¹ Ige Bailate IESU vai visukaeavalu. ² Isege tuvaliavale ata kea kote bekate kaeai avolu saneka aeviva isi vai IESU kinele ketevelu sanela late kineve daiulu. Isi ogona 'bebolo' tao voseleale ke vai avoele katulu. ³ Isi loi avoele daiai loui avoe halo Diuia ata kitae isi golemavele kavai evasiavai, vai toelatilu. ⁴ Ige Bailateu velevai vatavae loi lavigei avoe ivave da vai laeo lolu, da avoele toelabe iva solilu. ⁵ Ige IESU velevai lolu saneka bekateu kinevele usege ata lolu, ogona tao voseleale keta. Bailateu lavigei avoe ivave malahale kela kou. ⁶ Kateige Dubu kosivea isi Dubu ata bukate kea IESU ivai loui avoe vai idiu dole kavave, vai idiu dole kavave. Genuhamai toai ke louva, Bailateu abolai loui avoe la biagea vai tai idiu dole kavave, Bailateu loui avoe da toelabe avoele iva solilu. ⁷ Diuia lavia avoe loea loi 'basu lou' ualela eu amigalu loui avoe, dau DILAVAu voo dalau. ⁸ Ige Bailateu nona ke tava evisi vabu kitaealu. ⁹ Tota kuialai tai gamania uvale oo kitae ke vae tai IESU belai avoe aa oleve keveo lolu, ige IESU nonabe avolu loue solilu. ¹⁰ Ige Bailateu laviai avoe au vadeuluga daa lavie solilu au aa dibalu dau daele vuvune siau kitaeu ualelu loui dale di siau kele aa vaveai, o aa kavai diu dole? ¹¹ Ige IESU laviai avoe au ai siau beu daele ue solilu isito abo vadeu amuale keu euegau lolu, katealelu, ata vadei da vai amuale keu toelave kitae ulu. ¹² IESU koto kateale loui lavigelu, Bailateu olai IESU kalevai isito Diuia genuhamai toai avoe aa ke kalevage loige au Sisa kakolo olie solilu. Olea abobiga agisi kini toale kea Sisa labo ke vai toelativa. ¹³ Ige Bailateu ke evisi IESU vai kaie kotoivale keveo lolu isi tai ugulumalu, vatava keu abo vule tediale vatava Diuia kotole abo ivihai avoe Gabata. ¹⁴ Vali ni keu Bulau eselega abo ke ava, abo Basiova lovi ilivelu valiu minale tuelo koloki '12' uvue Bailateu IESU vai loevelu. Isi Diu lavigei avoe ivave lai Kini la kou. ¹⁵ Igeto ea toai avoe vaiteve, vaiteve, vai idile kavave, Bailateu lavigei avoe au dale lai Kini kavai? Dubu Bulisitia ke evisi loui avoe loi Kii igalila Sisa. ¹⁶ Kateige Bailateu IESU lekoveai vai vavege ea vai tai Sataulo loeavalu ige ea IESU vai tievelu. ¹⁷ IESU nohomau au Sataulo kabaisi vai tilu, tialeu kineu lolo vatavala velevalu. Hibuluia abo kotole loui avoe Gologota. ¹⁸ Kele IESU vai kavalu isi ata abutita tavai kavalu, voleu adave vaiteo isige voleu ada ageveo isge IESU minale. ¹⁹ Ige Bailateu kisai vole alu isi loui avoe IESU Nasaleta biage Diuia Kini. ²⁰ Kateige Diuia ata moeagaea ke dodavei tai loiva, abo IESU kavale keu Dielusalema vavalega abo kavalelu louive ata moeagae tai loi nona abo kisaiale dodavei loiva. Kisaike Hibuluia nonale, Latini nonale isi Gulikia kotole kisaialu. ²¹ Ige Diuia Dubu naliavale kosive kea loi Bailate laviai avoe Diuia Kini lou kaleva, ee biagela loui avoe dau Diuia Kini dalau. ²² Ige Bailateu loui avoe da vadeu toelage da toleila kealu. ²³ Ige tuvaliavale ata kea IESU kavai ogonave vai davuage abutita abuti olilu, voa '4' ige ata igaligaliai ke agilu. ²⁴ Isege dabave ogona vai loui avoe lai davuage toelalu isito vai kasiai ige oleuvage abo ave kateale keu Bukau louale ke vai leleve tilu. Bukau uvue loui avoe abole di ogona davuai vole vavei di dabau ogonalu kasiai, ige vuini ata keule vai. ²⁵ Isege Sataulou vavale lavisi uale keu IESU aiata kakoluvuiabe Meli Kolobasi ivu, isi Meli Magidalini. ²⁶ Ige IESU au aia ivai Disaibolo volea avolu olavale ke ta ivage ea leleisi uva, ige eu loui avoe aia ai voo iva. ²⁷ Isi au Disaibolo ke laviai avoe, ai aia iva ige taemi ke uvule vo keu keate ke au aialu meialemei vai au oe tilu. ²⁸ Hau kenenia loi vesulu, ige Bukau louale kenenia loi leleve olilu. Isege IESU loui avoe, daa enialu. ²⁹ Kateige abo uaini ee vai disile kosai vaeavale kele hau vole savate matelesi late ke vai uaini tuvuale ketevei idita bisi letatavai aivele vaeavalu. ³⁰ Ige IESU uaini eke ige tuvuage loui avoe, loi vesula ko alu isi voeleige tuveu dakohovolu. ³¹ Ige Diuia Sabatilu lediavale valiniu loi vuguvuguage ata kaveale kea ba Sataulole ulivelu bele bulale. Sabati bula keu valini tuvu kitaela keu Bailate laviagau genaeabe kavei bokoai agigei tai. ³² Ige tuvaliavale ataea loi genaeabe kavei bokoalu. ³³ Isi loi ivage IESU voeleage vesulu ige abo genave boko solilu. ³⁴ Kateisege tuvali ata voleu IESU ada valave kele bita bige tai lutive baitale bisi daiage taou loivaga eta laluvai lolu. ³⁵ Ataea ivale kea ke louge keu leleve Bukau uvue louale kela ke lolu ige ataea vai lelevetisi, ige lata vai lelevetive. ³⁶ Kateale keu Bukau louale kelau vai leleveti itavabeu ba bokoalivelu bele. ³⁷ Isi tota Buka voleu loui avoe abo biale keale ba ivai au loivale kela. ³⁸ Hau kenenia loi vesuge Dioseba Alimatia biageu avota IESU Disaibolo vole isito Diuia nilu sekiai uvale keu tai Bailate laviage Bailateu hanavage tai Sataulo tavale IESU vaveai vai tilu abavulivelu. ³⁹ Nikodemasi ta lolu, keu memila vavile avoe loale keu senisi hagote 'maila' ta aloesi hagote ke isuveu uani hadeleti '100' litasi keta idiu vana hagote keta agisi lolu. ⁴⁰ Isi IESU vai ogona taete kele vaeavai hagote kenenita avole otovei eta buliai vai vaeavalu, keu Diuia kasitomula keu voele abavulivelu abole ke agei. ⁴¹ Abo IESU kavale vuguta ke vavale vu voleu ulu vu keu uvue guli vole dogave ao lovoale keu ulu, abo atabe vai ele abavue soliale keu ulu. ⁴² Abo loui avoe ave vali kou Bulau eselai kou, livu Diuia valini kitae kelu loui guliu vuguta lovoge uale kelu loui vai vuguta kole abavuve ke loui IESU vai kele abavuevelu.