¹ Eigena, otado magebena Jew ya misa ragoha? Peritome magevena orena kikivenu? ² Au mageve ra raho hereavera guma aubougi uhurahe. Urugoigera, Jew yabera yauki riaga gahigevenu Dirava mageve yau senige auna orogisa. ³ Auna negu orena vivivenu, Jew bea gabidadama veite goiege? Yau riaga gahiga veite goiare, yauna beta Dirava gabidadamave mimivanu? ⁴ Auka so beta riaga goiare. Eduge Dirava ragu au uhurehe riaga goie, avanage koitava yau uhurehe. Tau torevane nagate, "yauka a eraga ge ai garera riaga vara, renu aka mage mimivara berabe vaniva orogare ei." ⁵ Eduge ni ga avanageva ra Dirava ga riagave auna mi orogisa, nona mati otadobe rorovanu? Nona rorovanu Dirava ra beta riaga vara auka daure mi orogisa ni ada? ( Daka koita ahata maka inaivera daki roma.) ⁶ Auka so beta riaga goiare! Badivara Dirava na orenaki mata o bereberenu? ⁷ Eduge di avanageve uhura Dirava haire na rahogoima, otadobe dainehege yau roia daka daure koitavara. ⁸ Yauka beta rorovanu, no vaivare ga ragohare nagate, renu beya roiare enakime noki roia, " No daure kia, eige magevena orogisa"? Yau daure kiare ra ena vivivera. ⁹ Eige bina orena vivivenu? Novahugena no bebe tarageva? Veitera. Badivara nokamu subuta Jew ya renu Greek ya, yau bougi, roia yaukaki daure derikahu uia. ¹⁰ Onaki me yauki torevenu: "Koita bera beta riagava gera, veitera; ¹¹ koitabera regunaki anana mage veitera; koitabera Dirava yagoya veitera. ¹² Yaukamu yau bougi goiragohanu; badagera yauki iaga be veite gahanu. Koitabera mageve kiki veitera, veitera, kobabe tagera veitera." ¹³ "Yau enokera midava nagate baobaovera. Yau miene yabera avanage roia. Inuhu daureve ramu e yau miege derikahu." ¹⁴ " Yau avage yabera bebe daure gahigeige renu narinavara tobokera." ¹⁵ Yau vase yabera vaina tago bohuboara. ¹⁶ Iaga sebogeige renu huhura yau ogigi gumagehe gera. ¹⁷ Koita o yabera mai gumabe dibana veitera." ¹⁸ "Dirava sigamiga vara veitera you magurivehe." ¹⁹ No negubutu dibana gahane, aenavana otadovana au roma, aena derikahu uiare koitava yabera auki kirogeima, eige koita aubougi geramu eve kouvime, renu mata o inuhati ramu Dirava sigamisa. ²⁰ Ahata maka mevara beta aena meva ruta kobuga goigo vara au vairenehe. Badivara aena uhurahegera daure kiki uhuvaka raki orogima. ²¹ Eduge aena itaharahe gera Dirava ga riaga veraki oroganu, eige aena renu Peroveta koitava yaberaki riaga gahanu. ²² Dirava riaga gahane gabidadama vara Iesu Keriso uhurahegera, or are yabena riaga gaha. Badivara guma nune bera mati veitera, ²³ Koita au bougi geramu daure uhura siri ragohanu renu Dirava haire mimi veite, ²⁴ yakamu au haire uhura siri ragohanu, Iesu Keriso yau dainehe hogeragare renu magurivi goiragane hedokehe. ²⁵ Dirava ramu Iesu Keriso mi huhu uhura maemanu, gabidadama mi oroganu au taoke bohu ragane uhurahe. Keriso ra auki riaga gahanu aena dainehe, urugoi guma daure vagua gahanu ²⁶ au uhu mageve uhura. Au mageve noka eragisa negu nega o uhura, eige auka uhu mage uhura goisa, renu auka uhu mage era, Iesu gabidadama gahare koitava yau. ²⁷ Moteamotea vana oreigenu? Iaga nivana veitenu? Aena ore uhurahegenu? Mevena yabena? Veitera, eduge koita yau aena uhura gabidadamava ragohare e uhurahegera. ²⁸ Eige noka basubasu vagera, koita ra gabidadama vagera, auna mage misa aena meva uhura. ²⁹ Se Dirava na Jew yavahu yau enu? Auna beta Gentile yau Dirava venu? Auka Gentile yau Dirava ve tagera. ³⁰ Ena, riaga vanu, Dirava ra kobabera, aukena peritome riaga gahisa gabidadamava, renu peritome veite gabidadama uhurahe. ³¹ Edainehe nona aenavana veite rosa gabidadamava? Auna so veite riaga goiare! Eduge, noka aena riaga gahigavara.