2
1
И исы́с: до чё́н ниса́но до би́што бэ́рш сы́р исы́с ца́рё Артаксе́рксо и ви́но исы́с тэрдо́ анґи́л лэ́стэ. Мэ лыё́м адава́ ви́но и подыё́м царё́скэ. И миро́ му́й наˍисы́с обмэкло́ анґи́л лэ́стэ.
2
И пхэндя́ ма́нґэ ца́рё: “Со́скэ обмэкло́ тыро́ му́й, ту наˍзанасва́лыян? Мэ дыкха́в со пхарипэ́н пэ ило́ тыро́”. И мэ дрыва́н здара́ндыём.
3
И мэ пхэндя́м царё́скэ: “Ца́рё тэˍавэ́с зорало́! Сы́р ма́нґэ тэˍна́ˍавав обмэклэ́ муе́са, сы́р фо́ро – ка́й ґарадэ́ мирэ́ дада́ розмардо́, и вуда́ра лэ́скирэ схачкирдэ́ яґа́са?”
4
И пхэндя́ ма́нґэ ца́рё: “Со ту манґэ́с тэˍкэра́в ва́ш ту́кэ?” и поманґьё́мпэ болыбнытконэ́ Дэвлэ́скэ
5
и пхэндё́м царё́скэ: “Сы́р чялыя́ царё́скэ р́або тыро́ и ёв попэя́ лачипэ́н анґи́л царё́стэ и ца́рё закамэ́ла мэ́к бичявэ́л ма́н дэ Иуде́я, до фо́ро ка́й ґарадэ́ мирэ́ дада́, и мэ скэра́ва лэ́с”.
6
И пхэндя́ ма́нґэ ца́рё и цари́ца бэшты́ исы́с па́ш лэ́стэ: “Бу́т дэвэса́ авэ́ла дро́м тыро́ и сы́р ту рисё́са?” И чялыя́ адава́ царё́скэ, и ёв бичявдя́ ма́н, и мэ пхэндё́м дэ саво́ дэвэ́с мэ трада́ва.
7
И мэ пхэндё́м царё́скэ: “Сы́р ца́рё скамэ́ла и пхэнэ́ла, тэˍдэ́н ма́нґэ лыла́ ва́ш шэралэ́нґэ савэ́ до фо́ры па́л рэ́ка, со́б ёнэ́ тэˍпромэкэ́н ма́н кэ одова́ сы́р мэ ава́ва дэ Иуде́я,
8
и лы́л Асафо́скэ, саво́ ракхэ́л вэша́ царё́скирэ, со́б ёв тэˍдэ́л ма́нґэ вэ́ш тэˍобмара́в вуда́ра, ва́ш Кхэ́р и ва́ш сте́ны форы́тка и ва́ш кхэ́р, дэ саво́ мэ заджя́ва”. И дыя́ ма́нґэ ца́рё, саро́ со мэ манґьё́м па́л одова́, со Дэвлэ́скиро ва́ст исы́с пэ ма́ндэ.
9
И мэ явьё́м ко шэралэ́ форы́тка савэ́ па́л рэ́ка, и подыё́м лэ́нґэ лыла́ царё́стыр. И ца́рё бичявдя́ ма́нца барэ́н рае́н и манушэ́н пэ ґрэ́ндэ.
10
И шундэ́ хоронитя́нино Санавалла́то и аммони́тско бутярно́ Тови́ё, и захая́ лэ́н дрыва́н бари́ холы́, со явья́ ману́ш тэˍродэ́л лачипэ́н чявэ́нґэ Израилё́скирэнґэ.
11
Мэ явьё́м до Иерусали́мо, и исы́с одо́й три́н дэвэ́с,
12
мэ вштыё́м ратя́ко – и ма́нца нанэ́ бу́т мануша́ – и мэ наˍпхэндё́м ни конэ́скэ, со дыя́ Дэвэ́л ма́нґэ до ило́ миро́ тэˍкэра́в ва́ш Иерусали́мо. И ско́то наˍисы́с ма́нца, е́кх ґра́й пэ савэ́стэ мэ трада́вас.
13
И мэ вытрадыё́м ратя́ко до вуда́ра Долина́кирэ, анґи́л исто́чнико Драконо́ско, и ко вуда́ра дэ савэ́ вылыджя́нас наво́зо, обдыкхья́м сте́ны Иерусалимо́скирэ, савэ́ исы́с розмардэ́, и вуда́ра савэ́ исы́с схачкирдэ́ яґа́са.
14
И мэ протрадыё́м ко вуда́ра пашы́л исто́чнико и ко ста́вко царё́скиро, и наˍисы́с штэ́то, со́б тэˍпроджя́л ґра́й пэ савэ́стэ мэ трада́вас.
15
И мэ гадыё́мпэ пи́р дали́на ратя́кэс, и роздыкхьё́м сте́на, и рисиё́м палэ́ до вуда́ра Долина́кирэ.
16
Шэралэ́ наˍджиндэ́ ду́р мэ пхира́вас и со кэра́вас. И иудее́нґэ, и рашае́нґэ, и барэ́ манушэ́нґэ, и шэралэ́нґэ, и авирэ́нґэ, ко́н кэрэ́л буты́, мэ нисо́ наˍроспхэндё́м.
17
И мэ пхэндё́м лэ́нґэ: “Тумэ́ дыкхэ́н дэ саво́ амэ́ пхарипэ́н, со Иерусали́мо розмардо́, и вуда́ра лэ́скирэ схачкирдэ́ яґа́са. Авэ́нте и гада́са сте́ны Иерусалимо́скирэ, и наˍава́са до ладжяипэ́н!”
18
И мэ розпхэндё́м лэ́нґэ сы́р Дэвлэ́скиро ва́ст исы́с пэ ма́ндэ, и па́л лава́ царё́скирэ, савэ́ ёв пхэндя́ ма́нґэ. И ёнэ́ пхэндэ́: “Вшта́са и ла́са тэˍкэра́с!” И ёнэ́ подрикирдэ́ васта́ пэ́скирэ по лачипэ́н.
19
И шундэ́ адава́ хоронитя́нино Санавалла́то и аммони́тско бутярно́ Тови́ё, и аравитя́нино Ґешэ́мо, и лынэ́ тэˍса́нпэ амэ́ндыр, и тэˍракирэ́н: “Со за ры́ндо адава́, саво́ тумэ́ кэрэ́н? Со тумэ́ ґадэ́нпэ пэ царё́стэ”?
20
И мэ пхэндё́м лэ́нґэ лавэ́са дя́кэ: “Дэвэ́л болыбны́тко Ёв дэ́ла амэ́нґэ лачипэ́н, и амэ́ Лэ́скирэ слу́ґи, вшта́са и ла́са тэˍкэра́с, а тумэ́нґэ нанэ́ кэ адава́ ни саво́ ры́ндо, со кэрэ́лпэ до Иерусали́мо”.