¹ Di ogo nanuhe ya, di soruke gahara vare renu di imimive Dirava gasinagera yau dainehe gera, yauka maguri misa. ² Yau dainehe gera daki gavima yauka Dirava gahara ragohisa, beta uhuvaka uhura. ³ Badivara, Dirava riagave mimiva koita be morugohare, renu yavahu yau uhuvake riaga gahare, yauka Dirava riagave yagoya veitera. ⁴ Badivara Keriso ra aena riaga gahigavara, koita aubougi au riaga gahare yaue ra. ⁵ Badivara Moses ra riaga vara auki torevanu aena vaseni orogane: " Ata bena aena iaga kima eigena auna maguri visa." ⁶ Eduge gabidadama riaga ra ona kime auki roma: "Anegu ai sorukehe rome, 'Unuhuna vava otitovanu?' (era, auka Keriso mi uguhi orogisa); ⁷ renu anegu rome, 'Unuhuna vata uhurahe otitovanu?'"(era, auka Keriso maguri gahi goiragisa). ⁸ Eduge otadovana au roma? Geramu e ai gaika, so eve uhurahe renu ai soruke uhurahe." Era gabidadama gavara, no roiare ra. ⁹ Badivara a ai avagehe roege Iesu ra Rohi ra, renu ai sorukehe roma auka Dirava raki hogeva seni maguri gahi goiraganu, aka maguri mimivara. ¹⁰ Badivara ai sorukehe gera aki riaga gahima renu era riagavara, renu ai avagehe gera aki imimi vima renu maguriva akamu manu. ¹¹ Eige ga aenavara onaki me auki roma," riaga gahare gahavaia inuhati gera beta variva ragira vara " ¹² eige nune bera veitera Jew mati Greek yau vagahe. badivara Rohi kobuge ra koita inuhati yau Rohi vera, makavara auka yaga inuhati ganaga gahare gahavaia yau. ¹³ E dainehe Dirava ihehe to ragare koitava inuhati gera maguri ragira vara. ¹⁴ Yauna orenaki au ihehe to ragira vanu a yauka koitava riaga gahiga veite? yauna orenaki riaga gahiga vanu a yauka au gare ihihi veite? yauna orenaki ga ihihi vanu, roro koitava veite goiege? ¹⁵ yau besu gevege yauna orenaki ga aena e rorovanu? e dainehe ga aenava ra ona kime auki roma, Hari mage mi ioa gahare koitava vase mageva ¹⁶ Eduge beta koita inuhati geraki Hari mage riaga gahanu. Eige Isaiah raki ronu,"Rohi Bauge unuhuna ni gare riaga gahanu? ¹⁷ e dainehe ge gabidadama orogare ra ihihi va gera, mati ihihi vara Keriso garehe bera. ¹⁸ Eduge daki roma, "Yauka ihihi veitenu?" dodihegera, riagavara. "Yay koure ramu hakive mata inuhati uhura goinu, renu yau gare ramu mata dokonahe tage manu." ¹⁹ Dadagahi, da roma, "Israel na dibana veitenu?" Urugoigera Moses roma, " Daka ya namigevege yaka variva ragohisa renu dibana gahisa mata na orenaki beta matabenu. Mata be uhu anana veite, Daka kiege yaka no gahigavara." ²⁰ Isaiah ra uhu berebe tera auki ronu, "Da besugane koitava yabera da yagoya veitera. Do berabeve veite koitava yau vairenehe gera daki horivanu." ²¹ Eduge Israel yauna gera ona kime auki ronu, " Vani uhubage uhurahe gera daki di ade toivi hakivi ga ihihi veite renu omo berebe koitava yau."