¹ Ige ata lavigevale kosivea aveve bahatale lai memelo nalige dua aevigeve. Kosealelu la dibage la kea Otogoe uvale kosive keu mohohoea. ² La bahata guligulile homasi kalevaito meliai vali bahata DILAVAu sisila ai hoeaseavave. ³ La guligulialuaga lotalai DILAVA daluiavave ige DILAVAu lolai kuva alavage lo IESU KELISOu kotou dua loui ata haivei, da lovi ke alelu ave dibulae uva. ⁴ Lale dalu DILAVA laviage dale neniai kotove ke loui ata haivege abo eviudua ai. ⁵ Da koto vole louge evive Ekalesia olie soliale kea nile aveve dua ula ageve ige DILAVAu lalai kuva alavage kotove dua ke loui haivegeve. ⁶ Daa olale la keali uge lai kotou aboele madoea lateai, lai kotou kateige laeale kotoeabe ibila louveve dibave. ⁷ Di uvu kakolo Tikikasi keule ba da avale lalai loui. Da keti kosiveu hau avale kele keu solekata hau kele tiva isi hau dua agei. ⁸ Katealeluga da ke hanavage laeo lolu da olale au lo avale ke lalai loui la haivei ige laa lo avale ke evisi sisilave. ⁹ Daa ke hanavai lai ata vole Onesimasi keta havage au avoti tiva keu loi uvu kakolo leleve hauivale. Isi keu haule melitavale ata iale keale lo koveo ui hauivale lalai loui. ¹⁰ Ige di voo vole lo avoti dibulale uale ivivela Alistakasi keu olai au sisila koto lalai hanavalu, ige Banabasi duvuve Maka keta kateai lalai au sisila nona hanavalu. Da memila Maka ke kotola lalai hanavai kosealu ivalive au loige hoeaseavai vai oe vaeavave. ¹¹ Ige IESU ivi vole DIASITASI keu au sisila koto lalai hanavalu ige di hau ese abutita igalita kea Diuia evievi ataea iale Diu ata ke ulaeala daluvita ataea DILAVA adau vuvunele uveve haukala ke da dulu kitae alu. ¹² Ige lai ata vole Ebavalasi keta lalai au sisila nona hanavalu, keu IESU KELISOu haukala avale ata. Keu vali bahata au uvu vai DILAVA vavui lalai guliguli ava, keu kateai olavale la DILAVAu ola ai aveveve bahata kele melitavai luleleai. ¹³ Daa koto leleve la lavigei, evive ata keu la momaeave solisi Laodisia isi Helabolisi evievi ata keta momaeave solisito la bahatalai DILAVA laviai guliguliava vali bahata. ¹⁴ Ige lailoi doketa vole Lukau Diemisiti abo sisila nona lalai hanavalu. ¹⁵ Daa olale di sisila nona loui Laodisia evievi ata ke lavigei isi keveo ata vole Nivasi isi Ekalesia ovele ui guliguliavale keneni bahatalai di sisila nona loui lavigeve. ¹⁶ La levaleva ko ivai vesuiavaito vai Laodisiae evievi ata kelai hanavave ige abota ivai. Ige abota levaleva vole da abolai hanavale vai lamege lata dodavei evive. ¹⁷ Isi Agibasi laviai kosea Bolo olale kosiveu haukala amuale kenenia ai vesuiava. ¹⁸ Kotou kele kateai ulu isito Bolo dala beni vai koto kohame kisaiai lalai loui kosealu au la duave. Labea da dibulae uale ke momaeavalive, da olale DILAVAu la huhugei la hoeaseavei, Nohovu.