1
Vali kateivalela ata kea ekalesia Dielusalemae uvale ke bahata kavege vateu tuvu kitae agievelu. Vateu tuvu ke agisi iluvisi Diudea vatae isi Samalia vatae tievelu isege abositolo ulaea Dielusalemae uevelu.
2
Ige vali kela atau duaea Sitivinilu alio kavai vai abavulu.
3
Ige Solou olai ekalesi keneni kaveatisi vesuiavei kateai igaligali kela tai evievie ata kaogei kavei agisi loi dibulagei.
4
Ekalesiae bahata iluvisi vatava igaligaliai tiale kea IESU koto loui ata haivelu ige kotou tilu.
5
Ige
Bilibiu Samalia vatavae tai ui ata haiveva.
6
Ige ata moeagaea kotove ke eviu dua ai au aveve nivolete ale keta ivaevelu.
7
Abo ke ivasefe Bilibiu godiou toelaea abole uvale ke nunuvege abo kekota ataea uvue uvale kea daiai tiatilu isi vavaeabea hada solivale isi gena keu kate keta hoeaseavelu.
8
Keu kateige ataea ke ivai sisila kitae alu.
9
Isege malaha vole Saimoni keu okele ui vali bahata amiga letatavai hanivavai ata seleavege abo aveveve ke ivai vikoavelu.
10
Ata bahata kosia eseu ese kea kotove evisi loui avoe malaha keu siau DILAVAu siau late.
11
Seleivale aveve avale eu kateai ata seleaveige ataea vabuiavai kotove eviva.
12
Abo kateisege Bilibiu loale ataea DILAVAu adau siaule uveve koto loui IESU ivile ata haivege ata bahata kotove evisi babatisoaevelu.
13
Ige Saimoni leta koto evige Bilibiu vai babatisoeage eu avoti ui oiva ige Bilibi vikoivale aveve ke age eu ke ivai vikoalu.
14
Samalia atakea DILAVAu koto evisi vale koto ke abositoloeau Dielusalemae uale kea Bitata Dionita hanavege ea tilu.
15
Tialea Samaliae daiai abolai guliguliai olavale kea munanau tuvu agisi.
16
Kosealelu lmunanau tuvuteu aboele loie solisege ea IESU ivi ulale babatisoalu.
17
Ige Bitau Dioniti aboi ada tataeabele otove guliguliage ea munanau tuvu agilu.
+ 18 Kateisege Saimoniu aveveabe ke ivai olai moni vai Bitata Dionita vavei.
19
Isi lavigei avoe moni ko agisito vuvune ke damuve ige data ataea tatale ada vaeavage abo valivelu munanau tuvu agisi.
20
Ige Bitau laviai avoe au a huhuige ale ai moni keta DILAVAu vuvune ke ibila ai. A katealelu ale ai moni keti vatavau toelae teve.
21
A aveve kateale aluage aba loili lovi ko alivelu bele kosealelu ai uvu keu DILAVAu nile lilikata ue solilu.
22
Da huhuige aveve toelau ai uvu ke vai toelatige a aveve toela ula ava.
23
Ai huhui toela kateale huhu moeagavale ke kalei kuialai DILAVA laviaga au ai aveve toela uliai.
24
Kateai louge Saimoniu laviai avoe dalu kosive lavia ige la huhuai louale keu ba daele loi kalevai.
25
Bitau Dioniti DILAVAu nona loui ata haivege vesuge kalevai Dielusalemae tievelu tialea kuvau tavae koto uu dua loui Samalia ata lavigei tilu.
26
Vali voleo DILAVAu Anelu voleu Bilibi laviai avoe kobelai valae talivelu Dielusalemae velevai kuvau eseu gasa vatae tiale kela te.
27
Ige Bilibiu kobelai tialeu kuvau tavae Idiobia malaha voleti avoele velevalu. Malaha keu Idiobie gamania kosi kitae olisi kuini Kadasiu vata nalia vale keu moni kitae ke bahata naliava.
28
Iale malaha keu Dielusalemae DILAVA guliguliavaito au oe otiva kaliotale buka vole Aisaia belovetai kisaiale ke dodavei loiva oe.
29
Ige munanau tuvu Bilibi laviai avoe talivelu kaliota ke vavala te.
30
Kateige Bilibiu viliviliai tai kaliota vavala tai evisege eu malaha keu Aisaia Buka ke dodaveva ige Bilibiu laviai avoe ale a dodavale kele lulelealu.
31
Ige eu loui avoe dale oleveo kateai luleleai isito ata voleu da haivula age da luleleava.
32
Malaha keu Aisaia bukale dodavalela kou ata keu mamoe late ataeale meialemei tai kavaevei keu mamoe doga kelate ataeale homove boige au ba kekoalivelu bele iale abo mamoele ale kelate abo kavage au ba kekoalivelu bele isi kotobe loulivelu bele.
33
Ataeale vai toelatisi vai kotaevei aveveve toela ivai kavage au voeleige atave kea uge ataea ba dibagelivelu bele.
34
Isi kateige kosivele keu Bilibi belai avoe da haivu beloveta kou ata olelau ko loui kisaialu au amigala ke huhuaive bela ata volelau.
35
Ige Bilibiu bukau koto kele IESU kotou dua ke loui haivulu.
36
Isi avoti tiale evole ivai Bilibi lavia avoe e ko iva dale babatisoai.
37
Ige Bilibiu laviai avoe ale ai uvu vai IESU vileo vaeavaluaga ale babatisoa. Ige malaha keu avoe duave da dibage IESU KELISO keu DILAVAu vola keu.
38
Isi kateai au kaliota vaeavai Bilibiti tige eu vai babatisoeavalu.
39
Kateaito e kele DILAVAu munana tuvu Bilibi vai tilu. Ige kosi keu Bilibi kaoalu.
40
Ige Bilibi soleka oo vole Asodasi la velevai tai ata keneni haivei tilu kotou dua ke louive tialeu oo vole Sesalia la velevalu.