¹ Eto Bada heti i eto amita ambota beto putunu embomei isamane be amiga mihere kevuija ami eto amiga irae emi peae Iesu ta ambota oroviketo puvua. ² Eto embo vahi ando kinisena iketo ahurukari memega uei osaga kegue mihahija amina Iesu ta puvuto paunge teteri eto Iesu ta dei ke einge ena, '' Bada umo uje eto kito ejo ando nau javotoho ai'' ainge enu Iesu na, ''na ainge uje ere ona.'' ³ ijie Iesu na amita ingeni avo jujuruketo hame ue ke einge ena, '' umo javotoho e,''ainge enu embo amita ando ta kinise amo irae enu javotoho ena. ⁴ Eto Bada na embo amita dei ke einge ena, '' inge embomei nei amita dei mane ke evi ao ingisora, te tihi tambu eto pambuto Mama Otohu humota ari embomei ta simba ari Mama ta dei ejo no ando javotoho kito embo peae au ingore eto Moses ta avotari ke pepeni ta kajari avo ue Mama Otohu ta hande peneha harau ta ikejo.'' ⁵ Eto Iesu na da Capernaum aita horeto pahunu da Rome ta isoro tihi jigari embo vahi na Iesu ta dei puto penunu einge ena, ⁶ ''Bada, nau pure embo vahi avo korere eto hae ae bande jo ta besi hembereketo memega kegue osaga te mihia.'' ainge enu ⁷ Iesu na ingito embo amita ke mine einge ijija, ''avora na no bande ta pambuto no pure embo avo ano kojasuja, ''ainge enu, ⁸ Rome ta isoro tihi jigari embo vahi amina Iesu ta ke mine timbuto einge ena, Bada ainge manera, ''na embo samuna avoeto nau bande ta mane pambasoa. Rate mihie pe na ke pere ejo nau pure embo avo kojai. ⁹ Eto namote vahi nau isoro tihi jigirikari embo nei pepeni amita hu ta pure eona eto nau hu ta amo isoro embo mihera. Avoeto nau isoro embo ta dei pambu aisona pambasuja eto nei ta dei pura aisona purusuja eto nau pure embo ta dei evi e aisona aisuja avoeto pe na ke ejo kojai. ¹⁰ Eto isoro ta tihi jigari amina ke ainge enu Iesu ingito osa eto embomei tohota ambota ere putohora amita dei ke einge ijija, na ungota dei ke be na pere erena, na da Judea ta Israel embo nei uhoho eingeko hambae ra. ¹¹ Rate nane ungota dei erena, embomei isamane be avo ihane ta eto sohe ta aingeto pondo ta puvuto Abraham te Isaac te eto Jacob amiga enana peae Mama Otohu na simba ue iriuja besi aita indari gaga ta arumbeto indari `indisora. ¹² Rate enana Israel embomei avo Mama Otohu ga irora huin ikena umbari uje ae eora avoeto Mama Otohu na gosukaua arahe pambuto mume ta beto mihie, si ijie ti kakambuketo kiroro kiroro ijie irisora.'' ¹³ Eto ke ainge Iesu na embomei ta dei eto isoro tihi jigari embo ta dei ke einge ijija, ''umo pambujo no kebe ari amina, umo do uje ere oa avo ano keisoa,'' ainge ijinu embo amita pure ari embo avo iji amite kojena. ¹⁴ Eto Iesu na Peter ta bande pambuto Peter ta imbohi korere ando bevere avo ue besi ta hembereketo mihinu kito. ¹⁵ Avore, Iesu na pamone amita ingeni aita hame enu korere ando bevere amo pamone avo toruhunu pamone amo ereto indari ageto Iesu ikenu indina. ¹⁶ Eto mume sihikihinu embomei na ahihi sasamuna na horari embomei isamane avo umbuto Iesu ta dei ta putara. Eto Iesu na amita ke na ahihi sasamuna na kurumbenu irae pahore embomei amina korere be ora avo enu irae kokojekea. ¹⁷ Eto pure ainge aisuja amo harika embo Isaiah na mahu einge harikena, embo umo eonga na ungotenau korere bouka memega peae umbuto pambasuja.'' Ainge Isaiah na harikena. ¹⁸ Eto Bada na embomei isamane be embo be avo jorereto areto mihio kito jai jiroromba Galilee oiho ta pambasi uje eto amita ambotane ta dei enu e nga umbuto puvuo pambasi ore. ¹⁹ Da Judea embo ta ke pepeni ahe poekari embo na Iesu ta dei puvuto ke einge ena, ''ahe poekari embo, umo dei dainge pambasi ere oe avo na umo ga pambasi ijie sija ere ona.'' ainge enu ²⁰ Bada na embo amita ke mine einge ena, ''o koropu amo enda koveto enda ho ta evi ora eto di ita eora amo nga iketo iriora, rate Embo ta Mei hembereketo evisuja besi avo irae ra,'' ainge ena. ²¹ Eto Iesu ta ambotane vahi amina Iesu ta dei ke einge ena, ''tihi jigari embo, na to kihi pambuto nau mama kovane.'' Ainge ena. ²² Rate Bada na ambotane ta dei ke einge ena, tojo sari na sari enana ta ungo eonga kovihiroro umo na ambo ejo, ainge ena.'' ²³ Eto Bada na amita ambotane ga e nga bihito pahuo. ²⁴ Avore, pisara pajire ereto puvuto eva ta kajenu umo piri pajire be puto e nga iketo ahurukenu hururumbeto beasi ua. Rate Bada e nga jota evo ere ua. ²⁵ Avo amita ambotane na pambuto ujihe ke einge ea, ''Bada; nango oroke e, nango sari aisi ora.'' ainge ijie ujiho, ²⁶ Bada na enana ta dei ke einge ena, ''ungo kebe ari nau dei irae embomei, ungo do ue joru mo ere ove?'' Ke ainge eto ereto pisara te eva tihiha te ta dei jamo ara ke enu, eva eriha amo beto jamo jamo ena. ²⁷ Eto ambotane na kito mana mana eto ke einge ijera, ''embo emo do embo re, pisara te eva piri te na amita ke agi eto jamo ehere?'' ke ainge ea. ²⁸ Eto Bada eva oiho ta pambuto da javo Gadara aita puvuto embo heriso ahihi sasamuna na andirari amina use ta eto puvuto Iesu hahue ra. Eto enana amo use jota iriora na putohora avoeto enana isoro samuna be eora avoembo joru ue isa embomei na dei ainge mane pambuora. ²⁹ Eto ahihi sasamuna na si gagahe te ijie ke einge ijera, '' Mama Otohu ta Mei umo nango ta dei do asi uje oe? Eto ine na Mama Otohu ta ke peive eto amita iji ikari nango memega ikasi eka ena avo umbae mihiru ine na oroho memega ikasi puvete?'' Ke ainge ea. ³⁰ Eto enana ta engihi ta o ohu ta isamane be simba ari embo na undihe mihera avo kito ³¹ embahe na Bada ta dei penunu einge ea, ''nango ine na kurumbao pambara eto kito amo nango kurumbejo o ohu isamane be mihera oromita jota pambare,'' ainge eo ³² Bada na enana ta dei ke einge ena, ''ungo pambuvu,'' ainge enu embahe embo heriso avo toto o ohu ta jota pambuto horeo o peae amina heti i ta eto uhuveto beto pambuto eva jota beto jai indito sasari ea. ³³ Eto embo enana o ohu simba ue mihera amina pure do ijekiha avo kito joru uhuveto pambuto ahihi sasamuna andirari embo heriso amita dei pure do peae puvuna avo tirio ingia. ³⁴ Eto da amita embomei peae be amina Bada kesi uje eto pambua. Eto pambuto Iesu kito irae eto, Iesu na enana ta dei avo toto pambaja ihine ijera.