¹ Ya Yesu Kerisoini idabade, danu buna uweta ibaini aiba sina munaita ba me? Yesu Keriso yaba totori utada, ya ma irau utasu aba me? Godinu irau aiye tamuaru imumuini, yaini gonuro maine ibinita aba me? Yanu adada totori uwe matanaita aba me? ² Yana awawa irau aiye uwe matanada, imueta taigorai imutada, Godinu waiya gonuro uteibiyawero, ibaue nana yaba yaru daiwere uma. ³ Yanu onameba daiwere daimuawete, yanu ibi dawe madaiwere uwawe. Yanu torowa yanu ibi we maotowa ratu uwawe. Mui uwaraba imuawete, umanu ibima we madaiwere uwawe. ⁴ Yanu waiya maneba daimuawete, mui uwaranu waiya unu tore mataneta ba imuawe. Yesu Keriso danu torowa da maotowa ratu uiro, nono Godima da madaiwere ui. ⁵ Yesu Kerisonu imueta ari imua we. Danu uweta sineta ari enanari uwe eawe, ⁶ Aina, Da etera ubiro Godi ari eno ibite, nono danu torowa danu irau uweta sineta imue todite, ⁷ Otowa amara ratu ari sinite, danu buna wakikini, araetaini imue todada, me sabua amara ari sinite, nono ba eme sini. ⁸ Danu torowa otowa ratu uite, nono ba eme sinite ane uieta orofaro farrite, korosiro ui. ⁹ Ibaue, Godima mune reimame urero odite nono i ibi ibinu ibi yesinanu duboro mai, ¹⁰ Enoba Yesu Kerisonu ibi roma iko kadudu yanafiyeita, urero ibinita uwaraini, ewe do duboro ibinita uwaraini, nono do ubarenaro ibinita uwaraini, ¹¹ Nono i uwara yesina umanu bebe tuma Yesu Kerisonu ibi ma daiwere ufiyeita, enanari umanu maowere muneta dai amara, ariyo daiwere Godi Baba. ¹² Ibaue nanu unu ma anikari, neiyemutu, aine wabara ure nanu sina yabairo webitararo nautada nauwe gowo utada enanari utebaita. Nono awoina na yaini ibawa utautaneba, dako ane webitararo utebita enanari uwawe. Godini iyarada Waiya uwe gowo ufoita i, yanu mawiroeta da irau aiye rau sifisu. ¹³ Iyari enoba, Godi da yaini ibada danu unu waiya gonuro utasuba, da imufote danu irau waiya ufoe iba ya unu torasu. ¹⁴ I waiya yesina utada, kamena da weya wete, urane yarane da uwawe. ¹⁵ Ibaue ya buna daiwere mufoita, emema mui uwara bai wayai da wefiyeita nono ya me roroa rau, Godinu aruma adarabu sifoita. Ya daira uweta sineta uwaranu abanaro ibada umanu daira uweta sineta dauawe. Iba ya ewe do dubonu ario ari eno siyawete, umabai Godinu sinama weya wero naufita. ¹⁶ Ibene ibene ibetanu sinama yabae gowo uwawe. Iba Yesu Kerisonu nono owere fafisu wabara ufisu, i da nana eyagi umate eno wemau, memeo dareiro anawa uwe, o memeo waiya utawa uwe eno wemau. ¹⁷ Roma na Godi bai maowere maeta ari eno maita ba iba na ma uifoita, nanu waiya baue yanu baimueta duboro inamate uimau iba yabairo yaru daiwere umau ya yesina bairo. ¹⁸ Enoba i taigorai darei roma ya yesina awoina naini yaru daiwere gonuro ufeisi. ¹⁹ Roma nana iyanu maowere muneta dai amara Yesu ba imutautane da Timoti odifiro yabairo afisu sasa ratu, ibaue na buna mumate nono iwata simau Timoti yaini ibebe are nabai fafite yanu utaita waiya sina wefiro naumau. ²⁰ Timoti da ari uwara naini ibawa, dana yaba ba imue gowo utasu. ²¹ Iyari enoba uma yesina umanu unu mane doberaita, Yesu Kerisonu unu utawa utaita. ²² Roma Timoti da yanu iwata, da nanu ba amara ubiyari eno amara. Daini naini uwa gonuro Godinu sina weada inarebitu. ²³ Enoba da naini ewero ibada waiya uteifiro emate, da irau waiya ufiro emau i da odimaro yabiro afiye ba eno imutautane. ²⁴ Roma na, iyanu dai maowere muneta amaraba, buna daiwere utautaneba, naini yabairo sasa ratu amau. ²⁵ Roma nana imutautane, i da irau, Efaforotaitisi maowere yabairo odimaro afisu. Da nanu nabue, nono nanu waiya gonuro utaitu, nono daini naini Yesu Kerisonu meremere uraneta amara fuakayai, nono yanu sina fo weta amara, nono nanu waiya uweta amara. ²⁶ Da danu su uwara ane efiye ba totori daiwere utasu, nono da danu unu ya yesina bairo ibinu. Da arama uiro ya nautabaue. ²⁷ I da ba arama daiwere uite uiye faitau ui. Roma Godima da baue totori uite, nono damane meroma, naini, ibaue na aine wabara ure totori woro woro da uteimau. ²⁸ Iba da iro odinero arasu, iba da efoita i, ya yaru daiwere ufoita, iba nono totori daiwere da mumau. ²⁹ Iyari enoba, iyanu maowere muneta amaranu ibi roma yesina yaru uwawe. Yesunu ibi roma eme ba yaru uwawe. ³⁰ Ibaue Yesu Kerisonu waiyaba farite, danu uieta mafuiya ui. Da ufiye ariba, ane na utawa uwe waiya maituafiye fari.