6 ¹ Zeriko tẽŋa dõma daan yʋ ba yansɩ wuu mɛ sõŋa sõŋa, dee daan gu poorʋm, ba daan zotɩ la Ɩsrayɛlɩ dõma. Nẽra nẽra daan ka dolɩ yansɩ la kẽ’era, ken ka dɔlla yɛsra. ² Nawẽnnɛ n ka tarɩ ba’asgɔ yele Azoze yetɩ: «Bisɛ, mam bɔ’ɔrɩ fɔ Zeriko la a nẽrba, la a zɛbzɛbrɩba wuu mɛ. ³ Dabsa ayoobɩ pʋam, fõn na fʋ sʋdaasɩ gilge tẽŋa la daarɛ woo pʋam nõor-ayɩla. ⁴ Kãabgɔ kẽma bayopɔɩ , nẽra woo dẽŋɛ nõor-bĩŋre daka la nẽŋam tara benkɔma tɩ ba dɩkɛ pe-daasɩ ɩɩla ẽŋɛ. Dabsa ayopɔɩ daarɛ ya gilge la nõorɛ ayopɔɩ, dee tɩ kãabgɔ kẽma peebe benkɔma la. ⁶ Azoze n de Anuni dayɔa wi kãabgɔ kẽma yele ba yetɩ: «Buke ya nõorɛ bĩŋre daka la buke ya bɔgrʋm, dee tɩ ya pʋam nẽrba bayopɔɩ dɩgsɛ benkɔma tɩ ba dɩkɛ peraasɩ ɩɩla ẽŋɛ bɔna Nawẽnnɛ n ka tarɩ ba’asgɔ nõorɛ bĩŋre daka nẽŋam sẽnna». ⁷ Dee yele nẽrba la yetɩ: « Sẽŋɛ ya nẽŋa, gilge ya tẽŋa la, tɩ bʋra-sɛba n yɛ zɛbrɛ lɔgrɔ la tole nõorɛ bĩŋre daka la nẽŋam». ⁸ Nẽrba la ẽŋɛ wʋ Azoze n daan bɔ ba nõorɛ tɩ ba se’em na: Kãabgɔ kẽma n tarɩ benkɔma tɩ ba dɩkɛ peraasɩ ɩɩla ẽŋɛ tole Nawẽnnɛ n ka tarɩ ba’asgɔ nẽŋam pɛɛbra ba benkɔma, dee tɩ nõorɛ bĩŋre daka la dɔlla. ⁹ Bʋraa-sɛba n yɛ zɛbrɛ lɔgrɔ la n dẽŋɛ nẽŋam, poorʋm gu’urba n mẽ n dolɩ nõorɛ bĩŋre daka la, sẽnna dee pɛɛbra benkɔma la. ¹⁰ Azoze daan botɩ nẽrba la bãŋɛ la bõn-ẽna: «Da kaasɛ ya tagurga! Sĩna ya da kãn tɔgɛ ya yetɔga halɩ ka paagɛ daar-sɛka tɩ mam wʋn bɔ ya nõorɛ yetɩ ya kaasɛ tagurga!». ¹¹ Tɩ ba tarɩ Nawẽnnɛ daka la kaagɛ tẽŋa la nõorɛ ayɩla, dee kule ba gã’argɔ zẽ’a. ¹² Beere n wiige, Azoze isge la bulika supi, tɩ kãabgɔ kẽma buke nõorɛ bĩŋre daka la ba bɔgrʋm. ¹³ Kãabgɔ kẽma bayopɔɩ n tarɩ benkɔma bayopɔɩ tɩ ba dɩkɛ peraasɩ ɩɩla ẽŋɛ la, bɔna sore, nõorɛ bĩŋre daka la nẽŋam sẽnna, pɛɛbra ba benkɔma la. Nẽŋam gu’urba la n dẽŋɛ nẽŋam, tɩ poorʋm gu’urba la dɔlla Nawẽnnɛ nõorɛ bĩŋre daka la, sẽnna masra benkɔma la peebgo. ¹⁴ Ba le gilge tẽŋa la mɛ nõorɛ ayɩla dabs-ẽŋa, dee lebe ba kẽ’a (gã’argɔ) zẽ’a. Ba ẽŋɛ la bɛla dabsa ayoobɩ pʋam. ¹⁵ Dabsa ayopɔɩ daarɛ, ba isge la be-wiine gilge tẽŋa la nõorɛ ayopɔɩ wʋ ban ɩtɩ se’em na. La de la daar-ẽŋa mã’a tɩ ba gilge tẽŋa la nõorɛ ayopɔɩ . ¹⁶ Nõorɛ ayopɔɩ la pʋam, wakatɛ sɛka tɩ kãabgɔ kẽma la peebe benkɔma la, Azoze bɔ nõorɛ yetɩ nẽrba la nõorɛ yetɩ : «Kaasɛ ya tagursi ke’enke’em, se’ere n soe la, Nawẽnnɛ n ka tarɩ ba’asgɔ bɔ’ɔrɩ ya tẽŋa la mɛ! ¹⁷ Tẽŋa la, la ẽn tarɩ sɛla la wuu de la Nawẽnnɛ n soe, sã’am ba wuu, dee basɛ Arahaabɩ n de tutulga la tɩ a vɔa, la sɛba wuu tɩ ya wʋn yẽ a yire la pʋam na. ¹⁸ Se’ere n soe la, ẽŋa n daan sʋgɛ bʋraa-sɛba tɩ tõma daan tõm na. ¹⁹ La guuse ya mẽŋa sõŋa sõŋa da dɩkɛ sɛla sɛla bõn̄-sɛba tɩ Nawẽnnɛ yetɩ ya sã’am na pʋam, tɩ ya wʋn ɛ la yelle la sã’aŋɔ bɔ Ɩsrayɛlɩ dõma. Zũuro, la sãlma wuu, yõgʋm la kut-lɔgrɔ wuu ya wʋn dɩkɛ bãma bɔ la Nawẽnnɛ, tɩ ba dɩkɛ bĩŋe a bõntarsõm bĩŋre zẽ’a. ²⁰ Bɛla tɩ ba peebe benkɔma, wakatɛ sɛka tɩ nẽrba la wõm na, ba kaasɛ la tagursi ke’enke’em, tɩ lalga lui zẽ’a pʋam. Bilam mẽŋa tɩ Ɩsrayɛlɩ dõma pɔsɛ zɛbra la tẽŋa la, nẽra woo a nẽŋa tẽntʋa, yãŋɛ to’oge tẽŋa la. ²¹ Tɩ ba kʋ nẽrba la sʋkɔbrɔ, dee yõgɛ bʋraasɩ la pɔgsɩ, kɔma la bõn-kɛgsɩ, lɔlsɩ, piisi la bõnsɩ, sɛla n vɔɩ tẽŋa la pʋam wuu, wʋ Nawẽnnɛ n yele se’em na. ²² Azoze yele bʋraa-sɛba tɩ a daan tõm tɩ ba sẽŋɛ ka vẽese bɩsɛ tẽŋa la yetɩ: «Sẽŋɛ ya Arahaabɩ n de tutulga la yire kay ese ẽ bilam la a nẽrba, wʋ yãma n daan pɔɩ yele ẽ se’em na». ²³ Tɩ bʋraasɩ bayi la sẽŋɛ ka botɩ Arahaabɩ yese, ẽŋa la a sɔ, a ma, a tãpa, a bõntarsõm, a nẽrba wuu botɩ ba ka zĩ’ire Ɩsrayɛlɩ dõma kẽ’a zẽ’a yẽŋa. ²⁴ Dee yõ tẽŋa la, la sɛla n boe mĩ na wuu sãn dagna zũuro, sãlma, la yõgʋm lɔgrɔ n de kuto bãma tɩ ba dɩkɛ bĩŋe Nawẽnnɛ fu-deego bõntarsõm bĩŋre zẽ’a. ²⁶ Wakatɛ ẽŋa mẽŋa, Azoze pɔɩ la pɔrɛ ẽna nẽrba la wuu nẽŋam: «Kã’a-be’ero bɔna nẽr-sɛka n wʋ le makɛ tɩ a mẽ Zeriko tẽn-ẽna zuo Nawẽnnɛ n ka tarɩ ba’asgɔ nẽŋam. A sãn ẽebra tẽŋa wã a dayɔ-kẽema ki, a sãn wa vigla tẽŋa la yansɩ kʋlsɩ, a nu’usi butibla ki. ²⁷ Nawẽnnɛ n ka tarɩ ba’asgɔ yʋʋn boe la Azoze mɛ, tɩ a yʋ’ʋrɛ yese tẽŋa la wuu pʋam.