¹ Gabidadama avie koitava ama au gahara visa, beta au daureve rosa se anaisa. ² Koita be gabidadama vehe auka demaka aubougi ivara, gabidadama avie koitava bera gege demakava auki ima. ³ Unuhuna demaka aubougi ima au negu demaka aubougi iare koitava daure gahime; demaka aubougi iveite koitava auma demaka aubougi ihare koitava au gare vime. Badivara koita era Dirava ada uhurehe gera. ⁴ Ana unuhuna, a koitabe gare vima a koitae biageramu enu? Au biage vairanehege auna ramira berebe visa se morugohisa. Eduge auka rahora berebe vivivara, badivara Rohi Bauge ena gumava kisa. ⁵ Koita kobabe rahovera vani be variada gera. Bera roma vani aubougi gera geregere vera. Koita kobakoba yau uhurehe anana mage ragohe. ⁶ Unuhuna vani eragare renu anai ma, Rohi Bauge dainehe ge auki ena kima; renu unuhuna tamuta vima, Rohi Bauge dainehe gera auki tamuta vima, Badivara auka Dirava ra auki mage gahima. Unuhuna tamuta veite, auka tamuta veitera Rohi Bauge dainehe; Dirava tagera auki mage gahima. ⁷ Badivara noka beta novahugera noki maguri ragoha, renu koita bera beta avahugera auki hoge ragisa vima. ⁸ Badivara no maguri ragohare, Rohi Bauge dainehe gera noki maguri ragoha, renu no hoge ragohege, Rohi Bauge dainehe gera noki hoge ragoha. Eige nona maguri vanu se hogenu, noka Rohi Bauge iera. ⁹ Edainehege Keriso raki hogeragare renu magurivi goiraganu, eige auki Rohi Baugervara hoge ragohane koitava ya mati dagedage koita ya maguri ragohare yau Rohive. ¹⁰ Eduge a, otadobe dainehegena ai bamode gare vima? Renu a, esemena ai bamode a besibe gahima? Badivara noka ni bouge Dirava vairenehe rahi au gare ihihi vara. ¹¹ Badivara yaukamu torevanu, "Da maguri vare," Rohi Bauge raki roma, "daigena koita komuko daivi, renu mie aubougi gera yau daureve dai rorovara. ¹² Eige, kobakoba gena nona ni daureve Dirava gasina rosa. ¹³ Edainehe, no negu bebe daure gahigeime, eduge onaki anaisa, koitabe negu au bamode gumage you vime se au Mimi gumage kime. ¹⁴ Daka dibanara renu dakamu herokime daki Rohi Bauge Iesu iagabera beta avahu daure ra. Eduge koita bena roma iagabera daurenu, augera era daure ra. ¹⁵ Demaka dainehe ai ogo nane na huhu gahanu, aka mage uhura ogigi veitera. Anegu ai demake dainehe koita be daure gahime Iesun ra koita edainehege auki hoge raganu. ¹⁶ Eige anegu anavare magera ga daureva rome. ¹⁷ Badivara Dirava basileia vera beta demaka renu eia dainehe gera, eduge riaga dainehe gera, mai toto, renu hegiri Horu Aena uhura. ¹⁸ Badivara unuhuna Keriso meve enakima Dirava ra au gahara vivivara renu koita yabara riaga gahiga vara. ¹⁹ Eige, noma mai mi orogare iaganiva ya gahara ragohisa renu koita bougevare iaganiva ya gahara ragohisa. ²⁰ Anegu demaka dainehe Dirava meve sebogima. Iaga aubougi gera magera, eduge ata be negu koita be besibe vare demaka ime, ata enegu moru gohime. ²¹ Eige magera anegu vamu ime, se eia daure noguima, we iagabe kiege ai bamode moru gohime. ²² Ai gabidadamave, era arenu Dirava yai uhurehe gera. Koita bera mage mimivara au avahu au avahu riaga gahare iaganiva yau. ²³ Unhuna dauragima auka huhu nagina vara au tamuta veige, badivara era beta gabidadamava gera. Renu otadovana beta gabidadamava orogima era daure ra.