¹ Kakamutu, nanu maituareta sina eweda ya nauawe. Ibaue iyanu maowere muneta amara, Yesu Keriso baue yaru uwawe. Iyari enoba, nana ewe owawa abairo nono yanane, i da nabairo urumu mui ibawa, ima a irau aiye rau yawofisu. ² I eme aeta oruawa kua siriba ere gowo uwawe. I daira eme mauiye fiyare uweta uwara ere gowo uwawe. Yanu ofe nudo tureta ba wefiyeita uwara ere gowo uwawete, umanu sina da nauawe. ³ Iya, iyanu ofe nudo tufeisi i, da Godinu aruma adarabu dasifeisi- Iya da Godi bai imumu roma ba imutada, Yesu Keriso bairo yaru uteifeisi i, da iyanu ba ofero fisa me. ⁴ I Jiu uwara umanu ofe nudo turetaba imutaita. Nono naini ba Jiu amara. I Jiu uwarama umanu ofe tureta mawirofiyeita, da naini enanari umau. Eno we imufete nono iyaini eno daufeisi. ⁵ Nanu bayama na muniro, kowa eiti (8) mesiniro nanu ofe nudo tuta. Nanu babaini baya uma isaraera awetaini awera. Uma da Bendimaninu sisiya siworari uwara. Ibaue na ba Jiu amara. Na da Ferisi amara sinete Mousisinu Tamuaru sina yawoe gowo utebitara. ⁶ Adinaro na Mousisinu tamuaru sina naubitara ibaue, nana Godi baimutada danu sina nautebita uwara ure yanae utebitara. I daira umabairo utebitara tema nono na i Jiu uwaranu tamuaru sina yawoe gowo utebitara ibaue i Jiu uwaranu urumu nabairo ibawa. ⁷ Roma ane rao raoma na irau maowere mumau, iba eno adina daira utebitara i da imue todete, nono awoina da Yesu Keriso mane imuteimau. ⁸ I da ba, awoina i nanu adina uweta sineta daira yesina yawine da ubime, na Yesu Keriso imune iba nanu adina daira yesina me teteu sinua eno imune. I na Yesu Keriso imumau. ⁹ Iba na mousisinu tamuaru sinama na da mawirofisu roma nono Yesu Kerisoma na ma irau aiye ufisu iba na daini ibine. Godi danu unu da eme yesina Yesu Keriso imueta, i imuetaini me irau giyanabu uweta sineta da Godi bai roma fari. ¹⁰ Nanu unu da Yesu Keriso iwata simate, nono danu uiyeta roma ediyari buna iwata simate, nono daini awawa utada da oferi wouri enanari woumate nono da uiyari eno uimau. ¹¹ Iba nanu adina uweta sineta daira yesina todinete, nono danu uiyeta roma ediyari i wakiki iwata simane baue wautane. ¹² Na giyanabu meba nanu wene sina da maba utawa, roma nanu unu da i wene sina yesina uwe me simau. Adinaro Yesu Kerisoma na we mune dabairo odiba iba dari eno simaneba wautane. ¹³ Nanu Kakamutu, na awoina giyanabu meba, iba na dari eno me. Nono nanu adina daira uweta sineta imue todinete awoina da Yesu Kerisonu dareiro animate etuwa iboro ane irau rao ibinu i mumane baue wautane. ¹⁴ Godima, Yesu Kerisonu ibi roma uwo wasuba urero manimate nanu waiya korai utautane inu maowere munetanu rao mumane wautane. ¹⁵ Iya yesina dai sinisiba, iba iya ewe ba dareiro mane imufeisi; nono ya mui imueta imufoita i da Godima danu ba sina, ya we maoweta ufiro, iwata sine gowo ufoita. ¹⁶ Iyanu dako, ane rao utebisi enanari ufene baue wautane. ¹⁷ Kakamutu, nanu mui sina ratu ewe daya eyawe. Nanu uweta sineta enanari utaita uwara ere gowo uwawe. ¹⁸ Nanu adinaro we sina enanari ii yaraka maiturada wemaro ya yesina nauwawe. Eme tuwere Godi dareiro anada nono Yesu Keriso da adinaro amara baue wasai utaita. ¹⁹ Uma uifiyeita iye da daira were orofaro anifiyeita. ²⁰ Roma iyanu ba ibeta orofa da urero ibifeisi. I roma iyanu mawiroeta amara Yesu Keriso fafisuba toro uteifeisi. ²¹ Yesu Keriso da fisa daiwere. Dana iyanu dubo ofeini ubu mairau aiye rau ufite, iyanu ofe maoewre danu ariobu ofe ari eno ufisu, danu buna wakikima ewe do duboro ibinita raorao yesina dana ubu uiba, i raorao yesina danu tubuneiro ibifisu.