¹ ጪኒጌን ናኒ ዮ፤ ባሪዮ ከኦካ ቶኦካ ይሁኔን ጊታይ ኣኔን መቄዲንያጝ ኣይኔን እን ኣይኖጝ ከእባጅቶጝ ሃዎሻያ። ² ጋሎ እን ሄክሽ እንግኑጝ ኣይኒን ቁዋቃጝ ዬ ዋዛ ጊዬይ ሃታቺ፤ ኩፓሞ ጊዬይ ኣይኒን ቁዋቃጝ ዬ ከጋጝ ኣዬን ጊዬይ ሃኬና ኣይ ጁዋኑ። ³ ማርኬ ካንታ ጊዬይጵኔኔ፣ ናሺዬ ጋይኔኬ ካንታ እን ኣይኬ ኦካ ካንታ ጊዬይ ሳጉጝ ሃማኝሺሼ እየውባ። ⁴ እንግንዻ ዋድማ እንካ ሻሜ ውር ጊታይካ ይሁኔን ኬልሺዬኑጝ ካጌዬ ባሊካ ኣሽክዬኑጝ ጋኔን ካሎን ይሁኔን። ⁵ ከኦይን ኡዋው ሃካሊቶጝ ሳጊ፣ ከሌሜን ጋያ እንግን ኤታግ ታቺ እን፤ ዻይሾጝ ከክያጃካ ባሪዮ ጋያ እንግን ኤታጋን ኡዋው። ⁶ ዬ ቲቶ፣ ከኦካ ጫቃን ጉዩ ከኦካ ሌሜንካ ይጝ ዋድማካ ጋጝ ኣዬን እን ካርሲዮጝ ካሄክሺሼ ሃምካ ቱንሱጝ ሃይሁናያ። ⁷ እየውዻ ከኦኬ ፓይላ ይንዻ ከእምነት፣ ከክያጃ፣ ከኦኬ እባጄን፣ ከካሎን ቁዋቅትሺሼኔ ከናሺማ እን ጉዩ ኣይኬ ኡዋው ከሳጊዬ ጌይቶጝ፣ ከዋድማጝካ ሹቃቱጝ ከጌይቴ ሳጉጝ ሃኤልቅምና እየውባ። ⁸ ሃሺጜ ይኑጝ ሃማርካ ኤርጎ ኣይኔን ሺጜኔ ጊያ፤ ኣይባዬ ከቁዋቅት እን ውር ዶክ ዹዋልሺኖጝ ካእባጅ ኣኩሉክ ኣዬንካ ናሺማ ጉዋዩዬ ጊያ። ⁹ የእባጃያ ኣይኔንካ ኢየሱስ ክርስቶስ ታቺ እን ጉዋዩዬ፤ ከኩፒ ኣዬን ኔኒ እየው ከኣይቴ ሆድሞጝ እሺ ኣይባ ሆድሞዬ ኣኔባዬ ሺጝ ናንዳካ እየወ ማቲያ ኩፒ። ¹⁰ ናንዳካ ዳቡጝ ክሊማ እንካ ጠቅምሼ እየወ ካኣዬ እየው ሃይዕጝ፤ ማርኬ ቦን ባካ ሹባጵን ኣዬኔ ናንዳካ ኣዬን ከቃቢዬን የኣያ ጊታኬና ሌሚ፤ ¹¹ ካንዻ ኦይን የካርሲቶጝ ከእያይ ካንታ ጉዩ ሄክንሲዮጝ ሄክሺሽቴባ ሃምካ ቱንሱጝ፤ ይን እን የኣኒንቴ ኣይኔኑጝ ሃእን ኦኬ ሹቃ እን ኣዬ ኣኩሉኩጝ። ¹² ናንዳካ ኣይኔን ሃኣንቴ ቃቦ ሹቃያጝ ካኣንቴ ቦወንካ ኣይኔኑጝ ሃኣያ እን ኣኔያጝ ዬ፣ ማርኬ እን ካታምቴ እን ማር ኣኔን ኣይኔኔን። ¹³ ሃሺጜ ይኑጝ ማር እን እየው ከጋሊቴዬ ካኣይቴ ዶኬኔኔ፣ እየው ፓይላ ከኣይ ልኪዬ ጊያ። ¹⁴ ከሹካ ሹጝ ትርፊ ጉዩ ቋቁሽባ ጁጊ ኣዬን ጊዬይ፤ ጊዬይዻ ፕር ከሹ እንቃ ቋቁሽባ ጆጊዬን ጉዩ፤ እን ኣኔን ኦጝዻ የካሺምናባ ልኪ። ¹⁵ ይንዻ እን ፑኡሺ ጁዋኑጝ ካኒ ሺዕሺኬን፤ እን ፑኡሺ ጩዋማዻ ካኒ ጆጊሺኬን ሃኬ እያይ ሺጜ እያይኔ ቶኮጝ። {ይዕሲሼያ ቲቶ እያጝካ ቆሮንቶሱጝ} ¹⁶ ኣን ቃቦ ሹቃ እን ናኒ ቃብሼ እየው ኣምላክ እን ኣጁጝ ኦካ ሻንካ ቲቶጝ ካኣይ ኬና ጎሺዬ፤ ¹⁷ ናንዳካኦ ቲቶ ካኩዋወ ሃሚን ጉዩጝ ማር ይሁኔን ጉዩጵን ቦወኔኔ፣ ሃኬ ፎሽካዽዬን ታቺዬ ከእሺጵን ናሺዬ ናሹጜኔ። ¹⁸ ከእሺዻ ከክያጃ ሹቃ ሜይሺኔን ከኦጉዋይካ ቶኦካ ይሁኔን ፓይላ ሃይዕሲያ ጪኔ እን ጎሺዮጝ። ¹⁹ ከኦካ ይንዻ ሳጊ ከሹ እን ካቦቴ ኣይኔኑጝ ካፓይቴኬ ጋጙጝ ጊድያ ከኦጉዋይካ ቶኦካ ይሁኔኑጝ፤ ካቦቴ ኣይኔንዻጝ ካጎቢቴ ታቺ እኔ ሃኬ እን ናሹጝኬ ቃቦ ሹቃ እን ጉዋዩ ኣኔንካ ውር ዶክ ኬልሺዬኑጝ። ²⁰ ከይጝ ከኦካ ዋድማ ሹቃ ጊታይ ሃኣሽኪቶጝ ካማር ኦጉዋዩ ዻብሾ ክየምጵንዻ ጌዬኔ ሃኣጅቴባ። ²¹ ናንዳካኦ ኦኬ ጉዋዩ ማር ኦካ ሌሜንካ ባሪዮጵኔኔ፣ ከኦካ ማሪካ ውርዻ ሃኦኬ እን ኣይ ሹቃ ኣሽክዬን። ²² ፕርዻ ሹ ጁዋኑ ከኦካ ጉዋር ጁዋኑ ጪኔ እን ጉዋዩ ፓታንሲዬዬ ኣይ ቁዋቃዬ ጌዮጝ ሃይዕሲያያ ከጋጝ፤ ካንዻ ካሎን እን ናሹጝኬ እየው ኤርምኔኑጝ ኣይኒን ከሹ ና ሳጊ ኣኔን ቁዋቅትሼን። ²³ ውር ኬናካ ኣንሺንቴ ናንዳካ ቲቶ ኣኔያጝ፣ እሺ ናንዳካ እየው ዋድምሼን ሃባይዳ እን ናኒ ኣሽክዬን ከኣኑጝ፤ ውር ኬናካ ኣንሺንቴ ናንዳካ ጪንጌን ኔኒ ኣኔያጝ እንግን ሃጊታይ ጋጁጜ ኦጉዋይካ ቶኦካ ይሁኔን ጋይ ጎቢንታካ ባሪዮ። ²⁴ ዬ ኣኩሉክ ኣዬንካ ናሺማ ጊዬይ ሃኤርምንቴኬ እየውዻ ኣዬ ናጝ ሜይቴ እንግንባ ኦጉዋይካ ቶኦካ ይሁኔኑጝ።