¹ Eto Bada e nga vahi mahu bihito puvuna aita ambotane ga bihito ahako egerembeto eva oiho ta pambuto amita da Capernaum ta puvuna. ² Eto embo vahi utu popora ari besi ta hembereketo mihahija avo da Capernaum embomei na Bada putuhunu kito umbuto amita dei puvua. Eto enana kebe ue ora avo Bada na kito utu popora ari embo ta dei ke einge ena, ''no ari sasamuna avo hombeto toruhona avoeto osa osa ejo,'' ainge enu ³ Da Judea embomei ta Moses ta avotari ke pepeni ahe poekari embo na Bada na embo popora ta dei do uija amita duru avo ingito ungo eonga mine ara einge ijera, ''embo emo Mama Otohu na pere pure emo aisuja te amina aisi ke ijie Mama Otohu eso eria'' ainge ijio.'' ⁴ Bada na enana ta hotembari do ere hotembihera avo kito enana ta dei ke einge ena, ''ungota hotembari ta hotembari sasamuna do eto ere ove? ⁵ Eto pure suruha mo davore, embo na no ari sasamuna ere hotembeto toruhona aisuja amo ari ngaiha rete mo, ainge embo na umo kojeto ereto pambu aisuja amo ari haiteko mane re? ⁶ Rate ungo kebe ae ere ova avoeto Mama Otohu na Embo ta Mei ta dei enda ta avora ari sovera ikari amina embomei ta ari sasamuna hotembeto touja avo ungo kebe kiova ava pure erevi aisona,'' ainge enana ta dei eto bajiriketo embo utu popora ari amita dei Bada na ke einge ijija; ''ereto, no evari besi umbuto, no bande ta pambujo,'' ainge enu; ⁷ Embo amo ereto tohota bande ta pambuna. ⁸ Eto embomei ai ta mihera amina pure erevi embo utu popora ari amita dei uija avo kito, enana osa eto Mama Otohu jakeka uera, amita be avo embo amina sovera erevi embomei ta dei ikihaja. ⁹ Eto Bada, dei avo toto pahue enda ta tihi jigirikari ta mani sirikari embo javo Matthew avo tohota pure ari bande ta arumbeto mihinu kito, ''umo na ambo e ainge enu, Matthew ereto Bada ambo ambo ena. ¹⁰ Eto Bada, Matthew ga amita bande ta pambuto arumbeto indari indisi unu, avore, mani sirikari embomei nei uhoho isamane be amite eto ari sasamuna embomei isamane be aingeto puvuto Bada te amita ambotane te ga peae arumbeto indari indie mihio, ¹¹ avore, enana Moses ta avotari ke pepeni simba ari embomei na Bada na ari sasamuna embomei ga indie mihia avo kito amita ambotane ta dei eto ingari einge uera, ''do eto ungota ahe poekari embo na ari sasamuna embomei ga vahi ta ere indei?'' ¹² Eto Bada na Moses ta avotari ke pepeni simba ari embomei na ari sasamuna embomei ga indari keije ke ijera avo ingito, enana ta ke mine einge ena, ''embo amina ando bisita korere irae amo mane sivo ikari embo ujeje euja, rate embo korere ua amina pere sivo ikari embo ujeje re euja. ¹³ Eto Mama Otohu ta ke kajari aita amo einge mihia, ungota o kaeto peneha pata tembari avo na uje ae rate ungo embomei memega ta mihera avo kito jojoga ava uje ere ona; eto ke emita be amo deire avo pambuto ungo eonga eheketo kivujo. Eto na putahana amo embo jajavotoho jage ano enana ta samuna kusijara purae rate embo sasamuna avo ano kokonjeketo Mama Otohu ta dei purora oru ue ere ona. ¹⁴ Eto John ta ambotane na Iesu ta dei puvuto ke einge ijera, ''enana Moses ta avotari ke pepeni simba ari embomei te nango te ungotenau ari mahu avoeto mahainge indari toto eora, rate do avoeto ambotane No na indari kusijae mahainge indari indie iriore? ainge eo ¹⁵ Bada na enana ta ke mine einge ijija, eto jimbari embo avo pambae enana ga mihiru embomei jimbari pondo ta oru ehere puvera amo indari indae osaga kegue si ijie iroro te? Rate iji ere putuhua amikote jimbari embo avo embo na enana ta pondo jo ta umbuto pamhuroro avore enana osaga kegue si ijie indari kusijasora. ¹⁶ Eto irari mahu kihi ta ari amo inono bo mahu ainge papasekari ra. Eto embo na mane bo eha ta ipiki na bo mahu perara ari aita mane iketo ihirasuja, amo ipiki eha bo mahu ta iketo kajehija amo perara eto pambuto samuna be aisuja. ¹⁷ Eto nei amo embo na jai higi mahu aita jai mane timbu ora. Eto enana ainge aisora, amo jai higi amo gahihiru jai jojeketo beto pambu irae aisuja. Rate, enana na jai higi eha aita jai eha timbasora kito avo jai higi te jai te avo peae orekasora. ¹⁸ Eto Bada na ke erevi enana ga ijie mihinu avore, Judea ta tihi jigari embo vahi na puvuto amita dei paunge teteri eto embo amina ke einge ijija, ''Nau iae avo eha oroho ambija, rate umo pambuto ingeni amita ando ta tembao pamone avo ereto vasiri umbaja ere putoho na.'' Ainge nu ¹⁹ Bada amita ambotane ga soueto ereto Judea tihi jigari embo amiga pambua. ²⁰ Eto dei ta pahuo pamone vahi amo jua 12 ainge avo sasaga pojihe mihahija amina Bada kito ²¹ avo pamone amina umo eonga na ke einge ena, ''eto na Embo omita bo ta hame aisona, amo na kojasona.'' Ainge hotembihe kuta puvuto Bada ta gara ipiki ta hame unu ²² Bada hapereketo pamone avo kito, ke einge ena, '' kakara, tunga javotoho ejo. Eto umo Na kebe ere oa avoeto kojasoa,'' ainge ijinu iji amikote pamone amo kojena. ²³ Eto Bada na Judea ta tihi jigari embo ta bande ta puvuto horenu bija puri ta paku kambari embomei te eto pusuta puvuto mihera embomei amite aingeto sisi sasi ijie mihio kito. ²⁴ Bada na ke einge ena, ''ungo pambuvu irae ai, kakara emo amburae, rate teho evo ue mihia,'' ainge enu enana ai mihia na ke avo ingito Bada urumbihe ganini ijera. ²⁵ Amita ambo ta orope na embomei peae avo eo irae arahe ta pahuo kakara besi ta hembereketo mihina rumu ai Bada na horeto amita ingeni ta jiginu, kakara amo besi toto soueto vasiri erena. ²⁶ Eto pure erevi ena amita duru avo dei amita embomei peae ta hande eo avo ingia. ²⁷ Eto Bada dei avo toto pahunu, tihi poa ari embo heriso amina ke ingito amita ambo ta putuhe gagahe ijie ke einge ijera, ''David ta ohihi, nango ta dei jojoga e.'' Ainge ijio ²⁸ Bada pambuto bande jo ta horenu tihi poa ari embo heriso amo ambota puto horeo. Bada na enana ta dei ke einge ena, '' eto nane ungota tihi ano hirikasuja amo ungo kebe ove?'' Ainge enu, enana na Bada ta dei ke mine einge ea, ''Avora, Iesu nango kebe ere ora, ine na nango e tihi hirikai'' ke ainge eo ²⁹ Bada na enana ta tihi ta hame ue ke einge ena, ''nane ungo kebe do ere ova ainge aisona,'' Ainge ijinu ³⁰ eto enana ta tihi hirikenu kia. Aingeto Bada na enana ta dei ke ngaiha einge ena, ''Eto nane ungota tihi ehene hirikehija ainge mane embo nei uhoho ta dei avo ingorojo.'' Ainge ena. ³¹ Rate embo heriso amo Bada ta ke peive eto pambuto enana ta dei pure do ijekihaja amita duru avo embomei peae dei amita mihera avo eo ingia. ³² Eto embo heriso tihi hirikena avo pahore, avore, embo vahi ke ambu mihahija amita be avo ahihi samuna na andirari avo embomei na umbuto Bada ta dei puvuo. ³³ Bada na ahihi samuna kurumbenu pahuo, embo ke ambu amo ke enu embomei na kito mani mini eto ke einge ijera, ''Nango pure einge Israel enda ta kia kihi ta pure erevi ere kegora,'' Ainge ea. ³⁴ Rate enana Moses ta avotari ke pepeni simba ari embomei na pure evi kito ungo eonga na pure ainge ahera avo Bada na ua avoeto enana Bada ga hini kambari ue ke einge ea, ''Amo ahihi sasamuna ta tihi jigari na amita dei sovera ikeuja avoeto, ahihi sasamuna ere kurumbiha.'' ³⁵ Eto Bada na da pepeni memeni peae ai ta hehue, Judea embomei ta giu pari ari bande jo ta ahe poekihe, duru javotoho Mama Otohu umo eonga na amo embo ta tihi jigari embo avo ahemba ue eto embomei ta memega korere neite neite peae be avo irae enu kokojekea. ³⁶ Eto embomei isamane be avo bouka memega na haito haito uei osaga kegue mihahera avo Bada na kina, rate inono o sipi ainge simba ari embo irae kito jojoga umbuna. ³⁷ Avoeto Bada na amita ambotane ta dei ke einge ena, ''I be na taherembeto sari ere ua, rate bujeto umbari embo avo heriso ra. ³⁸ Avoeto i be Mamo ta dei sasau be pari evujo pure embomei nei uhoho ikau pambuto i be bujare.'' Ainge Bada na ena.