¹ ፕር እንቃ ሃካርሲያባይ ኡዋው ኤታጋን ጎሺዬን? ሞ ከዶክ ናንዳካ እየው ወይ ወርቀትካ ጎሺ እን ቶኬኬ ኦጉዩ ካኣይ እንካ ዎሺሼ ኡዋውኪ? ² እየውካ እን ውር ፓይላ እባጄ እየወ እንካ ኮምሼ እየው ሃወርቀት ጊታይ ቶኬ ሻን ጉዋይ ክያኑጝ፤ ³ እየው የማራኬ ኦኬና ቶኬኬ ቀላሜኔ ከመንፈስካ ባሪዮ፣ ማርኬ እን ኣይኬ ኦካ ባዬኔ እን ቶኩሼ ኦካ ሻንካ ውሩጝ ከእን ዋድምሼኬ ኡዋው የኣያ ወርቅ ⁴ ከታካ ክርስቶስ እምነት እን ጉዋዩ ኣይኬ ባሪዮጝ ሃኬና ሙኔን ይጝ፤ ⁵ ሊኪ ኣዬን ጉዋዩ ሃኬ ባሪዮ ዬ፣ ከሊኪ ኣዬን ጉዋዩ ካሺጝቴ ሃኬ ኡዋው ኦኬ ክየምጵንዻ ኣኔኬን። ⁶ እሺዻ ማርኬ ፊዳሌኔ እን ጋሽክዬኬ መንፈሱጝ ካኣይቴ ውርካ ዋድማካ ክያጃ ሃሊ እኑጝ ሻማ ኡዋው ሊኪ፤ ናንዳካኦ ፊደል ኒሼንባ፤ ዬ መንፈስ ኣዬንባ ዻቆ። ⁷ ኣኪ ውርካ እስራኤል ከሌሜን እን ናሹጝኬ ጎቢንታጝ ከማሪካ ሙሴ ሁቤኔ ቶዬን ሌይ ሃምካ ቶዛዽዮጝ፣ እን ከሹዋን ጩዋ እንካ ሳጊዬ እን ቶኩሼ ባይ ክያኒ ከፊደሌ ዋድማካ ኣርሼን ኩኔኬ ጎቢንታጝ፣ ⁸ ኣኪ፣ ዋድማካ መንፈስ ማር እያን ሳጊ ከኦካ እን ጎቢንታ ኣኔን? ⁹ ዋድማ እን ውር ዻብሺዮጝ ሃኬና ጎቢዬያጝ፣ ዋዳማ እንካ ሻም ጫንቃሉጝ ሃና ሳጊ ካኣይ ኬና ጎቢዮጝ/ ¹⁰ ከኦካ ሌሜንካ እን ኣኔ ጎቢንታጝ ሄክንሲያ ከእን ኣኔ ጎቢንታ ሳጊያጝ ማቲያ ኬና ማር ጎቢንታ ኣኔን። ¹¹ እንካ ሳጊ ሃኦኬና ኣኔ ጎቢንታ ኬና ኣኔን እያይንያጝ፣ እንካ ቁዋቅትሻ ኡፍጵን ማር እያን ጎቢንታ ኬና ኣይ ሳጊ ኣኔን? ¹² ኣኪ ናንዳካጝ ሃኣንቴ ቃቦ ኬና ኣኔን እያይኑጝ፣ ሃሃሳውናባ ከሾያሞ። ¹³ ውርካ እስራኤል ኦሜሌን እን ኣኔን ከታካ ሌሜኑጝ ካይዬ ኩያያጝ ከእያይ ማሬ እንካ ቱንሲ ጌዬኑጝ፣ ማርኬ ሙሴ እን ቁም ማሪ ኔኒ ከኣፓላ ዽታኬዬን። ¹⁴ ኣይባዬ ከእያይ ኮሜ ክያጃ ባካ ሌሜኑጝ ሹፉኔን እን ሌይ ጋን ናንዳካጝ ማሬ ቡሌኑጝ ሃኬ እያይ ሻን ጊዬይ ዻቾጝ፤ ካኒ ቡልኬን እንካ ሹፉኔን ካንዻ፤ ካቡሌዻ ሃኬ ክርስቶስጵኔ። ¹⁵ ሌይ ኣይ ጋኑጝ ከእያይ ኮሜ ወርቀትካ ሙሶጝ እንካ ሹፉኔኑጝ ሹፓ ሻን ጊዬይ። ¹⁶ ኣይባዬ ውር ክየም ሁቤና ሃምካ ታቺ እንያጝ ቡልባ ኦይን ሹፊ እሹጝ። ¹⁷ ታቺ እን ሃመንፈስ፤ ኦካጝ መንፈስካ ታቺ እን ኣኖጝ ነጸነት ኣኔባ ኦይን። ¹⁸ ኡዋው ፓይላዻ ከማሪ እን ማሬ ሹፌኑጝ ሃቶያ ጎቢንታካ ታቺ እን ከሼዳያዬ፣ ካሙኒንቴ ዴንታ ኔኑጝ ሃፓያባ ከጎቢንታ እያጝካ ጎቢንታጝ፤ ይንዻ ካኣዮጝ ሃኬ ታቺ እን ኣይ መንፈሱጝ።