¹ وبعدا شفت ملاك ثاني قوي نازل من السماء، وكان لابس سحابة، وفوق رأسه قوس قزح، والوجه حقه نفس الشمس، وارجله نفس عمودين نار، ² وبيده كتاب صغير مفتوح. وطرح رجله اليمين فوق البحر ورجله الشمال فوق الأرض، ³ وبعدا صيح بصوت قوي نفس زئير الأسد. ولما صيح سمعت انا اصوات الرعود السبعة. ⁴ ولما ردت الرعود السبعة، اتجهزت اكتب، ولاكن سمعت صوت من السماء يقلي: "ما تكتبش اللي قلته الرعود السبعة، خلوه عندك سر."

⁵ وبعدا شفت الملاك اللي كان واقف بالبحر والأرض وهو رافع يده اليمين للسماء. ⁶ وأقسم بالحي لأبد الآبدين، اللي خلق السماء واللي فيبها، وخلق الأرض واللي فيبها، والبحر واللي فيبها، وقال: "من ذاحين ما فيش مهلة، ⁷ ولما يجي الوقت لنفخة الملاك السابع ببوقه، يقع سر الله. والسر هذا هو الإنجيل اللي بشر فيبه لعبيده الأنبياء."

⁸ والصوت اللي سمعته رجع كلمني مرة ثانية وقلي: "امشي وشل الكتاب المفتوح اللي بيد الملاك الواقف فوق البحر والأرض."

⁹ فرحت لعند الملاك وطلبت منوه يجيب لي الكتاب الصغير، فقلي: "شله واكله، وشيكون مُر بمعدتك، ولاكن بفمك شيكون حلو نفس العسل." ¹⁰ فشلت الكتاب الصغير من يد الملاك واكلته، وكان طعمه بفمي حلو نفس العسل، بس لما اكلته كان مُر بمعدتي. ¹¹ وبعدا قالوا لي: "لا بد عليك تتنبأ مرة ثانية عن كثير من الشعوب والأمم واللغات والملوك."