¹ Ai lutiu bai kele momai vabualive isito DILAVA vai lelevetisi data vai lelevetiso. ² Di mamau ou uvue uvuve keu moeaga moeagaea ulu, isito au katesolige da la lavigelu dale tai lalai ovole koui otovei. ³ Au da tiluaga dale tai lalai uveve ou uvu ke hoeaseavei to ba kuialai loi la agigei talivelu da uale keveo lai ba ui. ⁴ Daa tiale vatava ke la dibasolilu isi kuvave keta la iva solilu. ⁵ Ige Tomasiu IESU laviai avoe kosive lo dibasolilu aa oleveo otivale ke lole oleveo kateai ke dibai? ⁶ Kateige IESU laviai avoe dau kuva dalau isi leleve ula dalau isi ukolikolia uale dalau atabeu ba loi di mama vileo talivelu bele isito daeo loi ba avoe te. ⁷ La ba dibaluaga di mamataga la ke dibalu, kole lavisi tiale keu la mama ivage vesulu. ⁸ Ige Bilibiu IESU lavia avoe kosive ai mama lo haivege keu loele neniai. ⁹ Ige IESU laviai avoe da ati uale vali nii moeagau vesulu ige aa oleve kateai da iva solilu Bilibi? ata vadeu da ivale keu di mamalau ke ivalu. Isege aa oleve kateila ai loui avoe ai mama lo haive. ¹⁰ Au aa vai lelevetie solilu dau di mamati uale keu igalila keu eu dati ulu isege dau eti ulu. Ige ata abuti keu igalila keu nonau tava da louale keu nonavela keu mamau daele ulau ai au haukala ke alu. ¹¹ Daa vai lelevetive dau di mamati ualela ige eu dati ulu, isi au vadeu ale ke ivai vai lelevetive. ¹² Leleve ula da loui la lavigelu ata vadeu da vai lelevetiale keule da vadeu ale ke aule ai isi aule hau kitae agei, kosealelu daule kuialai di mama vileo tisege. ¹³ Laa vadeulu olaluaga dii ivile da laviave ige dale lamei ige di mamau iviveule kitaeai. ¹⁴ IESU loui avoe la haubelu di ivile da laviage dale vai lamei. ¹⁵ Laa dalu olaluaga di basu ke naliave. ¹⁶ Ige dale mama daluiavage aule laa hoeaseavale munana tuvu lamege aule vali bahata laili ui, koto la haivei vai lai uvue vaeavai vali baita laili ugei. ¹⁷ Ukolikoli munana tuvu vatau ataea ba ke valivelu bele isito laeale ke vai kosealelu la ke dibai avoluvita ulu ige eu lai uvue ulu. ¹⁸ Daa ba la kalevege laea golivu olisi ulivelu bele isito dale ba lalai loi. ¹⁹ Aule aike vali kou uvue vatau ataea ba da ivalivelu bele isegeto laeale da ivave da ualelu latale uve. ²⁰ Vali ke nila lale dibage dau di mamati ulu isege laea daele ulu ige dau laele ulu. ²¹ Ata vadeu di basu vai nikovai uale keu dalu olalu, lauai keu vai ulu iale keu di mamataluagau ke olalu ige dale damiga vai haivui. ²² IESUlu haiale Diudasi ke olie solilu isito Diudasi vole ke IESU laviai avoe kosive aa vadeuluga amiga vai lo haivei vatau ata kota haive solilu? ²³ Ige IESU laviai avoe ata beu dalu isiviale keule di koto evisi ige di mamaule avolu isiviage lole avoe loevei isi loi oo vaeavai avoluvita uevei. ²⁴ Ata vadeu da homasiavai di koto evie solige koto keu di mama kotola keu evie solilu kela da hanavage da lolu. ²⁵ Daa laili la ai koto ko la haiveva. ²⁶ Katealelu duluavale munana tuvu ke di mamaule di ivile hanavege loi la aivei hau ko neni bahata da laa lavigeale keneni. ²⁷ Daa uveve dua lalai kalevalu da di uveve dua lalai kalevalu da vatau ave kateale lalai kaleva solilu kelu vabuaevevale. ²⁸ La evige dale laa kalevei tai isito dale ba kuialai loi la dalu isiviale kelu sisilave daleba loi da di mama vileoga tiva, di mama ke kosi kitae. ²⁹ Daa memila la haivegeto keu loi keu loige lale vai lelevetive. ³⁰ Da ba laili nona moeagalivelu bele vata ko kitaeu loige au ba dalu haube vai loale bele. ³¹ Isito vatau ata ko nenia luleleige dau di mama kelu isivialu isi di mamala louge da hauve ava. Katelaleu kobekavage lai tai, IESUla keu au memelo lavigeva.