¹ Da koto vole louge evive la dibage da hauve ai la duluge dua alu. Isi Laodisiae evievi ata keta da dulugei ata vole da ive solivale keta da duluge dua alu. ² Da hau kitae avale kele olale la agigei melitievege laea uvu igalile volelai olai vole dulugei. Da kateai olale la DILAVAu kotole luleleai lale kele lulelealuaga DILAVAu koto mahogovale ke dibave au mahogovale kela IESU KELISOu koto. ³ IESU KELISO vileo luleleu ulu DILAVAu au lulele bahata agisi vavulu. ⁴ Da lalai louale keu kosealu ata voleale loluaga la seleavei la sovaeavege momai kotoeabe evilive. ⁵ Kosealelu da laili uale bele la haivei isito da laili uesolige di uvu laili ulu. Laa lai uvu vai IESU KELISO vileo vaeavai melitavai igalitoai hauivale ke da evisi sisilalu lalai. ⁶ La lai uvu vai IESU KELISOle vaeavage eu lai kosive olialelu avoluvita igalitoai uve. ⁷ Idiu idumu vatau uvue tiale kelate la lai evievi vai IESU vileo vaeavale kele melitavave la IESU lovai tiale kelu vali bahata melitavai ui tigeve. Isi lo koto leleve loui la haiveale kele melitavai vali bahata sisilale ui DILAVA hoeaseavave. ⁸ Lamiga neniavave kosealelu ata voleale loi kotou baiu uesoliale ke loui lai uvu ige momai kotoeabe evievelive lalabo ke seleaveva kea IESU KELISOu koto loue solisito abo lulele koto ula loui la haiveva. ⁹ IESU KELISOu vatae loi ata olige DILAVAu au aveve bahata vai avoele vaeavalu. ¹⁰ Ige IESU siau kele Otogoe uvale ke bahata levigelu iale keu vuvunele laea avoluvita igalitoai uveveve late agilu. ¹¹ La IESU luvita igalitoage au lai vava ula hoeaseava solisito lai uvule toela bahatale la hoeaseavelu. ¹² Katealelu abo la Babatisogelu isi la letatavege laea IESU KELISOu voeleai kobelale kele avoluvita igali toalu DILAVAu IESU isage kobelale ke vuvunele, la lai uvu vai avoele vaeavalu isi Babatisoai avoluvita igalitoalu. ¹³ La memila aveve toela avale kele la vovoale kelate alu la DILAVA vileo uveve doga agie solilu vavau ola keu laele loige la olave ke aeviva. Isito IESU KELISOu voeleai kobelale kele DILAVAu lai aveve toela ulialu isi la agigei uveve dogave lamelu. ¹⁴ Isi aveve toelau lai vavale uvale kea isi la basuve evisi ae solivale keneni bahata agisi idiu dole voeleage siauiabe keneniu vesulu. ¹⁵ IESU idiu dole voeleai kobelale kele setene isi atave kea siaule lai ogeta leleilu siauiabe gogoniaive. IESU ataea nile voeleai kobelage ataea dibage seteneu vuvuneu ue solilu, aule voeleai venele. ¹⁶ Ialelu labea ataea basu lovalive ataea abo inele basu ai loui koseai lovi ko ii kale, ee ko ii kale, abo kinele vali ni vole vaeavai koseai loige lai vali ko ni oeaseavai kateige ti kale alau ke seleavalu. ¹⁷ Aveve katealeu leleve olie solilu isito IESU KELISOu avevete keu leleve ula sele solilu. ¹⁸ Isoho ata voleu lae loi la seleavege momai kotove evilive ata keule loui koseai da nai naoai ivalu lai Anelu hoeaseavei. Au kateai louge kotove evi kalevave kosealelu selelau ke ave keu olai kateige la lovai tai. ¹⁹ Keu kateai IESUti igali to solilu, IESU keu Ekalesia kine isege Ekalesia kea IESU vava. IESU keu Ekalesia agigei melitigevale abo avoele goadai DILAVAu avevele melitavai tiva kelu ata melia a kalevai tiva. ²⁰ La IESU luvita igalitoai vovoale kelu vadeuluga la ataea basute kele melitavai tiva. ²¹ Seleivale ataea loui koseige labea ke vatalalive isi labea momai ke ievegelive isi levelive. ²² Basu katealeale bahata vesui, kosealelu basu keu ataea basu ulala ataea basu ke otovei olale ataea ke ivai loui vole haivei lovai tigei. ²³ Seleivale ata keale seleai loui koseai loea atau dua kateai Anelu hoeaseavei abobiga kavei taotievei seleai abobiga letolevegei. Ige ataea huhuai koseai ata koea lulele tea. Isito abo avale kele kea lulele solilu lai dibage aveve kateivale kea ba aveve toela bavulivelu bele abole kele ti ulagei.