¹ Eto Iesu na ke einge ena; eto ungo pure jajavotoho ari embo na ungo pure jajavotoho do ere ova avo mane embo ta tihi ta avo enana ungo kito osa ara mane aisova, eto ungo ainge aisova amo ungota javotoho mine ungota Mama uhu ta mihia amina mane ikau umbasova. ² Avoeto ungo donda irae embomei ta dei hande do ikasi ue kito amo embo mane ikavo ungo kihi umbuto pahue huin hukihe embo ta jo umbasi inono tihi poembari embo na gui pari ari bande jo ta eto dei tambu ta embo na kiora ahemba eora ainge avojo, eto hande dei einge ta eora embo amo embomei na enana osa ara ijie eora. Eto nane ungota dei ke be erena enana ta pure jajavotoho ta mine mahu umbere irae ehija avoeto Mama Otohu na hande nei mane ikau umbasora. ³ Rate ungo donda irae embomei ta dei hande ikasi ue kito amo embo nei no egihi ta avo kioro ojiketo kiae ikevujo, ⁴ ainge aisoa kito avo no hande amo ojikari ta ikeha. Eto ungota pure javotoho do ere ova avo ungota Mama na ungo ojikari ta kito ungota pure ta javotoho mine ikasuja. ⁵ Eto Iesu na ke einge ena; ungo pari aisi ue kito inono tihi poembari embo na pari ado na eora ainge avojo,eto enana amo embomei na kito osa ara Mama Otohu jakeka ari bande jo ta eto dei tambu kaja ta arahe tambu ta ereto heteto pari asi ujeje eora eto ari einge eora amita mine amo embo na kito osa eora. Avoeto nane ungota dei ta ke be erena, enana ta pure ta javotoho mine amo mahu umbere irae ehija. ⁶ Rate ungo Mama Otohu ta dei pari aisi ue kito amo ungota bande rum jo ta horeto, bekuri ahuruketo ungota Mama ta dei ojikari na pari evujo. Eto ungota Mama na ungo ojikari ta do eheva avo kija amina javotoho mine ikau umbasova. ⁷ Eto ungo pari ue kito, amo inono tihi poembari embo na pari vahi mahu eora avo ehako mahuko pari ue ke sio sao ijie koso be gorumbeto pambuora, eto enana hotembeora avo enana ta mama godi sokova amina ingisuja amita be avo enana ta pari ke isamane be na eora aingeko avojo. ⁸ Avoeto, enana Mama Otohu kiae embomei emina eora ainge avojo. Eto ungota Mama Godi na ungo donda deirami uje ova amo mahu kegoi ungore ambota penunu re ereva. ⁹ Avoeto pari ta ke einge ijie pari evujo: Mama nangota uhu ta irioa, javo no otohu avo otohu aisora. ¹⁰ Uhu ta tihi jigioa uje no eora ainge dombo enda ta ikejo puroi. ¹¹ Nangota indari iji hekeri ikejo. ¹² Eto embomei na nangota dei ta ari sasamuna do eora avo hotembeto to ora ainge dombo nangota ari sasamuna inena hotembeto tojo. ¹³ Nango engekari ta umbuto pambaojo, eto samuna ta nango oreke.' ( Eto no tihi jigari te sovera te usasa te daroho irisora avora.) ¹⁴ Eto ari sasamuna hotembeto toari amo eingera, eto ungo na embo ta ari sasamuna hotembeto toasova ainge dombo ungota Mama uhu toho amina ungota ari sasamuna amo hotembeto toasuja. ¹⁵ Rate ungo na embo ta ari sasamuna hotembeto toae amo ainge dombo ungota Mama uhu ta iriuja amina ungota ari sasamuna mane hotembeto toasuja." Iesu na ainge ahepoekena. ¹⁶ Eto Iesu na ke nei einge ena, eto ungo indari toto kito amo tihi poembari embo na indari toto osaga tombu ue iriora ainge avojo. Eto enana tombu pe umo kuhahe eto aku kajae ainge eora amo embo na kito enana indari toto mihera avo otohu ara eora ainge avojo. Eto nane ungo ga ke be erena amo enana ainge eora amo enana ta ari javotoho mine amo mahu umbere ra. ¹⁷ Rate ungo indari toto mihie kito amo u seha na aku ta jigito umo na tombu pe egeto ¹⁸ ainge aisoa kito na avo embo nei na ungo indari toto miheva amita hajire mane keisora, rate ungota Mama amina pere ojikari na kito eto ungota Mama na ojikari na do eheva kegua amina ungota pure ta javotoho mine ikau umbasova. ¹⁹ Eto ungo enda donda umbuto birihu ue iketo irovojo, amita be amo ungota hajae bajae amo kakorosi na jirembasuja ain pijeja bihisuja eto pegene embo na bande pejeto horeto pegene asora. ²⁰ Rate Mama Otohu ta irari besi ai ta ungota hajae bajae avo tahavo ta ikevujo, eto kakorosi te ain pijeja te mane aro samuna aisuja, eto pegene embo na mane bande pejeto horeto pegene aisora. ²¹ Eto no donda irari besi ai ta no jo hotembari te ga peae ai irisuja. ²² Eto no tihi amo no ado uhu ta usasa ra. Avoeto no tihi avo javotoho amo no ado uhu peae amo usasa pere aisuja. ²³ Rate no tihi avo samuna aisuja amo no ado uhu peae amo mume pere aisuja. Avoeto, usasa jo no ta amite vahi amo mume kamba kamba aisuja, eto mume kamba kamba amita pajirari heka amo do ihokore. ²⁴ Eto vahi damina embo herijo ke agi ari haite manera . Eto nei tumo ue eto nei vahi tunga umbasuja, o ainge embo nei amita ke agi ue nei amita ke uje ae aisuja. Ainge dombo, inena Mama Otohu ta ke te mani te inono ta tunga umbari haite manera. ²⁵ Eto Iesu na ke einge ena, '' Avoeto nane ungota dei erena amo ungota irari umbari ta osaga avojo, ungo do indito evisova eto do asuketo hembasova avo hotembu hotembu avojo, eto vasiri no pajire ra amo indari pere mane eto ado no pajire ra amo asukari pere manera. ²⁶ Eto di uhu ita eora avo kivu. Eto enana donda be kokoveketo be ei tureto umbuto horoma ta mane ikeora, rate ungota Mama uhu toho amina enana ta indari ikihei indiora. Rate ungo amo moha be hambo hoave ainge Mama Otohu ta sage tambu ta rate di avo manera. ²⁷ Eto ungo embo nei amina osaga na au amita enda irari jua nei hamo ta tembao iji koso mane aisuja. Avoeto donda umo uje oa avo hotembihe osaga aojo. ²⁸ ungo iribo deirami asukaeheve amita mane osaga keisova te i enda ta ereuja buji hari nei te nei rate pejeto mihera avo kegue hotembevujo. Eto enana pure mane eora eto enana iribo mane kembuora. ²⁹ Rate nane ungota dei ta erena, Israel ta tihi jigari pajire donda embo be Solomon amita iribo asukari amo i buji emita kiari sago javotoho amiga inono ae ra. ³⁰ Eto Mama Otohu na daingeto i buji enda mihera amita dei iribo asukari javotoho ikeoi asukeuja eto iji oroho irisuja eto iji nei amo karau eto enda beasora, rate ungo i buji ainge mane ungo embo avoeto Mama Otohu na ungota dei iribo mane ikau asukavote? Eto ungo Mama Otohu kebe jo be na ae eova embomei ra. ³¹ Avoeto osaga kegue nango do indie kuhihe aro eto nango do ohue asihe aro ainge avojo. ³² Eto ke ainge amo Mama Otohu kebe jo na ae embomei na pere donda peae erevi ahe eora rate no Mama uhu toho na donda peae erevi ujeje oa amo mahu kiuja. ³³ Rate kihi be kihi amo Mama Otohu ta javotoho tihi jigari avo ahe evujo eto amina ungota indari donda te asukari donda te peae be emore ungota dei ta ikasuja. ³⁴ Avoeto evito ta osaga do puvuruja avo mane hotembasova. Evito ta osaga do puvuruja amo iji amite aro tambu aisuja. Eto iji hekeri amita osaga amo emahe inono ra.