¹ Da koto ke loui la lavigelu lai evievi kele melia uvu momai kalevalive. 2 Abole dubule la lovegei isito valive niu loiva ata ke neniale la kavei loui koseai lo hau duala ko DILAVAlu ava isi la kaveatisi be kalevalivelu bele. ³ Ataeale kelate ai abo ba di mamata data dibale bele. ⁴ Isito nona volela ko da la lavigelu ko evisi huhuave ata kea valiabe niu loige abole ba loi. Kelu da memila loui la haive solilu, da laili ualelu louive. ⁵ Isito dale tai ata keu da hanavale oe isege la volea da belae solilu, aa oleve otiva? ⁶ Isi dale ko loui la lavigei tige, uvu kitaeule lai lutiu bai bavui lale uvuave dalu. ⁷ Isito leleve ula da la lavigei lai dualu da tie solige munana tuvu ba lolive bele lalai, isito da tige dale lalai hanavege abole loi. ⁸ Keule loluaga aule vatau toela vai la haivei, kalau dua isi toelave agisi nonale otoveve ke neni la haivei. ⁹ Ataea kalau toelau loi kitaeage abo uvuvai daele vaeava solilu. ¹⁰ Isito kalau dualu loui daule di mama vileo tai ige la ba tota da ivalivelu bele. ¹¹ Isi kotalivelu DILAVAule setene vai kotai siauve ke neni vesuiavai. ¹² IESU loui avoe daele nona moeagaea ulu isito dale louge la ba ke huhualivelu bele ave. ¹³ Isito munana tuvu leleve keu loige keule ba nona leleve ke loui la haivei la lohomegei koto leleve ke ulale tai au ba au huhu loui la haivelivelu bele isito au, eviale keneni loui la lavigei. ¹⁴ Aule loui da letatavai hau keu daelela daelegau ke vai loui la lavigeva. ¹⁵ IESU loui avoe di mamau hau keneni damualela iale munana tuvule daele ke vai loui la lavigei. ¹⁶ IESU tota lavigei avoe lale aike vali ni kou uvue ba da ivalivelu bele isito lale ba tota da ivave. ¹⁷ Ige disaibolove volea loui avoe vadeu nonala kateale keu isi dale di mama vileo tai? ¹⁸ Kateige ea loui avoe vadeulau keu ke louva? ¹⁹ IESU ivage ea nona kele malomaloai tige lavigei avoe au la di nona kele malomaloalu? Da loui koseige vali ko nile lale da ivave isi tota la ba da ivalivelu be, isi tota lale ba da ivave. ²⁰ Leleve ula da la lavigei lale ba uvuai alio kavave isege vataule sisilai lale ba uvu kitae ave isito lai uvu keule kuialai sisila kitaeai. ²¹ IESU lavigei avoe da louale keu koesalu keate voleu au ese vaealivelu age vavave keule tuvu kitae ai isito eseu uge keate keule sisila kitae ai eseu vata kole ulu. ²² Kateale late laeale ave uvu kitaeave isito dale ba la ivegei, laleba sisila kitae ave atabeu ba la sisila ke valivelu bele. ²³ Vali ke nila lale ba da lavialivelu bele, hau volelai leleve ula lale hau volelu di mama laviage di ivile aule lamei. ²⁴ Vali ni kela lavisi loaleu ave laea valebelu di ivile lavie solilu. Kelu di ivile lavia, ige aule amui ige ale sisila kitaele ke agisi te. ²⁵ Da nona ko donale la lavige solilu isito nonau bai ulale da la lavigelu, nona leleve ula di mama DILAVAu nona. ²⁶ Vali ke nila laeale di ivile da laviave ige dale di mama laviai lalai. ²⁷ Di mamau lalai ola kitaealu la dalu olage eu ke ivaive. Isi laea da vai lelevetige dau DILAVA vileoga lolu. ²⁸ IESU loui avoe dau di mama vileoga lolu, isi vata koveo ulu iale dale tota vata ko kalei kuialai di mama vileo tai. ²⁹ Ige Disaibolovea laviai avoe a nona lelevelega ko nonalu, aa dona solilu. ³⁰ Lo ave luleleige au hau ko neni dibalu isi ai olaiebeu ue solilu, atabeu a belalivelu, katealelu lo aa vai lelevetige au DILAVA vileoga lolu. ³¹ Ige IESU lavigei avoe au ave la daa vai lelevetilu?. ³² Iva ave valive niu lolu au loige la ko neniale iluvisi lai oe tiatisi, daa kalevaive isito di mamaule daiti ui. ³³ Daa ke laa lavigelu, daele lale uveve dua ave. Isito vata kole toela moeagau ulu isito goadave, da toela kele goadale late lata goadave da vatau toelale vuiniale late la vuiniave.