¹ ኣኪ ካማሬ እየው ቦኩንሲዬን ዎሼኑጝ ሃቱምያ እንካ ማሬ እየው እንቃ ቦኩንሲዬኑጝ፤ ² ኣን ካቦኩሲ እየውጝ፣ ከእን ሃቡኩሲዬ እየው እንቃ እንካ ዋዝንሲ ሃኒን ኣኖጝ? ³ ከሹ ባካ ሹባጝ ሃቶኩሼ እየው እያይኑጝ ሃኩንያ ሃሚን ጉዩያጝ ውር ጊታይካ ዋዝንሲ ኣኑጝ ካማራን ቦኩንሲዬኔ ጊያ፤ ናንዳካኦ ዋዝንዽዬን ናኒ ካኣዬ ዋዛካ እየው ፓይላጝ ሃኣምኒባ። ⁴ ሃቶኩሼያ እንግን እያይንያጝ ከሞይካዾ ታቺዬ ከጫንቅዬንካ ሻኔ፣ ጋኔንኬ ጭራው ጁዋኑዻ ኦቆሬን፤ ሃሻሜ ይንዻ ከእባጅ ናሺማ ጉዋቃ እን ናኒ ኣይኬ እየወ ጊያ ዬ፣ ማር እንካ ቦኩንሲዬ እየወን። {ውር እን ሴሲ ካሺዽባ ዋይሼን} ⁵ ውር ክየምጵንዻ ሞይካሲያ ውርያጝ፣ ካማርሼ ኦኬ ታቺ ማቲዬኔ ሃሞይካሲዮጝ ማር ኣንጵኔኔ ኣይን ዽኑጝ ሃኡዋው ፓይላ። ⁶ ውር እን ኣይ እያይዻ ቅጣት እን ውር ጁዋኑ ቱምዮጝ ሃሊኪ። ⁷ ፕር ሞይካዺ ሳጊዬ ካማር ቃቦ ቱሙዬኔ፣ ከዋይሺቴ ካሺዺባዬ ከሌምሲቶጝ ሁሉኩሼ እየውባ። ⁸ ዬ ካንዻ የኣይቴ እን የናሺቶጝ ከሜይቶጝ ሃይወን እየወባ። ⁹ እን ሃቶኩሼ እየውዻ፣ ፓታና እንካ ሄክሽ እየው ከሪቤን ጉዩዬ ከኦኬ ፓይላ የኣይቴ ጊታኬናካ ዋይሺንቶጝ ካእባጅባዬ ጊያ። ¹⁰ ውር እን እየው የሺጝቴ ካሺዽባጝ ኣንዻ ሃሺጝባ ካሺዽባ፤ ከኣኩሉክ ኦይን ከሺጝቴ ካሺዽባ ኣኔያጝ፣ ከኦካ ማሪካ ክርስቶስ ሃሺጜ ካሺዽባጝ ሃሺጚ ናንዳካ እየወ ጊያ። ¹¹ ሃሻምቴ ይንዻ እጁጝ ካማር ፑልታካ ሁሉኬን ጌዬኔ ጊያ፤ ሃጊያምሻኬን ቃቦ ኔኒዬ። {ውርካ ዋድማካ ክያጃ ሃሊ እኑጝ} ¹² ክያጃ ሹቃካ ክርስቶስ ከሜይሺኔን ከሹ እን ፓዬ ጢሮኣዳጝ፣ ታቺ እን ቦውሼያ እን ሃፑክ፤ ¹³ ካኣይባዬ ናንዳካጝ ሃማሬ ጪኔ ናኒ ቲቴ ሃሚን ጌዬኑጝ መንፈስ ናኒ ካኒ ቦኬን ኡሲ፤ ዬ ይዕሲ እንግን ከኦይኔ ፓያ መቄዲኒያ። ¹⁴ ኣይባዬ ከኦኬ ኣሻናፊዬንካ ክርስቶስ ሹ ጮል እን ሽርሺ ኡዋወ እያኒሼ ጆሎጝ፣ ኦካ እባጄኒንዻ ኬታይ ጉዋዩጝ ጎሺ ካኣይባካ ኣምላክ እን ዹዋልሼን ኦጉዋይካ ራቁጝ፤ ¹⁵ ናንዳካኦ ከኦካ ጫቃንካ ጊታይ ዻወዬ ጊታይ ካህዬ ናንዳካ ባሪዮ ሃኣያ ካይካ ክርስቶስ። ¹⁶ ናንዳካ ጊታይ ካህ ጊታይ ቦሼ ሃምካ ኣርሼኑጝ ካይካ ኣርሼን፣ ዬ ናንዳካ ጊታይ ዻዎጝ ጊታይ ቦሼ ሃምካ ዻቆጝ ሃኣያ ካይካ ዻቆ፤ ኣኪ፣ ሃኒን ካኣይ ናንዳካ ይን ሊኩጝ ¹⁷ ኡዋካ ሃሺጛ ናንዳካ ትርፊ ጌዬኔ ዎርሲ ክያጃካ ባሪዮዬ ከእን ጉዋሩጝሾጝ ሃማራኬ ውር ጁዋናን ጊታይኔን፤ ኣይባዬ ከውር ጊታይ ይዕሲዬ ከሃምካ ባሪዮጝ ሃኣያኬ ክርስቶሴ ከኦካ ሌሜንካ ባሪዮ ሃሃሳውናባ ከጋዛሞ።