¹ Di ogo nanuhe ya, (Badivara Aena koitava yabera daki ga gahigeima), koita be mata o ada maguri varera, aena derikahu gera. ² Badivara magi ra au mobore dainehe aena derikahu auki uma, eduge au mobore hogerage ge, auki beta aena derikahu gera. ³ Eige, au mobore maguri vare uhurahe, auna atabe rutagenu au uma, koita yabera rorovara auka ni muduka magivara. Eduge au mobore hogerage ge, augera aena bera veitera, eige auka beta ni muduka magi vara au atabe ruta uiege. ⁴ Eige, di ogo nanuhe ya, Ya gainage aena derikehege yaki hoge ragohanu Keriso ahatane uhurahe. Eige yaka koita be ruta kobabera, era, koita era hoge vagera auki maguri vanu, eige nona idi nagate makera gahisa. ⁵ Ahata maka maguri daureva noki ni ahata makehe maguri gahege, maguri daure era, aena uhura me miege hoge dainehe. ⁶ Eduge negubutu gera noka beta aena derikahu gera. No isuke kamui uhurahe uiegera bina veitera. E makavara noka ni meve kisa Horu isage uhura, beta guma emene uhura torevane nagate. ⁷ Nona negu bina otado rorovanu? Aena avahugena vanu daurenu? Auna so beta ena vivive goiare. Au ena vivive goiare, dakamu beta daure dibana goiare, au aena uhura goigo veite goiare. Eige daka beta gahusi dibana goiare eduge aena roiare, " "Anegu iaga be eragi gahusi gahime" ⁸ Eduge daure varaki guma be eraganu mage dainehe ge auki guma e uhura gahusi guma aubougi daiseni mioroganu. Aena veite goiare daure bera veitera. ⁹ Daka magurivera Aena veite uhurahe, eduge aena orogane itaharahe, daure varaki mata manu, ¹⁰ eige dakamu hoge raganu. Aena maguri mi orogane ramu veite goinu eduge aumu dai hoge gumava goinu. ¹¹ Eige daure varaki guma e eragi mage dainehe auki da taraganu. Aena e uhurahe gera auki da hoekanu. ¹² Eige aena vara aena vara renu riaga vara, renu magera. ¹³ Eige otado be dainehe mage goisa ronera mati dai hoge goisa? Auna so beta ena kikive goiare. Eduge daure, au erarahe gera auka daure ra, eraki hoge mi oroganu mage uhura, renu aena e uhura daure vara daure raho hereave goigo vara. ¹⁴ Noka dibanara aena vara horu uhurahe gera, eduge daka ahata maka maguri vara daki maguri gahima. Daka daure uhurahe gera daki sirivanu. ¹⁵ Eige otadovanu da kima, daka regunaki anai mage gahiga veitera. Otadovanu da kiki gahara vima, renu otadovanu da besibe gahima, Dakamu e kima. ¹⁶ Eduge daka da besibe gahare daki mati kima, aena vara magera era daki riaga gahime. ¹⁷ Negubutu gera beta daki daure kima eduge daure di uhurehe uiare raki kima. ¹⁸ Eige daka dibanara di uhure, renu di ahata make, ra mage be veitera. Badivara mage kikivara mu o dai, eduge daka orenaki kisa. ¹⁹ Da mage gahara vare, daka kiki veitera, eduge daure da besibe gahara dakamu mati kima. ²⁰ Eige da negu da besibe gahare mati kiare, era beta daki daure e kima, eduge daure di uhurehe uiare raki kima. ²¹ Da mage kisa roiare, daure ramu e da ruta. ²² Eige daka Dirava aenave uhureahe gera daki di uhurehe hegiri vima. ²³ Eduge daki di ahata make uhurahe mati aena nune be era geima. Di uhurehe aena isage uiare rutagera auki iani vima. Di uhure ra aena daure e raki manu era di ahata makehe gera. ²⁴ Di uhure ra nunenune vera! Unuhuna daure o uhura da mi hakiha vanu? ²⁵ Eduge Dirava haire uhurahe gera Iesu Keriso ni Rohi Bauge ve au seni! Eige, Daka davahu Dirava aenave dana maguri gahisa. Eduge, ahata maka uhurahege dana daure kisa.