6 ¹ И сы́р шундя́ адава́ Санавалла́то, и Тови́я, и аравитя́но Ґешэ́мо, и ави́рта амарэ́ вра́ґи, со ґадыя́м сте́на и ёй нанэ́ розмарды́ – нэ дэ одова́ дэвэ́с наˍисы́с тэрдэ́ вуда́ра по пэ́ско штэ́то, – ² тэ́нче бичявдя́ Санавалла́то и Ґешэ́мо кэ мэ лава́: “Яв и дыкха́сапэ ту́са дэ ґа́в пэ ма́л О́на”. Ёнэ́ камнэ́ тэˍкэрэ́н ма́нґэ би́да. ³ И мэ бичявдё́м кэ ёнэ́ манушэ́н, тэˍпхэнэ́н лэ́нґэ: “Бари́ буты́ кэра́в мэ и наˍачява́ва ла, со́б тэˍява́в кэ тумэ́. Па́л со тэˍачява́в адая́ буты́ и тэˍява́в кэ тумэ́?” ⁴ И ёнэ́ бичявэ́нас кэмэ́ шта́р мо́лы адалэ́ лава́, нэ мэ исы́с тэрдо́ пэ пэ́скиро ла́в. ⁵ И бичявдя́ Санавалла́то кэ мэ пэскирэ́с бутярнэ́с адалэ́нса лавэ́нса па́нджто мо́ло и кэ ёв до васта́ исы́с откэрдо́ лы́л. ⁶ Дэ саво́ исы́с чиндо́: “Мануша́ ракирэ́н, и Ґешэ́мо подрикирэ́л, со ту и иуде́и камэ́н тэˍґадэ́нпэ пэ царё́стэ, и па́л адава́ кэрэ́с сте́на, и ту камэ́с тэˍавэ́с кокоро́ царё́са. ⁷ И адя́кэж пророкэ́н чивдя́н тэˍракирэ́н па́л ту́тэ дэ Иерусали́мо ада́савэ лава́: ‘Дэ Иуде́я исы́н ца́рё!’ И адалэ́ лава́ шунэ́ла ца́рё. И ту акана́ яв поракира́са ту́са”. ⁸ И мэ бичявдё́м кэ ёв ада́савэнса лавэ́нса: “Наˍисы́с ада́саво сы́р ту ракирэ́с. Нэ ту ракирэ́с хохаибэ́н пэ́скирэстыр илэ́стыр”. ⁹ Па́л адава́, со сарэ́ ёнэ́ даравэ́нас амэ́н и ракирэ́нас: “Пирьяче́на тэˍкэрэ́н адая́ буты́, и сте́на наˍдокэрэ́на”. А кана́ Дэ́вла подри́кир васта́ амарэ́! ¹⁰ И мэ явьё́м ко кхэ́р кэ Шэма́иё, чяво́ Делаиё́ско, чявэ́ско Мешэзавело́ско, и кхэ́р исы́с закэрдо́. И ёв пхэндя́: “Дыкха́сапэ до Кхэ́р Дэвлэ́ско, машки́р Кхэ́р, и закэра́са вуда́ра Кхэрэ́скирэ, па́л адава́, со явэ́на тэˍумарэ́н ту́т”. ¹¹ И мэ пхэндё́м: “Чи лэ́ла тэˍнашэ́л ада́саво ману́ш сы́р мэ? И ко́н мэ ада́саво, со́б тэˍґарава́впэ дэ Дэвлэ́скиро Кхэ́р и тэˍачя́впэ джидо́? Мэ адава́ наˍкэра́ва!” ¹² И мэ полыё́м, со нанэ́ Дэвэ́л бичявдя́ Шэмаё́с па́л одова́, со ёв ракирэ́лас нанэ́ па́л ма́ндэ, и Тови́я и Санавалла́то подкиндэ́ лэ́с. ¹³ Ва́ш одова́ ёнэ́ подкиндэ́ лэ́с, со́б мэ тэˍздара́ндёвав, тэˍкэра́в сы́р ёнэ́ ракирэ́нас и тэˍкэра́в бэзэ́х. Ёнэ́ адалэ́са камэ́нас бы тэˍладжякирэ́н ма́н анґи́л манушэ́ндэ. ¹⁴ Зри́пир, Дэ́вла, Товиё́с и Санаваллато́с, пи́р лэ́нґирэ ры́нды, и адя́кэж проро́читса Ноа́дия и авирэ́н пророкэ́н, савэ́ даравэ́нас ма́н! ¹⁵ И исы́с докэрды́ сте́на дэ би́што па́нджто элу́ла, па́л пандждэша́ ду́й дэвэса́. ¹⁶ И сы́р шундэ́ сарэ́ амарэ́ вра́ґи и удыкхнэ́ сарэ́ мануша́, савэ́ дживэ́нас пашы́л амэ́ндэ, кэрдя́пэ лэ́нґэ ладжяво́. И полынэ́, со Дэвлэ́скиро ва́ст исы́с амэ́нса дэ адая́ буты́. ¹⁷ Дэ одолэ́ дэвэса́ барэ́ мануша́ Иуде́йска чинэ́нас бу́т лыла́ и бичявэ́нас ко Тови́ё, а одолэ́ савэ́ Товиё́стыр, Явэ́нас кэ ёнэ́. ¹⁸ Па́л одова́ со бу́т мануша́ Иуде́йска, солаха́нас тэˍавэ́н чячюнэ́ лэ́скэ, па́л одова́ со ёв джямутро́ Шэханиё́ско, чявэ́ско Арахо́ско, а Иохана́но, чяво́ лэ́ско, лыя́ чяя́ Мешулламо́скирья, саво́ исы́с чяво́ Верехо́ско. ¹⁹ Адя́кэж па́л лэ́скирэ лаче́ ры́нды ёнэ́ ракирэ́нас анґи́л ма́ндэ, и мирэ́ лава́ ёнэ́ пирипхэнэ́нас лэ́скэ. Тови́ё бичявэ́лас лыла́ тэˍдаравэ́л ма́н.