³ Keriso ramu beta avahu au mage gahanu. Eduge, yau torevanu nagate, "Yau a inai gahane isuke vara di adagera." ⁴ Otadovanu yau urugoi torevanu yau torevanu makavara noka kerigahisa renu aena gava uhura hero kisa ihie iaganiva ya orogare yau. ⁵ Eige Dirava kerigoiare renu herovehe yai uhu kobabehe misa Iesu Keriso uhurehe. ⁶ Auna so enakiege uhu anana kobabe va renu ava ga kobabe va Dirava, Iesu Keriso Mame ni Rohi Bauge ve mage gahisa. ⁷ Edainehe bebe mage gahigeisa, Keriso a mage gahane nagate, Dirava mageve uhurahe. ⁸ Eige daki roma Keriso ra peritome riaga gahiga koitavara Dirava riaga gahare uhurahe, subuta rohiva yau ominue mohigevene riaga gahisa, ⁹ renu Gentile yabera Dirava mage gahisa au uhudauve dainehe. Torevane nagate, "Edainehe daka ya mage gahigeige vara Gentile yau uhura renu nogo rosa yai ihe mage gahisa." ¹⁰ Gaitana roma, " Hegiri ragohisa, ya Gentile ya, au koitatuhe ruga." ¹¹ Renu gaitana, " Rohi Bauge mage gahisa, Gentile yai bouge; Koita aubougi geramu mage gahisa." ¹² Gaitage, Isaiah roma, "Jesse umuka ramu o orogima, Gentile yau variada yau biage goigovara; augena Gentile yabera mage misa. ¹³ Dirava mageve vana yai uhure toboga geisa hegiri va renu mai uhura, ya riaga gahare dainehe, eige Horu Aena yai mage mi orogisa. ¹⁴ Da davahu tagera da dibanara yai maguri ve, di ogo nanuheya. Daka dibanara yaka mage raki ya toboga gevenu, uhuvakava ruta. Daka dibanara yaka bebe uhu anana mage gahi geigevara. ¹⁵ Eduge do toretorevera berebera iagabe yau dainehe aka gaitana anaisa, Dirava da mage gahane dainehe. ¹⁶ Magevara daka Keriso Iesu me mimi koitave goisa Gentile yau dainehe, daka harokoita goisa Dirava hari mageve uhura, eige Gentile yau boubou veramu mage goisa, Horu Aena riaga gahare uhura. ¹⁷ Keriso Iesu uhurahegera daka ga raho vivivara Dirava meve dainehe. ¹⁸ Badivara daka beta ga unage be rorovara eduge Keriso da moimane uhuragera Gentile yau ga ihine dainehe. Era gava roiare renu meva kiare uhurahegera, ¹⁹ Hedo eragare renu yau gauragira iaganiva yau uhura, renu Dirava Horu Aena hedoke uhurahe. Eige Jerusalem seni oti Illyricum kahika gahi, eigera dana Keriso hari mageve rosa. ²⁰ Guma eigena dana, da gahara vare hari mage rosa, beta Keriso ihe yau dibana ogobe yau, eige daka beta koita be ihie meva mati kisa. ²¹ Torevanu nagate: "Ogore yabenu au ihi gava ragohira veite yauka orogi eraaravara, renu or are yabena ihihi veite yauka au dibana gahigavara." ²² Edainehe daka isuke dadaga uhurahegera daki heroki yai gasina orogisa. ²³ Eduge negugera, daka ogo veitera mata oi, eduge yai gasina ororovara tau dadaga vara daki anavanu daka yai gasina orogisa. ²⁴ Daka ananavime daki daka ya erageisa da Spain otare, renu yaka da yahegisa da otare, eige dana ya ruta guragu tinabe visa. ²⁵ Eduge dakamu obina Jerusalem otima, Dirava koitatuhe yahe geisa. ²⁶ Badivara Macedonia renu Achaia yau mageve ogogami yau Jerusalem uhura uiare Dirava aena koita yau vaga. ²⁷ Dodihegera, yau mageve ra, yauka ena kisa. Badivara Gentile yabenu yau Horu meve uhura anagevenu, Jew yabera mati mi goiragira vara maguri mage kohuva ruta. ²⁸ Edainehe, Dayau meve ki kosavege renu riaga gahisa yaukamu yau miare iaganiva aubougi manu, daka Spain otiti vara uhurahegena dana ya erageisa. ²⁹ Daka dibanara da negu yai gasina orogare, daka Keriso mage uhubageve rutagera dana orogisa. ³⁰ Eige daki ya hero gahigeima, di ogo nanuheya, ni Rohi Bauge ve Iesu Keriso ihehe, renu Horu Aena mageve uhurahe, yaka da ruta hero kisa noka Dirava imigisa di dainehe. ³¹ Imimi ragohege daka ga ihihi veite koitava Judea uiare yau, di meve Jerusalem dainehe ramu riaga goisa Dirava horu meve koitave yau. ³² Imimi ragohege dama yai gasina orogisa hegiri uhurahe Dirava gaharavare uhurahe, renu daka rogi ya ruta noka bada vagarosa. ³³ Dirava mai mageve yai bouge yai ada. Amen.