¹ ዬ እን ናሹጝኬ ሺዕሺኔንካ ባሪዮጝ ናንዳካጝ ሃኣንቴ ዋድማጝ ሃቱሙያኬን ቃቦ። ² ኣይባዬ ሃኦይዳያ ኦግታይ ኣይካ ራሼኔ ካሪግሺሽ ውሬ፤ ሃቱዋኒናኬን፤ ሃዎርሲያኬን ክያጃካ ባሪዮዻ ከሾሮ ሳጊዻ ሃሃሳውና ከኣኩሉክ ከጃወ ከኦካ ውር ፓይላ ከኣንቴ ቦውኔኑጝ ሃቦቴባ ኡዋው ኤታጋን ኦካ ማሪካ ባሪዮ። ³ ክያጃ ሹቃ ጉዋዩ ኣይኒን ኬና ሃሹፎጝ፣ እን ሹፎጝ ሃናንዳካ ጊታይካ ካይህ። ⁴ ክርስቶስ እን ሙኔን ባሪዮጝ፤ ክያጃ ሹቃ እን ኔኒ ካጌዬ ኦሜሌሉጝ፤ ውር ጊታይ ማር ኣምልካ ዳሉጝ ኣምኒዬኑጝ ቁማ ሻን ጊዬይ። ⁵ ኡዋው ካሜይቲንቶጝ ሃእን ኢየሱስ ክርስቶስ ኣዬ ታቹጝ ዬ ማር ኡዋው ኤታጋኔኔ፤ ኡዋው ኤታግንዻ ሃሺጛ ናንዳካ ኢየሱሴ ሃማቲያያ ውርካ ዋድማ ጉዩ። ⁶ ከኦካ ሌሜንካ ክርስቶስ ባሪዮ ከኦኬ እባጄንካ ጎቢንታ ኔኒ ካኣዬ ኡዋው ኦሜሌሉጝ፣ ባሪዮ እን ሺጚ ኦሜሌል ካላሉጝጋ ኦድሙጉ ክያኑጝ ላሉጝሻ ኦሜሌል ኦካ ሻን ጉዋዩ። ⁷ ኣይባዬ ቁዋቅት ካሎን ታቹጝ ሃኬ ባሪዮ ዬ ማሬኬ ኦጉዋዩ ኣዬኑጝ ካዹዋልሺንቶጝ፣ ዳቡጝ ጊቢዮጝ ኣኔባ ኦካ ኣኒቲትካ ጁው። ⁸ ካይቄን ከኦጉዋይካ ክራጝ ሃኩርፒናኬን፤ ካካብሜኑጝ ሃቱሙያኬን ቃቦ፤ ⁹ ዋክኒን ኡዋውጝ ፓቅ ኡዋወ ሃሺዽያኬን፤ ሙር ኡዋወ ፓቅኑጝ ሃካይያኬን። ¹⁰ ዻቆካ ኢየሱስ ካዹዋልሺኔ ኦካ ሩዋ ጉዋዩጝ፣ ሹ ጮል ሃዼታ ኣርሼንካ ኢየሱስ ከሩዋ ጉዋዩዬ ሃሺሪያባ። ¹¹ ዻቆካ ኢየሱስ ካዹዋልሺኔ ኦካ ኣሩጝ እን ጉዋዩ ኣይ ኣርሹጉጝ፣ ኡዋው ሃኣያ እያይኔ ሹ ጮል ናንዳካ ኢየሱስ ሃሳጊያኬ ኦካ ኣርሼኔ ሃኣይናባ። ¹² ኣኪ ኣርሼን ኣሽኪባ ከኡዋው፤ ዬ ዻቋ ከእየው። ¹³ ኣምኒያ፤ ዬ ሃሳወና ከእያይ ሺጜ እያይኔ ቶኮጝ፣ ኡዋውዻ ሃኣምኒያባ ከእምነትካ መንፈስ እኑጝ፤ ¹⁴ ናንዳካኦ እን ቲት ኢየሱስ ታቺ እን ከኣርሼን ክያኑጝ ፕር ቲት ኡዋውዻ ከኢየሱሴ ቦኩኔ ኡዋው ከእየው ኦካ ሌሜን ኔኑጝ ሃእባጃያ። ¹⁵ ኣይኔን እን ኣኔን ውር ጁዋኑ ሄክሼኑጝ፣ ናንዳካ ጎቢንታካ ባሪዮ ከኦካ ጎሺ ካሌሜ ጎሹጝ ይን ፓይላ ማቲሼያ እየው ጥቅም። ¹⁶ ዬ ሃቱሙያክኬን ቃቦ፤ ሩዋ እን ጉዋዩካ ሹኑክ ካይኔ ኩይኒኑጝ፣ ሩዋ እን ጉዋዩካ ቱዎጙጝ ሻምባ ሃሊ ሹ ጮል፤ ¹⁷ ናንዳካኦ ጋሎ እን ጉዋዩ ኣይ ባዶዬ ኣይካ ሹ ጩዋማዬ ጌይሺሽባ ኡዋው ጎቢንታ እንካ ቦን ጮል ማር ሄክሲዬን ጌይሺሼኑጝ። ¹⁸ ዬ ካርቡ ጉዋዩ ካቶዮጝ ማር ኦካ ኦይን ጌዬዬኔ ሃኬ ኦካ ኦይን ማሬ ጌዬኑጝ፤ ኦይንካ ቶዮጝ ሃካ ሹ ጩዋማጵኔ፤ ዬ እን ማሬ ጌዬን ሃካ ቦን ጮል።