¹ Eige negubutu gera daure vara veitera ogere yabena Keriso Iesu uhura. ² Badivara Horu Aena maguriva Keriso Iesu uhurage raki ai isuke aubougi arigevenu daure renu hogeva seni. ³ Eige aena kiki dibana veite badivara auka hero veite ahata makava, Dirava ramu kinu. Au Moe kobuga matava auki besuganu au nagate daure uhura auka daure damunava goisa, eige auki daure eraganu ahata makava. ⁴ Au ena kine makava ra aenavara riaga goisa ni magurivehe, no ahata makava orogi veite koitava ya, eduge Horu uhura maguri ragohare koitava ya. ⁵ Ogeri yabena ahata makava maguri ragoha yau uhure yabera ahata makava gera, eduge ogere yabena Horu uhura maguri ragoha yau uhure yabera Horu uhura gera. ⁶ Badivara ahata makavara uhu ananavara hogera, eduge Horu uhura ananavara magurivara renu mai. ⁷ Ahata maka uhu ananavara isukatera oti Dirava au, badivara uhu anana era beta Dirava aenave uhurahe gera, renu beta riagahe uhu anana e mimivara. ⁸ Ogere yabena ahata makava maguri ragoha yauka beta Dirava hegiri gahiga dibanara. ⁹ Eduge, aka beta ahata maka uhurahe gera eduge Horu uhurahe gera, era Dirava ai uhurehe uiege. Eduge koita bena Keriso horuve uhura gena veitenu, eigera auka veitera. ¹⁰ Keriso na ai uhurehe renu, ahata maka era hoekera daure uhura, eduge au Horuvera magurivera matau riagava ruta. ¹¹ Iesu hogeva maguri gahi goiragane na ai magurive uhuragera, auki Keriso hogeva maguri gahi goiraganu aukena mati maguri ya mohigeisa yai ahata makahe, au horuvehe ai uhurehe iuare. ¹² Eige, di ogo nanuheya, noka mimi gaha yabera, eduge beta ahata makava eige noka ahata makava maguri ragohisa. ¹³ Badivara a ahata makava maguri viege, aka negu hoge ragira vara, eduge a Horu va ahata maka maguriva hoekege, aka maguri vara. ¹⁴ Koita dadaga varamu Dirava ramu au Horuvehe nisigevenu, Dirava gamuhe yabera. ¹⁵ Aka beta be yau meve kiki horuva Mimi veitera eige aka sigo uhura gaitana magurivisa; eduge aka Horu narina aki manu, eige noka nigo ragohisa, "Abba, Ni Mame!" ¹⁶ Horu Aena vara no horuve auki riaga gahima noka Dira a gamuhe yabera. ¹⁷ Eige nona momona yabenu, e makavara noka bia yabera, Dirava eiera. Noka Keriso ruta bada bia yabera, au rutagena no huhu ragohanu noka mati au ruta hegiri ragohira vara. ¹⁸ Negubutu huhu vara beta geregere vera ihie mage ni gasina orogare nagatera. ¹⁹ Badivara no anavare ihie orogare ra Dirava gamuhe orogare era. ²⁰ Mata kine ora maka magete goigo vara, beta avahu au uravehe, eduge mata o kine koitava au gahara vane gumavahe, so varavare, ²¹ mata avahu au huhuvehe oti mudu ragiravara mati goiragi Dirava haire uhurahe siri ragohi au gamuhe gahisa. ²² Badivara noka dibanara mata ora huhu nagima auki renu meva uhurahe bada dagedage huhu nagohi orogi negu. ²³ Beta eguera, no novahu no gainage, Horu Aena idi tahaka isage vara noigera, ni uhurehe huhu nagoha, no idigeige vaniva va orogare uhurahe, eige ni ahata make ra isage goigo vara. ²⁴ Uhu anana eige noka maguri ragohisa. Eragare iaganiva yabera beta no eragare era. Unuhuna eragare iaganiva anana va vima? ²⁵ Eduge no anana vare iaganiva noka erara veite, tabetabe gera nona narigeisa. ²⁶ Guma kobuga eigera, Horu Aena varaki ni isukehe uhura no narigeima. Badivara noka imimi dibana veitera, eduge Horu Aena varaki ni dainehe ga vima no anana veite huhuva uhurahe. ²⁷ Aukaki ni soruke ra auki eragima renu Horu Aena vara ni uhure dibana, badivara auka Dirava aena koitatuhe yau dainehe gera auki imimi vima Dirava gahara vare gumavahe. ²⁸ Era noka dibanara Ogere yabena Dirava gahara ragoha, auka iaga aubogi gera auki mage gahi geima, ihiro gevege au gahara vare kikive dainehe. ²⁹ Badivara auka subuta gera auki dibana goinu koitava ore yabena au Moe toage erara vanu, koita era moe biavara au ogo nanuhe yau uhura. ³⁰ Ogere yabena au yau mageve ronu, e yabera auki ihiro gevenu. Ogore yabena au ihiro gevenu, aukame hedo mehigevenu. Ogere yabenu au hedo mohi gevenu, aukamu hegiri gahigevenu. ³¹ Eige, nona otado be rorovanu iaga o yau dainehe? Dirava na noruta genu, unuhuna no besibe gahi geigevanu? ³² Auka au Moe kamuka veitera eduge auki mi yagemi ni bouge ni dainehe, eige auna beta au ruta iaga mage no mohigei gevanu? ³³ Unuhuna Dirava ihiro gevene koitava daure gahigeisa? Dirava roege auna variada. ³⁴ Unuhuna daure havara gahima? Iesu Keriso raki mage raganu-rahovara, yaukamu magurivi goiraganu, aukamu e Dirava vamagahe, aukaki ni dainehe gavima renu memima. ³⁵ Unuhuna Keriso mageve uhura no arigeisa? Daure uhura, se huhu uhura, se inai uhura, se gubu uhura, se bututa, se sigo uhurahe se egi ruta? ³⁶ Torevane nagate, "Aka mageva misa dainehe ge yauki vani uhubage uhurahe ni bouge no gahigevenu. Nokera yauki no idigei noka gahigeige mamoe va nagate. ³⁷ E aubougi uhurahe noka ihite koitava nagate yabera, no mage gahigevene koitava dainehe. ³⁸ E dainehe daka hero kime daki beta hoge, se maguri, se aneru ya, se government ya, se negubutu iagava yau, ³⁹ se egeva, se dobukeva, se iaga be mati kine, e yabera Dirava magevehe no kasa geisa, era Iesu Keriso uhurahegera auka ni Rohivera.