¹ Mulinai Iesu ewalao Bethlehem ai Judea ai Herod wa veleapua wa laganinai emauliwai, ia eripa au wariwari vairi East na gekwarao Jerusalem ai negeiwao, ² "Ariai ia riai pewala Jews geria Vele? Thai na paga ia gena viu East avana na pe thai paga veamai iga vanamara e airupuali venia ia. ³ Pe Herod wa Judea geria vele eamonagio erorirori, ia wa eparuo, pe wa uma makaina Jerusalem ai wa ia elenai. ⁴ . Herod na eve vaikoukouri rupu veleri (chief priests) e rova auri uma raoai, pe ia na erenagi rao ila, "Ariai e Keriso pewala?" ⁵ . Ila na gevaila rao ia, "Bethlehem ai Judea raonai, pe eia wa ragau ge aloa wa prophet aurana, ⁶ . Namu goi, Bethlehem, Judea alimapa- ranai, ila mavairi thaorai, manoai vevai auri Judea ai, pe nana nara mui na pene veamai vele apua riai thau geku Israel aunilimalimaria pene iamari." ⁷ . Pe Herod na poroporo ai egogorao geripao auri erenagiria ari ora auna auna veaina na viu emagaio. ⁸ . Ia na eunagi rao Bethlehem ai, neiwao, "Igo rao igo ve- avu namanama na melo valivuna. Wanai muina pigo verawalia, pigo mivaripaku na rori pe wa rauna maina veaina pana veami pe pana miairupuali venia." ⁹ . Mulinai ilana King ge amonagi ao, ila mararapara apua na gerao, pe wa viu geia east ai eroa kuneo ila vilarai pene rao eviu ememia nako e melo valivuna unai. ¹⁰ Wa orai ila na viu geiao, ila verelena egapirao pe geverele kamuvagio. ¹¹ . Ila geroa waioao numaraonai pe ila na geirao emelo valivuna e Mary ia inana. Ila geala alio raonai ge airupuali veniao. Ila geria rina uvuri geala parao geveniao gold , frankincense, e myrrh. ¹² Palau Velegaua na eva nekarao nivi raonai ila pi- ge-ene lavu ulewai Herod elenai, pe ila ge- lavu ule geria alu country nai ma rarapara apuana. ¹³ Ila geroao mulinai, Velegaua gena aneru apua Joseph gena nivi raonai eva ilarao, "Ono lai, emelo valivuna mainana, ono uleagiri igo thao Egypt ai. Wanai pigo alu penerao rau na pana varipa mui, repa- na Herod na emelo valivuna ene avua ene vagi waregara." ¹⁴ Pe wapoginai Joseph elaio etoua emelo valivuna mainana evairi geroao Egypt ai. ¹⁵ Ila wanai gealuwai penerao Herod ewarega. Eia eguguluo wa ragau Velegaua na eilagia peroveta auna raona na, "Egypt raonai rau na pagogoa rau nauku." ¹⁶ Pe Herod, wanai ia na eiarao wara ia geva viviao eraoneka aurana, pe ia eparu gauavagio. Ia gena veali auri eurao wara Bethlehem ai e wakapu maparana raonai melo kimukimuri riairi geria rigolo lualua e verivona gevagi waregari, wa orai ia eve ripaole ragau eraoneka aurana gealarao. ¹⁷ Pe eolema wara ewalao erori maina eilagiao prophet Jeremiah raona na, ¹⁸ "Karo apuna ge amonagiao Ramah raonai, ge mainivilowai e geagi gogo wai, Rachel mae agiwai repana nauna mae waregao, pe ia ne ririwao raona pige ala pikapikara, repana ila apua mai manoai au." ¹⁹ Herod ewaregaole, raonai, Joseph wara Egypt ai pe enivio raonai aneru na eva ilarao, ²⁰ "Ono lai emelo mainana ono vairi igo roa Israel ai, repana riai na namelo navuana eovoani auna pewarega." ²¹ Pe Joseph elaio, emelo mainana evai- rao gerao Israel alimaparanai. ²² Namu wanai ia eamonagio Archelaus wara ia amana Herod kapuna mae gapiao Judah alimaparanai, Joseph wara maekalio wanai penethao. Namu Palau Velegaua na Joseph thori gauagauana vagi eveniao nivi thaonai, pe ia na evairao Galilee thaonai ²³ pe wanai gethao gealuwai wavanuai (city) tharana wara Nazareth. Pe emi auna aunao ragau prophets thaorana geilagiao, ia pige gogoa Nazarene auna apua.