1
Gutu vole tili okolokile Bitau Dioniti Diuia Dubu kitaele guligulilu tilu.
2
Tiale kea Dubu kitaeo daiai ata vole gena keukate keu Dubu anaka vole abo loui avoe anaka dua ke vavale ugulumai uva. Malaha ke aiaveu vaeavage gena keuka keta ulu ataeale ke kobai vai lolivelu anakake vavale vaeavage ui olea tai loivale ke monilu imiliavegei.
3
Ivaga Bitau Dioniti Dubu ke uvue tisege eu monilu imiliavelu.
4
Ige abo ke maliha tumuaiuge Bitau avolu loui avoe lo malige.
5
Ige eu huhuai avoe koeale moni be vai damui.
6
Ige Bitau laviai avoe dau moni solilu isito da vai loale ke dale vai amui Nasaleta malaha IESU KELISO ke ivile daa aa lavialu kobelai lavi.
7
Kateai to adave vaitela holisi letatavalu ige genave kea solekata dualu.
8
Ige eu kobela lavisi oalu isi aboili iaeabela vito vitoai tilu DILAVA hoeasavalivelu tilu dubu uvue.
9
Malaha keu kateai DILAVA hoeaseavalivelu tige ata bahata kea ke ivalu.
10
Ke ivai dibage malahale kela keu Dubu anakale ui monilu ata daluiavevale kela keu isi ke ivai vadeu avoele loivale ke evisi vikoai tetehamalu.
11
Malahale keu Bitata Dionita mudikavei sisilaeabe asege ata bahataea melihamai tialea Dubu ke hedaka abo ivihai avoe Solomoniu keveo malaha vole ivalivelu tilu. Kea malahale ke ivalivelu tai vikoai teteavelu ivaive.
12
Ige Bitau ata ke ivei abolai loui avoe Iselala ataea vadeuluga la tetehamai lo nibigeva. Laa huhuige loea loi siaulega malaha ke hoeaseavage oai tilu be.
13
DILAVA keu memila lailoi vavivuia Ebolahamu Aisiki Dieikobo kea DILAVA. Iale kela au hau ese vole IESU letatavai vuvune vavuge vuvunevelega lo aveve ke alu isito la IESU ke vai gamania kosive bailate vavuge au olai havagau tai isito la homasiavai olae solilu.
14
Keu ata tuvute isi lilikata ua ata isito laea avolu olae savai vai Bailate vavulu isi laviage au IESU hanava solisito ata kaveale ke hanavalu.
15
La kateila ai gibosone ata kitae ke kavalu isito DILAVAu voelele isage kobelalu iale loea au voeleai kobelale ke ivale ata lola koea.
16
Lo IESU ivile gena keukate ke laviage au IESU vuvunele kobelalu lo loi uvu vai IESU vileo vaeavala ai laviage eu kobelalela la ke ivalu.
17
Di kakoluvuia da huhuige la kosive vileo malomaloilage IESU ivile lo aveve ke alu.
18
DILAVAu memila au beloveta lavigege abo kisaiai avoe DILAVAule KELISO hanavage aule vaeu tuvu agisi iale kela IESU vai lelevetilu.
19
Katealelu ave lai aveve toela ke kalevai kuiakavai loige DILAVAule lai toela ke uliai la goada tige lale ba siauvele u dua ave.
20
Ige aule tota la dulugevale ata kosive IESU hanavage aule tota dobai loi.
21
Isito IESU aike Otogoe uale keule ba dobai loluaga vata ko vai uatisi ige aule memila uale kelate ai DILAVAu koto kateale au Beloveta tuvute ke lavigelu iale aule ba loi.
22
Mousese memila belovetai loui avoe DILAVAule da hanavale kolate ai lalai beloveta vole hanavai beloveta keule lai atatele loi koto louge kotove bahata evive.
23
Iale olevea Beloveta ke koto evie solige DILAVAule tavovogei kavege abole uesolisi.
24
Koto ke igali Samuelau kisaiage olea Samuela iae loale keta abota kisaiai ave vali kole loiveve keta loulu.
25
Lailoea Beloveta kea valada iale lailoea kea ese late. Memila DILAVAu au Beloveta lavigeale koto keu aike lailoele lolu. DILAVAu memila koto ko loui Eibolahamu lavia avoe ai valada kele dale ata bahata hoeaseavei DILAVAu koto kateai louale keu aike lailoele lolu.
26
DILAVAu au vo IESU hanavage memila dobai laeo loi olale la bahata hoeaseavei lai aveve toela kalevai kuiakavai avoe loi.