¹ Kateai lousege Dubuu kosivea Dubu naliavale bukate igali isi Sadiusese ata volea aboili loevelu. ² Loevealea abolai tvualu kosealelu Bitau Dioniti kotou gala loui ata haivei avoe IESU voeleai kobelale kele lailole vovole kobekavai. ³ Koto katealelu abo agigei dibulae otovelu gutulega abo agigei bavugelu ige vavile keveo navaevelu. ⁴ Isito ata bahata vai taoseni kea kotou dua ke evisi abo uvu agisi IESU vavulu. ⁵ Iale vali voleo Diuia Dubu kosivea ou kosia isi Diuia basu loui kisaiavale kea Dielusalemae igalitoai loevelu. ⁶ Loale kea Dubu kosi kitae Aniasi isi hauve avale ese vole ketale loevelu ese kea iviala koea, Kaiabasi, Dioni, Alekisanda. ⁷ Iale kea Bita ta Dioni vai abo minale otove belagei avoe oleu siauta oleu ivitalega la aveve ko alu. ⁸ Ige Bitau munanau tuvu siaule lavigei avoe dubu kosia isi ou kosia di koto ko evive. ⁹ Lale aveve dua lo geina keukatelu ale keluga lo belageva lale olai evisi oleveo kateila lo ai ke hoeaseavalu. ¹⁰ Keta duave da olai la lavigeve bahata dibave la loula age abo Nasaleta malaha ke vai idiu dole kavage eu voelealu. Ige abo vai abavulu isito DILAVAu isaige IESU kobelalu iale keu vuvunelega geina keukate keu lavisi oalu. ¹¹ Iale da koto vole louge evive Bukau kotou IESU aveve kele loui avoe laea oo vole kouvale ata kelatea la oo kouveve vule ke homasiavale kela ave DILAVAu oo hade biveve vuleu dua olilu. ¹² Iale avo igalile lale ukolikolilu agive kaie vata kove oo vuvunetebe avo lateu ue solilu isito ivie kele lai lole ukolikoli mauli agisi. ¹³ Kateai louge Diuia kosive kea ke evisi vikohamai huhuige malahakea sikulu solialeala isito luleleabe kele abo ivege kea IESU luvita oiva. ¹⁴ Kateai olale abolai koto loui isito ivage malahale genave doadoale keu Bitata Dionitaeali ulu. ¹⁵ Kateige kosive kea Bitata Dionita hanave ea vatae loisege eulaea nonahamava. ¹⁶ Nonai vole lavigei avoe lailole malaha kele vadeu igaliai kosealelu Dielusalemae ata bahata kea dibage kea vikou aveve kitaela abo ke alu iale lai ba kele nonabe alivelu bele. ¹⁷ Katealelu lai ata ke lavigei koseai labea momai IESU iviloui atabe hoeaseavalive. ¹⁸ Kateai louito Bitata Dionita lavigege ea vaealoige genuhamai isuta abolai loui avoe la ba tota IESU ivi loui atabe haivegelive. ¹⁹ Ige Bitau Dioniti lavigei avoe la biagea DILAVAu nile ko huhuave au loeale lai koto evisi e bela DILAVAu koto evisi. ²⁰ Isito lo IESU ivai kotove evialelu lo ba ata haiveve ke kalevalivelu bele. ²¹ Kateai louge Diuia kosive kea olale banisiavei isito abo ivage ataea gena keukatele aveve dua ivai Dilava hoeaseavalu katealelu abo banisiaveve kuvau ue solige abo isuta lavigei avoe laba tota koto ko lou voleai ata haivelive kateaito hanavege tilu. ²² Malaha abo hoeaseavale lahaniveu isoho voti kelate. ²³ Bitau Dioniti tialea evievi ata haivelu kosive kea luale koto ke. ²⁴ Ige kea ke evisi DILAVA laviai avoe loi kosive au siaute au Otogo ai vata ai ee ai avoele valeai otovelu. ²⁵ Memila voleo ai munana tuvute hanavege au tialeu loi vavia Deividi ke melitige au loui avoe vadeuluga DILAVAu koto evie solivale kea tuvualu isi vaduluga ata kea huhui toela ke huhu kavalu. ²⁶ Vatau kosivea olavale kobelai vole bevuai igalitoai DILAVAu au vo hanavale ke kavai. ²⁷ Deividiu memila louale keu leleve iale ave oo kole kosive Heloda isi kosi vole Botiasi Bailate Diuia ata olie soliale isi Diuia ata vole kea bahata vole bevuai ai hau ata tuvute IESU makai hanavale ke kavage voelealu. ²⁸ Kea vole bevuai aveve ke age aa ai vuvunele memila ivage abole ke ai iale ai olalegabo ke alu. ²⁹ Loi kosive abo ave lolai isuta louale ko eviso loea ai hau ata iale ai siau loamege lo vabu kalevaito ai koto loui ata lavigei. ³⁰ Isi ai vuvune hanavage loea ai ata tuvute olisi IESU ivile ata hatitite ke hoeaseavei aveve nivoleta aevei. ³¹ Guliguli keu vesusege abo igali toai guliguliale oo keu hadalu ige munana tuvteu kele loi agigei melitievege abo vabu savaito tai DILAVAu koto loulu. ³² Vali kela IESU hauavale ese kea bahata huhui igali isi uvu igali hau moeagate kea koseale loue solilu hau kou loelela kou. Isito ke agisi igaligaliai ata vavei lotilu. ³³ Ige Abositolo ata kea melitavai IESU voeleai kobelale ke loui ata haivege DILAVAu ke bahata hoeaseavelu. ³⁴ Ige kea hau agiale kea volelate ula beu sotie solilu kosealelu ata kenenia abo vata abo oo keneni voiai moni moeaga agisi lolu. ³⁵ Agisi loalea Abositolo vavelu ige abositoloea hau ke agisi hauia bea ue site ke vavelu. ³⁶ Kelate livai malaha vole ivive Diosese keu Saibalasi vatava biage. ³⁷ Keu au vata voiai moni keneni agisi loaleu abositolo vavege ea sisilave ai ivive loui avoe Banabasi ke baive kosealu ata oute ata melitigevale ata.