¹ IESU au nona ke louge vesusege au ni letatavai Otogoe niai loui avoe, mama valive niu ave lolu ai voo hoeaseava ige ai voo ule a hoeaseavai. ² A ai vuvune damui da letatavage ata ko nenia di adau valale ulu iale a ata damuale keneni dale ukolikoli mauli ke vavei. ³ Ukolikoli mauli keu kosealu ata ko nenia ivage a igaliu DILAVA leleve isi ea huhuige ala da hanavage da lolu isi abo uvu vai daele vaevage dale ukolikoli mauli vavei. ⁴ Da vata koveo ai ivi letatavalu a hau damuale ke da hauai vesuiavalu. ⁵ Memila vatau ue solisege da ati uge a di ivi letatavalu iale di mama ale tota vuvune damu isi di ivi letatava. ⁶ Da ai ivi loui letatavai ata haivelu a ata damugeale ke vata koveo kea aelela kea, a ke damulu ige ea ai ivi evievelu isi ai nona vaevelu. ⁷ Ave ea dibage hau keneni aeogau loige a damuva. ⁸ Da ai nona keneni a da laviale keneni da loui haiveva ige ea ai nona keneni evisi vai lelevetilu ige leleve dau aelega lolu. ⁹ Da abolai guliguliava da vatalu guligulie solilu isito a damuale kelaiga da guliguliava, kea aelela kea. ¹⁰ Da ata agigeale kea bahata aeleala ige aele kenenia daeleala ige lai ata agigeale kea di ivi letatavalu. ¹¹ Iale dale vata kalei aeo loi isege ata koeale vata kole ui di mama au ata tuvute ige ai ivi keu vuvunete kelu ai vuvunela bavuge ige ea aelete olisi latiloea igali oliale kelate ea lailoili igali olisi ui. ¹² Da aboili uvale kela dale nimabigei aboili ui ai ivile a damuale keneni ivaga vole igali Diudasi ke igaliu da kalei voele kuvae tiva, ilogo bukau louale ke vai lelevetilu. ¹³ Isito dale ae loi isege koeale vata koveo ui kelu da olale di sisila keneniu uvuia bele dobai uge abo voleteali sisilai ui tigei. ¹⁴ Da ai nona loui haivegelu ige vatau abolai tuvualu kosealelu ea ba vata ko atatebele daa late dau vata ko ata olie soliale late. ¹⁵ Da alavia solilu agigei ogeta otove vata kole, isito au nalige dua aso atau toela uvule. ¹⁶ Kea vata kou ata bele da late dau vata kou ata olie solilu. ¹⁷ Iale ai kotou tuvu kele ke hoeaseave ige abo atau tuvu olisi. ¹⁸ A da vai vata koveo hanavage da loale kelate da hanavege ea tilu vata koveo. ¹⁹ Da damiga vai amulu iale kea abota abobiga agisi amuge hoeaseave ige ata tuvute olisi. ²⁰ IESU loui avoe ata ko ula oliesolilu isito ata koea tai di nona ko loui ata haivege kea ke evisi abo uvu vai daele vaeavai keluga da guliguliai aa laviava. ²¹ Ige ata ke nenia ata igali olisi di mama au daele uge dau aele uge lati ata igali oliale kelate ata kea igalitoai lailoili ui. Ige vatau dibage ala da hanavalu. ²² A da letatavale ke letatavagelu ige abo voleali uvu igaliai lati uvu igaliale kelate. ²³ Da aboili ulu ige au dati ulu ige keu lailo keneni agisi loi igali toai ulu. Ige vatau dibage ala da hanavalu isi ai ola kitae vavelu, a dalu olale kelate. ²⁴ Mama atako a damuale da olale keale daluvita ui da oleveo uale keveo isi valivelu abo di dua keneni ivai a damuale ke vatako a solivalela a dalu olai hau ko neni damulu isi di ivi letatavalu. ²⁵ Di mama a keu ata melite duave kenenia aele ulu igeto vata kou a dibasolilu isege dau a dibalu ige koea dibage ala da havalu. ²⁶ Da ai ivi haivelu iale dale tota haive louai ige ai ola keneniu aboili ui. Ai ola keu daele uale ke aboili uge dale data aboili ui uvuiabetale tai ui.