¹ IESU loui avoe dau uaini leleve dala kou isege di mama keu vuu biagela keu. ² Uaini doievea daele dale kea baie solige dale ke koisi letulisi vai kavatui isito dove volea baiale ke kalege ui bai moeaga ai. ³ Laa da louale ke evievelu ige nenive. ⁴ Daluvita uve ige data laili ui doievebeu ba auvu ui baialivelu bele isito uaini legau dai loi baiaiva. Ale dati uluaga ale baiai. ⁵ IESU loui avoe dau uaini dalau isege laea dovea, hasivea, la daluvita uluaga lale baiave isito lale lauvu uluaga la ba baialivelu bele. ⁶ Atabe igaliu dati ue soliluaga abole vai kavatui idiu hasilate venelu ui giliai ige ataea venelu agisi tai vaui. ⁷ Ale dati uluaga di koto ko neniale aele uge a vadeulu olale keneni abole alu ai. ⁸ Di mamaule ivi kitae vai kosealelu au ai bai moeagaea uge aule di disaibolo olisi haua. ⁹ Di mamau dalu ola kitae ai, au uvu keneni vai daele vaeavalu kelate data di ola kitae laele vaeavalu isi di uvu bahata ke lamelu 'lalokau' kelu laeale di lalokau kele uve. ¹⁰ Laa di basu ko naliu dua aluaga lale di sisila kitaele uve 'lalokau' da late dau di mamau basu nalialele sisilave kitaeu daele ulu. ¹¹ Daa hau ke loui la lavigei ige di sisilau laele kitae ai ui, ige lata sisila ulale uve. ¹² Di 'lo' la kou laea volelai olave da lalai olale kelate lata volelai olave. ¹³ Atabe igaliu loi au kakoluvulai ola kitaea ai au mauli vai abolai vaevai voele solilu isito dau la huhugei loi lalai voelealu. ¹⁴ Laea di kakoluvuia da vadu loui la lavigeale ke ave. ¹⁵ Da ba lalai loui kosealivelu bele laea di hau avale ataea, hauivale kea dibae solilu vadeu kosiabe keu avale. Isio laea di kakoluvuia dale di mama vileo nonave evivale keneni dale laa haivei. ¹⁶ Laea daa makae solilu isito dala la makagelu isi la letatavagelu laea tai bai moeaga otoveve ige lai bai keu ui. Katealelu lale vadeulu louale ke di ivile mamaule lamei. ¹⁷ Kela ke da la lavigelu volelai olai isivi vole vaveve. ¹⁸ Ivalivelu vatau alu tuvuige keu memila dalu tuvualela keu, aule atalu tuvuai. ¹⁹ Au vatau ata olige vataule alu olai, kosealelu au evile. Isito au vata vile olie solilu dala a vage au daelete olige vatau alu tuvualu. ²⁰ Nonau tava daa la lavigeale ke huhuave hauiale atau ba tai au biage ke leivialivelu bele abo daa vai toelatige abole la agigei toelatigei, abo di nona evige abole lai nona evievei. ²¹ Isito abole ba laele hau ko neni ai di ivile abo lulele solilu oleu da hanavalu. ²² Daa loi lavige solige kea kalau toelau ue solilu isito abo ba ekisi kiusialivelu bele abo kalau toela kele. ²³ Ata vadeu dalu tuvualuaga di mamatalugau ke tuvualu. ²⁴ IESU loui avoe au da hau alu louale ke a solige atabeu alivelu bele ataea nile, aboba toelalivelu bele isito ea ave ivalu isi data di mama vai toelatievelu. ²⁵ Isito keu memila nona loui kisaiale abo basu Bukau uvue abo dalu tuvuaevelu, da mamau hau moeaga age. ²⁶ IESU kateai louito tota lavigei avoe dale munana tuvu lalai hanavai ige aule di nona keneni la haivei, da letatavage ataea da ivai dau ole dalau. ²⁷ Ige ketale laeale da loui letatavai ata haivei laea da loui di haukala ko age laea daluvita ui, da avale keneni ivai loiva kelu loui ata haiveve kosea ata kela ke IESUlake.