё́ско, чявэ́ско Ананиё́ско, пашы́л пэ́скиро кхэ́р. ²⁴ Па́л лэ́ндэ кэрэ́лас Бинну́ё, чяво́ Хенададо́ско, пэ ави́р штэ́то, кхэрэ́стыр Азариё́скирэстыр ко у́ґло и ко поворо́то. ²⁵ Фала́ло, чяво́ Узаё́ско, кэрэ́лас анґи́л у́ґло и ба́шня, сави́ исы́с вучеды́р упратунэ́стыр кхрэ́стыр царёскирэ́стыр, сави́ пашы́л дво́ро бэшыбны́тко. Па́л лэ́стэ Феда́иё, чяво́ Парошо́ско. ²⁶ И нефине́и савэ́ дживэ́нас до Офе́ло, по штэ́то анґи́л Паны́тка вуда́ра ко восто́ко и кэ вучи́ ба́шня. ²⁷ Па́л лэ́стэ кэрэ́нас феко́йцы, пэ ави́р штэ́то, анґи́л барья́тыр и вучё́ башня́тыр и ко сте́ны Офело́скирэ. ²⁸ Па́л вуда́ра Ґры́тка кэрэ́нас рашая́, сарэ́ анґи́л пэ́ско кхэ́р. ²⁹ Па́л лэ́ндэ кэрэ́лас Садо́ко, чяво́ Иммеро́ско, анґи́л пэ́скиро кхэ́р, а па́л лэ́стэ кэрэ́лас Шэма́иё, чяво́ Шэханиё́ско, саво́ ракхэ́лас вуда́ра Восто́чна. ³⁰ Па́л лэ́ндэ кэрэ́лас Хана́ниё, чяво́ Шэлемио́ско, и Хану́но, шо́вто чяво́ Цалафо́ско, пэ ави́р штэ́то. Па́л лэ́стэ кэрэ́лас Мешулла́мо, чяво́ Берехио́ско, анґи́л кхэ́р ка́й ёв дживэ́л. ³¹ Па́л лэ́ндэ кэрэ́лас Малхи́ё, чяво́ ювилиро́скиро, ко кхэ́р нефинеевэ́нґо и мануша́ савэ́ кинэ́н и бикнэ́н, анґи́л вуда́ра Мифкадо́скирэ и ко упратуно́ кхэ́р саво́ пэ у́ґло. ³² А машки́р упратуно́ кхэ́р и ко вуда́ра Бакры́тка кэрэ́нас мануша́ савэ́ залэ́наспэ сумнака́са и ко мануша́ савэ́ кинэ́нас и бикнэ́нас.