¹ ናንዳካ ውር ጊታይካ ይሁኔን ናንዳካ ዋድማ እን ጋሽክዮጝ ካቶኩሼ እየው ዎሺሽኬን። ² ናንዳካኦ ውር እንቃ ኬልሺዬን ቃቦ ሹቃ እን ጉዩ ኣኖጝ ሃእባጅያ፤ ካርሲኬ ቦን ጊታባ ሳጊዬ እየው ከውር ዶክ ጊታይ ቆቤን ኣካይያ ኬልሺዬን የኣይቴ ሼኪሙጝ ናንዳካ ውርካ መቄዲንያ ሃቋቁሽ ቶግ ናኒዬ ሃክያጅያ፤ ኦኬ ዎሼን ባሺ እን ጊዬይዻ ቲትሼያ ውር ጁዋኑ ሃምካ ዋድማ ሹቃጝ። ³ ኣኪ ከዳቡጝ ከኦጉዩ [ትምክሕት] እን ናኒ ኣኖጝ ካማቲ ማም እያይኔ ካማር ሺዺዬኔ ከእያይ ሃሌምሻ ሜይሼ እየው ከሼክያ ጌዬንባዬ ሃይዕሲያ ጪኒጌን ጉዋዩ። ⁴ ካ ውርካ መቄዶንያ ፓዬንኬ ኣኔ የማራ ሼክዬኔ ጌያ እየውያጝ፤ ማር እየውጵኔኔ ኡዋዻ ካሎን ከእየው ከእየው ቃዬን ጉዋዩ ሃቦኩንዽያባ። ⁵ ጪኒጌን ጉዋዩ ከሌሜንካ እንካ ፓይኔ ሃሚን ጉዩዬ ኣይኔን እን የሺጝቴ ኣዬኔ የሁሉኩቴ ቃቦጝ ከሹዋጵዬ ከካሊቴ እንግኑጝ፤ እንግን ይሁኔን ማቲካ ዎሺሼኔ ሃጌይያ፤ ኣኪ ከጋጝ ኣዬን ኦይን የቃቢቶጝ ማርኬ ግድዬኔ ኣይባ ኬና ጋሽክዬኬ ሼክዬን። ⁶ ጶቅሲባ ይጝ፤ እን ኮሪ ጩዋማጝ ፓቲህ ጩዋማ፣ እን ኮሪ ጁዋኑጝ ፓቲህ ጁዋኑ። ⁷ ውር ክየም ክየም ካማርኬ ማርሺኔን ወይ ከግዳሞ ኣዬኔ፤ ካኣይንቴባ እን ሻን ኔኒ ቃቢዮጝ፤ ናንዳካኦ ባሪዮ ናሺባ ውር ኣዬንኬ ዋዛጝ። ⁸ ሹ ጮል ከኦኬ ፓይላ እንካ ዎሺሽ እየው የጌያ ፓይላዬ ናንዳካ ዋድማ ሹቃ ፓይላ ከቦቴ ኡሱጝ ባሪዮ ኣይኔን ፓይላ ካጁዋኒቲሼ እየው ቻሊባ፤ ⁹ ይንዻ፤ «ላሊያ ኣያ ኩፓንዻ፤ ጫንቃል ኣዬን ኔኒ ኡፓ ቦን ጮል» ሃኬ እያይ ሺጜ እያይኔ ቶኮጝ። ¹⁰ ናንዳካ ጴንታ ኑኑ ጴንታን፣ ኣሜን እንካ ኣይ ባላሻጝ እን እሺ ኮሮጝ ሺዕሺዬ ጋይባ እንግን፤ ካርቡካ ጫንቃል ኣዬን ጊዬይዻ ጁዋኒትሼባ እንግን። ¹¹ ሹ ፓይላ ከቻሊቴ ጋጝ ኣዬኑጝ ጌጳሲባ እየው ከኦኬ ፓይላ፣ ከጋጝ ኣዬን ጉዩ ከኦካ ውር ጊታይ ሄክሺ ዻሪ ጉዋዩጝ ከክያጃካ ባሪዮ ጎሺዬን ማቲሼባ እየው። ¹² ዋድማ ይጝ የኣይንቴ እያይ ማር ጆግዬንካ ውር ጊታይካ ይሁኔንጵን ቋቁሼኔኔ፤ ካቦሼ ባሪዮ ጎሺ ጁዋኑዬ ጊያ። ¹³ እየው ጊታይ ቦው ክያጃ ሹቃካ ክርስቶሱጝ ናንዳካጝ ሃኤርግቴ እየወ ኣይኒን ናንዳካ እንግኑጝ ኣይኒን ናንዳካ ውር እንቃጝ ናንዳካ ኣይኔን እን የዹዋልሺንቴዬ ዋድማ እን ጉዩ ፓታንሲዬዬ የሳጊቶጝ ጎቢባ ባሪዮ፤ ¹⁴ ከሹ እን ይውሺኔ ናንዳካ እየውጝ እን ናሹጝኬ ኣይኔን ታቺ እን ባሪዮ ኣዬ እንግኑጝ ፎሽካዽባ እየው። ¹⁵ ናንዳካጝ ሃማሬኬ ታቺ ዹዋልሺኔን ቻሊዬኑጝ ኣይኔን እን ጎሺ ካኣይካ ባሪዮ።