¹ IESU voelele kobelale kele la uveve dogave agilu iale kele melitavai Otogoe tiveve ke huhuave. Otogo keveo KELISOu au mamau ada vaieo ugulumai ulu. ² Iale labea momai vatau vale vile huhu moeagagelive isito lai uvu hoeaseave Otogoe uveve ke huhuageve. ³ Kosealelu laea vovoale kelate alu ige la uveve dogave agiveve keu ave IESU KELISOta mamavetale ulu. ⁴ IESU KELISO ke vilele lai uveve leleve keu ulu iale vali voleo aule loige lailole avoluvita tai atagavele ugei. ⁵ Katealelu labea vatau isivi o ula huhuagelive. Vatau aveve ke bahata kalevave labea momai ai kakolou keateti navalive isi momai tebalive. Isi labea aveve toela ke alivelu huhuagelive isi moni huhu moeagalive isi vatau hau moeagata huhu kale. ⁶ Olea DILAVAu koto evie solisi aveve kateale age DILAVAule abolai tuvuai. ⁷ La kea memila vatau ataeali aveve kateale ava. ⁸ Isito aike aveve kateale kalevai tota a kalevave volelai tuvualive vole dikaiavelive isi kosiveu ivi vai toelatilive isi volelai kotou toela loui vole kavelive. ⁹ Isi labea momai vole seleavelive kosealelu aveve keu memila avevete keu vesualela keu. ¹⁰ Ke kalevai aveve dogave valu DILAVAu au uveve dogave lamei la agigei duatige lale aveveve kele luleleave isi dibave. ¹¹ La aveveve doga vale kele ata bahata kea vole late Diu ata isi Diu ata olie soliale vudiu vate boiale, boie soliale botou ata, isoho lulelete lovi kavale ata isoho monilu hauale ata kea bahata IESU vileo igali ige KELISOu bahata ata kele ulu. ¹² Ige DILAVAu lalai olai la makage la atave olilu katealelu la aveve koseale age duave. Lale volelai uvuage duave vole dulugei isi lamiga letolevai volelai solekai adu kalevai to saiale volelai lougeve. ¹³ Isoho ata volea la agigei toelatige momai ke huhuai ibilave alive. Isito ke momaeavai vole hoeaseaveve. Kosiveu lailoi toela uliale kelate volea toela huhu kalevaito vole hoeaseavave. ¹⁴ Isito aveve kateale uvule aveve kou kitae volelai olai vole dulugeve, voleali sisilai volelai uvuai uve. ¹⁵ IESU KELISOu uveve dua vai lameale ke huhuai uveve dua voleali ai uve kosealelu laea ata igaliala keluga DILAVAu la toiavei olale la voleali udua ai DILAVA hoeaseavave. ¹⁶ Lale vali bahata kateai IESU koto evisi lovaluaga lale kotovele lulele kitaeave iale lulele kele vole haivei vole hoeaseavave. Isi Deividiu Samusi Bukau uvule ane loui kisaiale ane ke voleta lougei DILAVA hoeaseavave isi sisilave ave. ¹⁷ Da olalela la vali bahata vadeu loui avale ke baatale lailoi kosive IESU ke ivivele loui aevigeve isi ivivele lailoi mama DILAVA ke sisilave ai hoeaseavave. ¹⁸ Keatea lai velavuia koto evisi olaeabe ke ageve, la kosiveu ata olialelu kosiveu olala la aveve kateale aevigeve vali bahata. ¹⁹ Ige malahaea lai keatelai olai ke hoeaseaveve labea momai ke dikaiavei kavelive keu vali bahata ai maulila keu, keu ula age a ulu. ²⁰ Ige esu esea vali bahata lai mamata lai aiata koto evive, lale kateige kosiveule ke ivai lalai sisilai kosea eseu dua. ²¹ Ige mamuvui lai eselai vali bahata koto isute loulive lale kateige abole homasiai lai koto evilivelu bele. ²² Ige hau kavale ataea vatau kosive olea la agige la aboele haualuaga kea koto bahata evigeve, momai loui kosealive abo lo maligei usege lo niabele hauagei abo lo ivei, huhui ke kalevaito hau dua abolai ave. Abo la ivesege, o iva solisege hau dua ave. Laea kosive lova vale ata lalaea. ²³ La hau vadeu avale kele lai uvu bahatale ave. Kosealelu la ataea nile hau ke a soliva isito kosiveu nitalega la haukala ke ava. ²⁴ Iale ke huhuave kosiveule ba la hauivale ke ibila lamei. ²⁵ Isege olea aveve toela avqale kea ibilaeabe kosivele ba vavei. Vali kela kosiveule ata bahata kea aveve kaogei ibilaeabe vavei, be igali kalelivelu bele.