7 ولما تشوف الجراد كانه خيل مجهزه للقتال، فوق رؤوسه نفس التيجان من ذهب، ووجوههن نفس البشر. 8 والشعر حقهن نفس شعر النساء، واسنانهن نفس أنياب الأسود. 9 ومعهن دروع نفس دروع الحديد، وصوت أجنحتهن نفس دوشة مركبات حربية وخيل كثيرة تجري للقتال. 10 ومعهن مجارد فيبهن أذناب نفس أبر العقارب، وبالمجارد حقهن قوة تعذب البشر خمسة شهور. 11 والملاك حق هذه الجراد هو ملاك الهاوية، اللي اسمه بالعبرية "أبدون" وباليونانية "أبوليون." 12 الكارثة الأوله خلصت، وباقي بعدها ثنتان كوارث.
13 وبعدا نفخ الملاك السادس ببوقه، وسمعت صوت جاء من القرون الأربعة لمذبح الذهب اللي قدام الله. 14 فقال الصوت للملاك السادس اللي معه البوق: "فك للملائكة الأربعة المقيدين جنب نهر الفرات الكبير." 15 فاتفكفكت قيود الملائكة الأربعه، اللي كانوا متجهزين لهذه الساعة واليوم والشهر والسنة، عشان يقتلوا ثلث البشر. 16 وسمعت أنوه عدد جيش الفرسان مئتين مليون فارس.
17 وشفت بالرؤيان خيول راكبين فوقها فرسان لابسين دروع في منها حمراء نار وفي منها زرقاء وصفراء نفس الكبريت. ورؤوس الخيل نفس رؤوس الأسود، ويخرج من افواهها نار ودخان وكبريت. 18 فمات ثلث البشر من النار والدخان والكبريت اللي خرجت من افواه الخيل. 19 وقوة الخيل في افواهها ومجاردها، لأن المجارد حقها نفس الحيات فيبها رؤوس تؤذي بها.
20 والناس الباقيين اللي ما ماتوش بهذه المصائب، ما تابوش عن اعمالهم الوسخة، وجلسوا يعبدوا الشياطين والأصنام اللي صنعوها من الذهب والفضة والنحاس والحجر والخشب، مع أنه ما تشوفش وما تسمعش وما تتحركش. 21 وما تابوش عن القتل والسحر والزنى والسرقة.