¹ Eige daki roma, Dirava na au koitatuhe besibe gahigevenu? Auna so beta ena vivi goiare. Badivara daka Israelite vara, Abraham vahiebera, Benjamin koitavebera. ² Dirava ra au koitatuhe ya besibe gahigeige veitera, subutegera auki tau dibane goinu. Yana aena gava Elijah badine rone dibana veitenu, au Dirava ga gahane Israel yau dainehe? ³ "Rohi Bauge, yaukamu ai prophet ve gahi gevenu, so teronave sebo gevenu. Davahu gera daki o uma; renu di maguri vera yauki misa roia." ⁴ Eduge Dirava garena otadovanu au roma? "Dakamu ata daha yatirigava kamu gevenu, Baal gare ihihi veite atava yabera ." ⁵ Eduge, orogi negu maguri ragohi renu mage idigane koitava yabera o uia, badivara mage kamuane dainehe gera. ⁶ Eduge auna mage uhurahe genu, era beta me mage dainehe gera. Veite goige mage era beta magera. ⁷ Eige bina? Otadovanu Israel yagovege, au yagovege auka mimi veitera, eduge mage yagovane eraki manu, sokuhege berebe gahanu. ⁸ Era yau torevane nagatera: Dirava ramu uhu dauragirave horuva mohi gevenu, niva yauka beta eragisa, renu ihikova yauka beta ihisa, orogi negu vani oi. ⁹ Eige David raki roma, "Yau irutanavegu ogo mimi iaganiva goisa renu renu yauka so sir ragohisa, yau kouko iaganiva goisa renu uhu anana iaganiva goisa. ¹⁰ Yau nie ramu vadibu uhura goisa, eige yauna ni gahiga veite gahisa, yau dehie ramu keukave usa vani aubougi." ¹¹ Eige daki roma, Yauna deru ragohanu eige yaka dede ragohisa. Se, yau matau veite ogigiva dainehe, Gentile yabemu maguri mage manu, eige yau nami gevege yauka variva ragohisa. ¹² Eduge yau ogigive na mata o iaga mageva dainehe genu, renu yau mimi veite iaganivana Gentile yau enu, Yau hegirivena negu orena vivive goigo vanu? ¹³ Eduge negubutu gera Gentile yabera daki ga gageima, renu dana apostle vanu Gentile yau, Daka hegiri vime daki di apostle meve uhura. ¹⁴ Daka mina di ahata maka koitava beya namigevege yauka variva ragohisa. Eige mina noka be maguri gahi geigevara. ¹⁵ Yau besibe ragoharena mata o maive dainehegenu, yau gahara ragohare na, otadovanu, iaga bera veitera eduge hoge va maguri dainehe gera? ¹⁶ Urugoi idi tahakavana aenavanu, hauhaka raho goiare tagera. Idi umukavana aenavanu, idi adakava ya gainagera. ¹⁷ Eduge idi adakava e yabena yau boko gevenu, eige ana, olive idi adakava benu, yau ruta kobuga goinu, renu ana yau ruta gena a kobuga goinu olive idi umuka mageva mia, ¹⁸ anegu idi adakava mageve rome. Eduge a mageva roege, era beta akaki idi umuka mage gahima, eduge idi umukava raki a mage gahima. ¹⁹ Eige aka onaki rorovara, "Idi umukavara bokoragira vara eige dana yau uhurehe goisa." ²⁰ Era riaga vara, Yauka riaga gahiga veite dainehege yauki no no gevenu, eduge aka ramime aki ai gabidadamave dainehe. Anegu besibe vime ai uhurehe, eduge ama sigoisa. ²¹ Badivara Dirava idi umuka riagava kamu geige veite goine be, auka ya gainage ya kamu gevene. ²² Dirava mageve renu au berebeve eraga: berebe edainehe Jew yabemu dede ragohanu, eduge Dirava mageve ra ai adagera, au mageve a me gahare dainehe gera. Veite goiare, a tagera yauka a bokobovara. ²³ Renu yau gainage, yau dagedage riaga gahiga veite goiege, yauka bouge ge dibanara. ²⁴ Badivara yauna akena yau a bokovanu ura uhura olive idiva seni, renu ura idiva dainehe yaukamu olive idi mageva ruta a bouganu, nega esebu gena, ura idi adakava ya, bouragohanu yavahu yau olive idive uhura. ²⁵ Badivara daka besibe vime daki yaka bouragora veitera, di ogo nanuheya, erara veite maguri o dainehe, eige yaka beta uhu anana mageve misa: Uhu anana isuke tinabe raki Israel ada oroganu ate Gentile yau bougi gera orogisa. ²⁶ Eige Israel ra mageva mimivara, torevane nagate: "Zion uhurahegena Mage mi orogare koitavara ororovara. Akena beta Dirava gahara vare arigisa Jacob seni, ²⁷ Renu era di aenavara yau ruta, eige dana yau daureve arigisa. ²⁸ Hari mage dainehe, yauka inai gahava yabera ai dainehe. Eduge yauna mage yabenu se daure uhurahegena, yauka mage yabera badivara subuta koitava yau dainehe. ²⁹ Badivara iaga mageva ya renu Dirava totovera beta mati kokikovara. ³⁰ Badivara aka subuta Dirava gare ihihi veite, negugera akamu obina mage manu yau ga ihihi veiteve dainehe. ³¹ Guma kobuga ei, negubutu Jew gainage ga ihihi veitera. Badivara yaukamu maka mageva kironu edainehe yau gainage mage misa. ³² Eige Dirava ramu aubougi ga ihihi veiteva uhura gosigevenu, edainehe yauka mage misa. ³³ Oh, Dirava haire renu au uhu anana mageve renu au dibane ra dobuke riaga vara! Unuhuna au koita era gevare renu ana gevare, renu au gumage yagogeisa! ³⁴ " Unuhuna Rohi Bauge uhure dibananu se auna unuhu gare ihisa? ³⁵ Se unuhuna Dirava iaga be moimanu, eige Dirava ra damunava kisa? ³⁶ Badivara au senige renu au uhurehe renu oti au senigera iaga aubougi gera. Au haire ra negu oti behibehi. Amen.