¹ Malaha vole Ananaiasi keu au keate Sabilati abo vata voiale ke ibila agievelu. ² Isi avoti vole lavigei avoe lati voleave vaveito vaki vole lai lomigalai otovei. Kateige Ananaeasiu moni ke vakivole vai loaleu Abositolola velevai vavei seleavei avoe vatau ibilavela kou. ³ Kateai louge Bitau avolu loui avoe Ananaisi seteneu ai uvule loige aa moni vole amigalu otovei to munana tuvute seleavai kosealu moni bahata kela kou. ⁴ Memila vata ke voie solisege vata keu ai vata isi vaoe a voiage moni keu ai moni. Iale a vadeuluga koto kateale loulu, aa lo igali selseave solilu isito DILAVAtaga aa ke seleavalu. ⁵ Kateisege Ananaeasiu koto ke evisi dobai vata kavai voelealu. Kateige ata bahataea ke evisi vabuaevelu. ⁶ Kateige ata volea ogona agisi loi buliai vai tiale kaie vatae daiai vai tialea abavulu. ⁷ Ivaga gutule Ananaiasi keateu lolu isito keate keu vadeu velavele loale ke evie solilu. ⁸ Ige Bitau keate kelu loui avoe seleavale isito da lavia lavatau moni agiale au kehamola kou ige keate keu loui avoe ito keneniala kea. ⁹ Ige Bitau avolu loui avoe vadeuluga ai velati olale DILAVAu munana tuvu seleavai, eviso malaha kea ai vela vai abavualeala aike anakale koea daia lolu abole tota aa vaitai ai velata kavokavoai abavui. ¹⁰ Isi kateisege solekata keateu keu dobai voelealu ige malahale kea tota loi ke kabaisi vai tialea velaveta havaisi abavulu. ¹¹ Ige ekalesia bahata isi ata moeagaea ke evisi vabu kitae aevelu. ¹² Vali kateivalela abositolo tuelo kea vikou aveve ke moeaga aevege ataea ke ivegelu. Evievi ata kea bahata Diuia Dubu kitae ke hedakale Solomoniu keveo tiale keveo vole bevuai igali toai ueviva. ¹³ Isege u kavale ata kea evievi atate ke vabuiavei aboeo loie solilu, homasiaveive. ¹⁴ Ige ata moeagaea koto ke evisi abo uvu vai IESU vileo vaeavai vole bevuai igalitoalu. ¹⁵ Ige abostoloea vikou hau moeaga age ataea ivei hatitite kelai kuvale ama agisi tedisi hatitite otovege abo navai usege Bita vea loi tataeabela tige munanabeu tatavela tige abo doadoai. ¹⁶ Kateige ata moeagaea abo oo kalevai oo kitae Dielusalemae loevei haluluviale isi munana toelau uvuiabele tige kavavale kateivale keta lohomei lolu. Ige Abostolo kea bahata ke hoeaseavege abo doadoalu. ¹⁷ Abostolo kea kateige Dubu kosi kitae kea abo kakoluvu Sadiukisi abolai mamaevelu. ¹⁸ Isi ke agigei tai dibulae otovelu. ¹⁹ Isio vavi kele DILAVAu au Anelu vole hanavage tialeu dibula anaka alavage ea daiai loevelu. ²⁰ Isi lavigei avoe taevelivelu dubu uvue leleisi ukolikoli koto loui ata haiveve. ²¹ Kateai louge ea ke evisi tievelu tai vavita Dubu uvue aloloai ata haivelu. Isege Dubu kosi kitae keu au kakoluvu isi Diu kosi kitae keu au kakoluvu lohomei lolu. Loi nonahamai bolisi hanavege tai dibulae abositolo agigei loi. ²² Tialea dibulae daiai abositolo kaogei loevei loui avoe dibulaea uesavalu. ²³ Lavigei avoe lo daiage anaka bavuale keta uge anaka naliale keta lavisi ulu. Ige lo anaka alavai uvueo tige ataea ue savalu. ²⁴ Kateige Dubu kosive isi ata bukate ke evisi vikoai tetehamalu. Isi malomaloai avoe abositolo kea oleve katealu. ²⁵ Kateisege malaha voleu loaleu lavigei avoe la kaogevale ata kea aike Dubu uvue ata haiveva. ²⁶ Isi kateige bukate vole kitaeu au kakoluvuiali IESU abositolo agigelu tilu. Tialea tai baita abolai loue solisi kave solisito lohomegei lolu huhuai avoe lole kavege ataeale vuleta loo kavei. ²⁷ Isi kateai abositolo agigei loi dubu kosive kea vudile otovelu ige Dubu kosive kitae keu kobelai belagelu. ²⁸ Belagevei avoe lale lo memila la lavigeale evilu lo memila loui kosealu labea momai IESU ivi loui ata haivelive isito la ave koto ke loui Dielusalemae ata bahata ke loui lavigelu isi la olai loi vavale seleai kosealu keala IESU kavalu. ²⁹ Ige Bitau au kakoluiali lavigei avoe leleve ula lo ba atabeu koto evilivelu bele isito loeale DILAVAu koto ula evisi. ³⁰ La katea IESU vai idiu dole kavage voeleige abo vai abavulu ige lailoi vavivuia DILAVA ke isage kobelalu. ³¹ Isi vai au ada vaiteveo vaeavage IESU ata kitae olisi ata dulugevale ata olilu iale Iselala ataeale abo aveve toela kalevage kosiveule aveveabe toela uliai hoeaseavei. ³² Kela munana tuvute loamege loo luleleai ata haiveva iale olea DILAVAu koto evige aule au munanau tuvu vavei. ³³ Abositolo kea kateai lousege Diuia kosivea ke evisi tuvuai olai ke kavei. ³⁴ Isito Balisesea malaha vole kitae gamaliolo keu olale kobela koto loui. Malaha keu Diuia basuale koto kenene dibalu lulele lelevealu isi malaha ke ata bahata kea eahaleva iale keu abositolo hanavege vatae tilu. ³⁵ Isi Diu kosive ke lavigei avoe Iselala ataea huhui dua aito ba vaoe abositolo ke dikaiaveve. ³⁶ La dibage memila lahani voleo malaha vole toela Teodasi keu au amiga letatavage isoho ata voo handeleti kea igali toai lovaeavelu. Abo olale gamani dikaiavai isito vaoe gamaniu Teodasi kavage voeleage atave kenenia vabuai iluvisi tiatilu. ³⁷ Isi valivoleo gamaniu ataea ivi dodavai loi vale ke valila Galili malaha vole Diudasi keu kobelai ata moeaga lohomegei tai olai gamani ke kavage voeleai isito gamaniu ke kavage voeleige atave ke nenia iluvisi tiatilu. ³⁸ Iale katealelu da koto vole louge evive labea momai malaha ke kavelive isito hanavege abo tai. Kosealelu abole abo goadatele aveve kateale aluaga keule solekata vesuai. ³⁹ Isito DILAVAu vuvunele aluaga lale oleveo kaeai kavei toelatigeluaga DILAVAla la ke vai toela tilu. ⁴⁰ Malaha keu kateai louge kea kotove ke evisi IESU ata ke hanavege loige abo visukavei. Loui avoe taevei tota IESU ivi ko loui ata haivegelive. ⁴¹ Kateige Bitau Dioniti Diuia kosi ke kalevei sisilata tievelu. Kosealelu kea IESU ivile vateu tuvu agievelu ige DILAVAu ke ivei eahalegelu. ⁴² Isi kateai vali bahata abole Dubue tai isi oe tai kotou dua loui ata haivei koseigei IESU keu ata dulugevale atau duala keu KELISO.