¹ Eto Iesu na ke einge ena, umo embo nei ta ari samuna kito mane aisoa, eto umo ainge aisoa amo ainge dombo Mama Otohu na umote vahi kasasuja. ² Eto embo nei ta ari samuna kito ihi tirihea ainge dombo avo Mama Otohu na ari no avo embo nei hu umbea amita heka inono be ai ta umo kasasuja. ³ Eto ungota namei ta vasiri samuna isapa i ta momoru ainge tihi ta mihia avo ere kegova rate ungota vasiri samuna pajire be amo i uhu ainge ungota tihi mihia avo do eto kiae ere ove? ⁴ Eto namei ta dei no tihi ta i momoru mihia avo kojikasi?' ungona ke ainge ereva te ungota tihi i uhu pajire na peikehija mihia avoeto daingeto avo? ⁵ Ungo ari samuna hatihe ke sokova ari embomei eto ungota ari samuna i uhu ainge tihi ta mihia avo kihi umbuto gosuketo arahe au jai eto kegue namei ta ari samuna isapa i momoru ainge tithi ta mihia avo umbuto gosukevu. ⁶ Eto Mama Otohu ta ke amo otohu avoeto Mama Otohu ta ke ingito ke be ae embomei amita dei ikavojo, ainge aisova te enana amo ino o ainge hotembari tuhaupa te avoeto enda ikaro beau utu na hatiroro samuna ururu hapereketo kambuto heveto memeni ari embomei ra. ⁷ Eto Iesu na ke ijie einge ena, penunu ijiro ikau umbasoa, ahe ururo ikau keisoa, poporo ururo Mama Otohu na bekuri umo embo hirikasuja. ⁸ Amita be amo embo amina penunu aisuja amita dei Mama Otohu na ikau umbasuja, ahe aisuja embo amina hambasuja, eto embo amina poporo aisuja amo Mama Otohu na bekuri hirikau embo amo horasuja. ⁹ O ungo embo nei uhoho amo mei hatira te ra. Eto no mei na no dei ta indari penunu aisuja amo karu amita dei mane ikasoa. ¹⁰ Eto mei na umo o penunu aisuja amo koso o embo amita mane ikasoa. ¹¹ Avoeto ungo embo sasamuna rate daingeto ungota mei hatira ta dei hande javotoho ikasova amo ungo kiarira. Eto ungota Mama uhu ta mihia amo hande embo be avoeto embo amina penunu amita dei au donda isamane javotoho pere avo ikasuja. ¹² Eto Mose ta avotari ke pepeni peae te harika embo te ta ahe poekari peae amita ke susu be amo erevi ra. Eto pure peae be amita jota embo na no dei ta do ara ujeje oa ainge avo inena embo nei ta dei kihi ejo kioi. ¹³ Avoeto, dei tambu pe isapa ai ta horeto pambuvujo. Amita be avo dei tambu pe pajire pambari amo embomei pahue sari eora dei tambu ai pambavojo, eto embomei isamane be na dei ai ta ere pahora. ¹⁴ Rate dei tambu pe isapa pambari haiteko mane gaiha avo ahe eto kito ai ta itito hututo ue pambavojo. Amita tutumo ta irari javotoho daroho umbasova, eto embomei heriso be na hambu ora. ¹⁵ Eto harika embo be mane amina Mama Otohu ta ke hande ue ahe poekari sokova aisora avoeto keisi keisi ue irivujo. Eto ungo amo Mama Otohu ta undurari o sipi aingera. Eto enana undurari o sipi ta hoga avo asuketo ungota dei puvurusora rate enana ta jo ta amo apu isoro ino ra. ¹⁶ Eto (inena) i na be eto mihei kioa ainge avo harika embo sokova amita ahe ivo na enana deire avo harikau keisova ke amita be amo eingera. esi saese ai ta hamesi mane be eto mihei bujeora eto i koriri ai ta oga mane be eto mihei imbuora. ¹⁷ Hajire vahi einge ta, i javotoho na be javotoho euja rate i samuna na be samuna euja. ¹⁸ Eto nei i javotoho na mane be indahu aisuja, ainge dombo indahu i na mane indari be javotoho aisuja. ¹⁹ Eto indahu i mane be javotoho eora kito peae jaro beau i ta gosukaro evekasuja. ²⁰ Avoeto, enana indahu eto indari i amita be na enana deire amo harikeoi kiora ainge dombo enana Mama Otohu ta ke sokova ari embomei ta vasiri na harikau enana deire avo ungo be keisova. ²¹ Eto embomei peae nau ta Bada, Bada ke eora amina mane Mama Otohu ta tihi jigari besi ai ta horasora, rate embomei amina nau Mama uhu ta iriuja amita uje eora amina pere horasora. ²² Eto vasiri kasari iji amite embomei isamane be na nau dei ta ke einge aisora, Bada, Bada nango javo no ta Mama Otohu ta duru hande eora, ahihi sasamuna kurumbeora eto javo no ai ta javotoho ikari nei te nei te ere ovora, ke ainge aro ingito ²³ enana ta dei ke mine einge aisona. 'Na ungo kiaera. Ungo ari sasamuna embomei avoeto nau ke ambo ae eova toto beto pambuvu irae ai, ke ainge aisona. ²⁴ Avoeto embo amina ke nau ingito ke avo agi aisuja embo amo inono uha embo na amita bande karu ado ta ihinu ²⁵ eto ga beto jai buenga putuhunu pisara pajire puto bande amita hamo ta tena rate koheketo beae ra amita be avo bande amo karu ado ta iharira. ²⁶ Rate embo amina ke nau ingito eto ke avo ambo ae au embo amo inono hotembari irae embo na amita bande horasa ta ihinu ²⁷ eto ga beto jai buenga putuhunu pisara pajire puvuto bande mimikenu benu jai na umbuto irae pambuna." ahe poekari ainge Iesu na ena. ²⁸ Eto Iesu na ke erevi peae enu puvuto irae enu embomei peae heti areto mihija amina ahe poekari erevi ingito mani mini ea, ²⁹ amita be amo Iesu na enana ahe poekena amo enana ta avotari ke pepeni kiari embomei ta ke ainge mane tihi jigari embo be na ahe poekihia ainge ijie ra.