¹ وظهرت بالسماء معجزة عظيمة: مرة لابسة الشمس، والقمر تحت ارجله، وفوق راسه تاج بثنا عشر نجم. ² وهي حامل وقاهي شتولد، وتصيح من الوجع. ³ وظهرت بالسماء معجزة ثانية: تنين احمر كبير زيادة، علوه سبعه رؤوس وعشره قرون، وفوق راسه سبعه تيجان. ⁴ وسحب بالمجرد حقه ثلث نجوم السماء، ورميبهن لفوق الأرض. وبعدا وقف التنين قدام المرة اللي قاهي شتولد، عشان ياكل المولود حقها لما تولد. ⁵ والمرة ولدت ابن ذكر، هو اللي شيحكم العالم كُله بعصا حديد. وشل ابنها هذا لعند الله ولعند عرش الله. ⁶ والمرة هربت للصحراء، اما الله قا جهز لها مكان تجلس فيبه ألف ومئتين وستين يوم والله شيعتني فيبه.

⁷ وبعدا وقع حرب بالسماء: ميخائيل وملائكتة تحاربوا مع التنين وملائكتة، ⁸ بس هُزم التنين مع الملائكة حقه وما عد بقيلهمش مكان بالسماء. ⁹ وسقط التنين الكبير مع ملائكتة للأرض. والتنين هذا الكبير هو الحية القديمة، واسمه إبليس والشيطان اللي يخدع العالم كُله،. ¹⁰ وبعدا سمعت صوت قوي بالسماء يقول: "ذاحين إلهنا نجي، والقوة والمُلك لإلهنا، والسلطان لمسيحه، لأنوه اللي يتهم إخواننا قا سقط، وهو اللي كان يتهمهم قدام إلهنا بالليل والنهار. ¹¹ فهزموه بدم خروف التضحية، وبالكلمة اللي شهدوا له فيبه، فما اهتموش بحياتهم حتى لو ماتوا. ¹² عشان هذا، افرحي يا سماوات انتي واللي عايشين فيبك، بس يا ويل للي شيقع بالأرض والبحر، فالشيطان قا نزل عندكم، وهو ملائنته غضب، وهو داري أنوه أيامه قليل."

¹³ ولما شاف التنين أنوه سقط للأرض، راح يدور بعد المرة اللي ولدت الابن الذكر. ¹⁴ ولاكن المرة جابوا لها جناحن نسر قوي عشان تطير للصحراء المكان اللي قا كان مجهز له من أول عشان يعتنى فيبه ثلاث سنين ونص بعيد من الحية. ¹⁵ والحية خرجه من فمه ماء نفس النهر بعد المرة عشان تغرقه فيبه. ¹⁶ بس الأرض ساعدت المرة، ففتحت الأرض فمها وبلعت النهر اللي خرج من فم التنين. ¹⁷ فزعل التنين من المرة وفعل حرب على عياله الباقيين، اللي يطيعوا الله ويشهدوا أنوهم يتبعوا يسوع.